Read Ndebele-IBhayibhili Elingcwele 2006 U-Isaya 51 Bible Online

U-Isaya 51 - Ndebele-IBhayibhili Elingcwele 2006 bible

U-Isaya 51

¹Lalelani kimi, lina elilandela ukulunga, lina elidinga i Nkosi; khangelani edwaleni elacezulwa kulo, legodini elagejwa kulo.

²Khangelani kuAbrahama uyihlo, lakuSara owalizalayo; ngoba ngambiza eyedwa, ngambusisa, ngamandisa.

³Ngoba i Nkosi izayiduduza iZiyoni, iduduze wonke amanxiwa ayo, njalo izakwenza inkangala yayo ifanane leEdeni, logwadule lwayo lufanane lensimu ye Nkosi; injabulo lentokozo kuzatholakala khona, ukubonga lelizwi lokuhlabelela.

⁴Lalelani kimi, bantu bami, libeke indlebe kimi, lina sizwe sami; ngoba umlayo uzaphuma kimi, njalo ngizakwenza ukwahlulela kwami kuphumule kube yikukhanya kwabantu.

⁵Ukulunga kwami kuseduze, usindiso lwami luphumile, lengalo zami zizakwehlulela abantu; izihlenge zingilindele, zithembele engalweni yami.

⁶Phakamiselani amehlo enu emazulwini, likhangele lemhlabeni phansi; ngoba amazulu azanyamalala njengentuthu, lomhlaba uguge njengesembatho, labahlezi kuwo bafe njengempukane; kodwa usindiso lwami luzakuba phakade, lokulunga kwami kakuyikuphela.

⁷Lalelani kimi, lina elazi ukulunga, abantu abamlayo wami usenhliziyweni zabo; lingesabi ukusola kwabantu, kumbe lethuswe yikuthuka kwabo.

⁸Ngoba inundu izabadla njengesembatho, lempethu ibadle njengoboya bezimvu, kodwa ukulunga kwami kuzakuba laphakade, losindiso lwami ezizukulwaneni lezizukulwana.

⁹Vuka, vuka, uzembathise amandla, wena ngalo ye Nkosi; vuka njengensukwini zendulo, ezizukulwaneni zendulo. Kawusuwe yini lowo owaquma iRahabi, walimaza umgobho?

¹⁰Kawusuwe yini lowo owomisa ulwandle, amanzi enziki enkulu, owenza ukujula kolwandle kwaba yindlela yokuchapha abahlengiweyo?

¹¹Ngakho abahlengiweyo be Nkosi bazabuya, beze eZiyoni behlabelela; lentokozo elaphakade phezu kwekhanda labo, bazazuza intokozo lenjabulo, usizi lokulila kuzabaleka.

¹²Mina, mina uqobo nginguye oliduduzayo; ungubani wena ozakwesaba umuntu ozakufa, lendodana yomuntu ezakwenziwa ibe njeng otshani?

¹³Ubusukhohlwa i Nkosi, umenzi wakho, eyeneka amazulu, yabeka izisekelo zomhlaba, uqhubeka usesaba insuku zonke ngenxa yokuvutha kwentukuthelo yomcindezeli, kungathi uzimisele ukuchitha? Ingaphi-ke intukuthelo yomcindezeli?

¹⁴Isibotshwa esithunjiweyo siyaphangisa ukuze sikhululwe, lokuthi singafeli emgodini, njalo ukuthi ukudla kwaso kungasweleki.

¹⁵Ngoba ngiyi Nkosi uNkulunkulu wakho eyadabula ulwandle, amagagasi alo ahlokoma; i Nkosi yamabandla libizo layo.

¹⁶Ngifakile amazwi ami emlonyeni wakho, ngakusibekela emthunzini wesandla sami, ukuze ngihlanyele amazulu, ngibeke izisekelo zomhlaba, ngithi kuyo iZiyoni: Lina lingabantu bami.

¹⁷Vuka, vuka, usukume, wena Jerusalema, wena onathe esandleni se Nkosi inkezo yolaka lwayo, wanatha inzece zenkezo zokuthuthumela, wazikhoca.

¹⁸Kakho ongayikhokhela phakathi kwawo wonke amadodana azelwe yiyo; njalo kakho ongayibamba ngesandla kuwo wonke amadodana ewakhulisileyo.

¹⁹Lokhu kokubili kukwehlele, ngubani ozakuzwela usizi? Incithakalo, lokubhujiswa, lendlala, lenkemba; ngizakududuza ngobani?

²⁰Amadodana akho aphelelwe ngamandla, alele ezihlokweni zezitalada, njengenkunzi yendle ebanjwe embuleni; agcwele ulaka lwe Nkosi, ukukhuza kukaNkulunkulu wakho.

²¹Ngakho khathesi zwana lokhu, wena ohluphekayo lodakiweyo, kodwa hatshi ngewayini.

²²Itsho njalo iNkosi yakho, uJehova loNkulunkulu wakho olabhelela udaba lwabantu bakhe: Khangela, ngisusile esandleni sakho inkezo yokuthuthumela; inzece zenkezo yolaka lwami, kawusayikuyinatha futhi;

²³Kodwa ngizayibeka esandleni salabo abakuhluphayo, abathe emphefumulweni wakho: Khothama, ukuze sedlule phezulu; usubeke umzimba wakho njengomhlabathi, lanjengesitalada kwabadlula phezulu.