Read Ndebele-IBhayibhili Elingcwele 2006 U-Isaya 52 Bible Online

U-Isaya 52 - Ndebele-IBhayibhili Elingcwele 2006 bible

U-Isaya 52

¹Vuka, vuka, wembathe amandla akho, wena Ziyoni! Yembatha izembatho zakho ezinhle, wena Jerusalema, muzi ongcwele! Ngoba kusukela khathesi kakusayikungena kuwe ongasokanga longcolileyo.

²Zithintithe uthuli; sukuma, uhlale phansi, wena Jerusalema: zikhulule kuzibopho ezisentanyeni yakho, wena ndodakazi ethunjiweyo yeZiyoni!

³Ngoba itsho njalo i Nkosi: Lizithengisile ngeze; njalo lizahlengwa ngaphandle kwemali.

⁴Ngoba itsho njalo iNkosi uJehova: Abantu bami behlela eGibhithe esikhathini sendulo ukuhlala njengabezizwe khona, njalo amaAsiriya abacindezela ngaphandle kwesizatho.

⁵Khathesi-ke, ngiseselani lapha, itsho i Nkosi, ukuthi abantu bami bathethwe ngeze? Labo abababusayo babenza baqhinqe isililo, itsho i Nkosi; lebizo lami liqhubeka nsukuzonke lihlanjazwa.

⁶Ngakho abantu bami bazalazi ibizo lami, ngalolosuku bazakwazi-ke ukuthi yimi engikhulumayo: khangela, yimi.

⁷Zinhle kangakanani phezu kwezintaba inyawo zalowo oletha izindaba ezinhle, ezimemezela ukuthula, eziletha indaba ezinhle zokulunga; ezimemezela usindiso; ezithi kuyo iZiyoni: UNkulunkulu wakho uyabusa.

⁸Abalindi bakho bazaphakamisa ilizwi, bahlabele kanyekanye ngelizwi, ngoba bazabona ilihlo ngelihlo, lapho i Nkosi izabuyisa futhi iZiyoni.

⁹Qhamukani ngentokozo, lihlabelele kanyekanye, lina manxiwa eJerusalema, ngoba i Nkosi isibaduduzile abantu bayo, iyihlengile iJerusalema.

¹⁰I Nkosi iwavezile ingalo yayo engcwele emehlweni phambi kwazo zonke izizwe, umhlaba wonke uzabona ukukhulula kukaNkulunkulu wethu.

¹¹Phumani, phumani kulo iBhabhiloni, lingathinti okungcolileyo; phumani phakathi kwalo, lizigcine lihlambulukile, lina eliphatha izitsha ze Nkosi.

¹²Kaliyikuphuma ngokuphangisa, kaliyikuphuma libaleka, ngoba i Nkosi izalikhokhela, loNkulunkulu kaIsrayeli alivikele ngemuva.

¹³Khangela, inceku yami izaphumelela, izakuba nkulu ibe lodumo kakhulu.

¹⁴Abanengi batshaqeka lapho beyibona; yayilimele kakhulu ubuso bungasakhangeleki njengobomuntu, lesimo singasabukeki njengesabantu.

¹⁵Ngokunjalo-ke izizwe ezinengi zizamangala, lamakhosi athithibale ngenxa yayo; ngoba lokho abangakubikelwanga bazakubona, lalokho abangakuzwanga bazakuqedisisa.