Read Ndebele-IBhayibhili Elingcwele 2006 Ulevitikusi 10 Bible Online

Ulevitikusi 10 - Ndebele-IBhayibhili Elingcwele 2006 bible

Ulevitikusi 10

¹Amadodana kaAroni, oNadabi loAbihu, asethatha ngulowo lalowo umganu wakhe wokutshisela impepha, afaka umlilo kiyo, abeka phezu kwawo impepha, anikela umlilo ongejwayelekanga phambi kwe Nkosi, eyayingawalayanga wona.

²Kwasekuphuma umlilo ovela phambi kwe Nkosi, wawaqothula, asefela phambi kwe Nkosi.

³UMozisi wasesithi kuAroni: Yilokhu i Nkosi eyakukhulumayo isithi: Kulabo abasondela kimi ngizangcweliswa, futhi phambi kwabantu bonke ngizadunyiswa. UAroni wasethula.

⁴UMozisi wasebiza uMishayeli loElizafani, amadodana kaUziyeli uyise omncane kaAroni, wathi kibo: Sondelani, libasuse abafowenu phambi kwendlu engcwele, kuze kube ngaphandle kwenkamba.

⁵Basondela-ke, babathwala bembethe izigqoko zabo kwaze kwaba ngaphandle kwenkamba, njengokutsho kukaMozisi.

⁶UMozisi wasesithi kuAroni lakuEleyazare lakuIthamari, amadodana akhe: Lingembuli amakhanda enu, lingadabuli izembatho zenu, hlezi life, lolaka lwehlele phezu kwenhlangano yonke. Kodwa akuthi abafowenu, indlu yonke kaIsrayeli, balilele ukutshisa i Nkosi ekuphembileyo.

⁷Lingaphumi ngomnyango wethente lenhlangano hlezi life, ngoba amafutha okugcoba e Nkosi aphezu kwenu. Benza-ke njengelizwi likaMozisi.

⁸I Nkosi yasikhuluma kuAroni isithi:

⁹Unganathi iwayini lokunathwayo okulamandla, wena lamadodana akho kanye lawe, nxa lingena ethenteni lenhlangano, ukuze lingafi; kuyisimiso esilaphakade ezizukulwaneni zenu;

¹⁰lokwehlukanisa phakathi kokungcwele lokungangcwele, laphakathi kokungahlambulukanga lokuhlambulukileyo;

¹¹lokufundisa abantwana bakoIsrayeli zonke izimiso i Nkosi ezikhulume kubo ngesandla sikaMozisi.

¹²UMozisi wasesithi kuAroni lakuEleyazare lakuIthamari, amadodana akhe ayesele: Thathani umnikelo wokudla oseleyo eminikelweni ye Nkosi eyenziwe ngomlilo, liwudle ungelamvubelo eceleni kwelathi, ngoba uyingcwelengcwele;

¹³njalo liwudlele endaweni engcwele, ngoba uyimfanelo yakho lemfanelo yamadodana akho, esivela eminikelweni ye Nkosi eyenziwe ngomlilo; ngoba ngilaywe njalo.

¹⁴Kodwa isifuba sokuzunguzwa lomlenze wokuphakanyiswa lizakudlela endaweni ehlambulukileyo, wena lamadodana akho, lamadodakazi akho kanye lawe; ngoba kuyisabelo sakho lesabelo samadodana akho; kunikwa kuvela emihlatshelweni yeminikelo yokuthula yabantwana bakoIsrayeli.

¹⁵Umlenze wokuphakanyiswa lesifuba sokuzunguzwa bazakuletha leminikelo yamahwahwa eyenziwe ngomlilo, ukukuzunguza kube ngumnikelo wokuzunguzwa phambi kwe Nkosi; kuzakuba ngokwakho lokwamadodana akho kanye lawe, kube yisimiso saphakade, njengokulaya kwe Nkosi.

¹⁶UMozisi wadingisisa impongo yomnikelo wesono, khangela-ke yayitshisiwe. Ngakho wathukuthelela uEleyazare loIthamari, amadodana kaAroni aseleyo, esithi:

¹⁷Kalidlanga ngani umnikelo wesono endaweni engcwele, ngoba uyingcwelengcwele, futhi ilinikile wona lina ukuze lithwale ububi benhlangano, libenzele inhlawulo yokuthula phambi kwe Nkosi?

¹⁸Khangelani, igazi lawo kalingeniswanga phakathi e ndawe ni engcwele. Ngabe isibili liyidlile e ndawe ni engcwele njengokulaya kwami.

¹⁹UAroni wasesithi kuMozisi: Khangela, lamuhla sebenikele umnikelo wabo wesono lomnikelo wabo wokutshiswa phambi kwe Nkosi, kanti izinto ezinje zingehlele! Uba bengidlile umnikelo wesono lamuhla, bekuzakuba kuhle emehlweni e Nkosi yini?

²⁰Esezwile lokho uMozisi kwaba kuhle emehlweni akhe.