Read Ndebele-IBhayibhili Elingcwele 2006 Ulevitikusi 18 Bible Online

Ulevitikusi 18 - Ndebele-IBhayibhili Elingcwele 2006 bible

Ulevitikusi 18

¹I Nkosi yasikhuluma kuMozisi isithi:

²Tshono ebantwaneni bakoIsrayeli uthi kubo: Ngiyi Nkosi uNkulunkulu wenu.

³Lingenzi njengokwemisebenzi yelizwe leGibhithe lapho elalihlala khona, lingenzi futhi njengokwemisebenzi yelizwe leKhanani engililetha kulo. Lingahambi ngemithetho yabo.

⁴Lizakwenza izehlulelo zami ligcine izimiso zami, ukuhamba kuzo. Ngiyi Nkosi uNkulunkulu wenu.

⁵Ngakho lizagcina izimiso zami lezehlulelo zami; okuthi uba umuntu ezenza uzaphila ngazo. Ngiyi Nkosi.

⁶Kakungasondeli lamuntu lakusiphi isihlobo senyama yakhe ukwembula ubunqunu baso. Ngiyi Nkosi.

⁷Ungembuli ubunqunu bukayihlo lobunqunu bukanyoko; ungunyoko, ungembuli ubunqunu bakhe.

⁸Ungembuli ubunqunu bomkayihlo, buyibunqunu bukayihlo.

⁹Ubunqunu bukadadewenu, indodakazi kayihlo loba indodakazi kanyoko, ezelwe ekhaya loba ezelwe ngaphandle, ungembuli ubunqunu babo.

¹⁰Ungembuli ubunqunu bendodakazi yendodana yakho, loba bendodakazi yendodakazi yakho, ngoba bayibunqunu bakho.

¹¹Ubunqunu bendodakazi yomkayihlo ezelwe nguyihlo, ingudadewenu, ungembuli ubunqunu bayo.

¹²Ungembuli ubunqunu bukadadewabo kayihlo, ngoba eyisihlobo sikayihlo.

¹³Ungembuli ubunqunu bukadadewabo kanyoko, ngoba eyisihlobo sikanyoko.

¹⁴Ungembuli ubunqunu bomfowabo kayihlo; ungasondeli kumkakhe, ngoba enguyihlokazi.

¹⁵Ungembuli ubunqunu bukamalokozana; ungumkandodana yakho, ungembuli ubunqunu bakhe.

¹⁶Ungembuli ubunqunu bomkamfowenu, buyibunqunu bomfowenu.

¹⁷Ungembuli ubunqunu bowesifazana lobendodakazi yakhe; ungathathi indodakazi yendodana yakhe loba indodakazi yendodakazi yakhe, ukwembula ubunqunu bayo; bayizihlobo; kuyinkohlakalo.

¹⁸Ungathathi owesifazana kanye lodadewabo uku m hlupha, ukwembula ubunqunu bakhe kanye laye empilweni yakhe.

¹⁹Ungasondeli kowesifazana ekwehlukanisweni kokungcola kwakhe ukwembula ubunqunu bakhe.

²⁰Ungalali lomkamakhelwane wakho ukungcola ngaye.

²¹Unganiki okwenzalo yakho ukuthi ukudabulisele kuMoleki; ungangcolisi ibizo likaNkulunkulu wakho. Ngiyi Nkosi.

²²Ungalali lowesilisa njengokulala lowesifazana; kuyisinengiso.

²³Ungalali laloba yiyiphi inyamazana ukungcola ngayo; futhi owesifazana angemi phambi kwenyamazana ukulala layo; kuyingxube.

²⁴Lingazingcolisi langenye yalezizinto, ngoba ngazo zonke lezizinto izizwe ziyangcoliswa engizixotsha phambi kwenu.

²⁵Ngalokho ilizwe lingcolile; ngakho ngiphindisela ububi balo phezu kwalo, lelizwe liyabahlanza abahlali balo.

²⁶Ngakho lina lizagcina izimiso zami lezehlulelo zami, lingenzi okwazo zonke lezizinengiso; owokuzalwa elizweni loba owemzini ohlala njengowezizwe phakathi kwenu.

²⁷Ngoba zonke lezizinengiso bazenza abantu balelolizwe ababekhona ngaphambi kwenu, ngakho ilizwe langcola.

²⁸Ukuze ilizwe lingalihlanzi lapho lilingcolisa, njengalokhu lahlanza isizwe esasikhona ngaphambi kwenu.

²⁹Ngoba wonke owenza okwalezizinengiso, imiphefumulo ekwenzayo izaqunywa isuke ebantwini bayo.

³⁰Ngakho lizagcina umlayo wami, ukuze lingenzi okwalezozimiso eziyisinengiso ezenziwa ngaphambi kwenu, ukuthi lingazingcolisi ngazo. Ngiyi Nkosi uNkulunkulu wenu.