Read Ndebele-IBhayibhili Elingcwele 2006 Ulevitikusi 21 Bible Online

Ulevitikusi 21 - Ndebele-IBhayibhili Elingcwele 2006 bible

Ulevitikusi 21

¹I Nkosi yasisithi kuMozisi: Tshono kubapristi, amadodana kaAroni, uthi kubo: Kakungabi khona ozingcolisayo ngofileyo phakathi kwabantu bakibo,

²ngaphandle kwesihlobo sakhe, esiseduze laye, ngonina, langoyise, langendodana yakhe, langendodakazi yakhe, langomfowabo,

³langodadewabo intombi emsulwa, eseduze laye, engazange ibe ngeyendoda; angazingcolisa ngayo.

⁴Kayikuzingcolisa, eyisikhulu phakathi kwabantu bakibo, ukuzingcolisa.

⁵Kabayikwenza impabanga ekhanda labo, bangageli igumbi lodevu lwabo, bangacabi inhlanga enyameni yabo.

⁶Bazakuba ngcwele kuNkulunkulu wabo, bangangcolisi ibizo likaNkulunkulu wabo. Ngoba banikela iminikelo ye Nkosi eyenziwe ngomlilo, ukudla kukaNkulunkulu wabo. Ngakho bazakuba ngcwele.

⁷Kabayikuthatha owesifazana oyisifebe kumbe ongcolileyo, njalo kabayikuthatha owesifazana olahlwe yindoda yakhe; ngoba ungcwele kuNkulunkulu wakhe.

⁸Ngakho uzamngcwelisa, ngoba unikela ukudla kukaNkulunkulu wakho. Uzakuba ngcwele kuwe, ngoba mina Nkosi elingcwelisayo ngingcwele.

⁹Lendodakazi yaloba nguwuphi umpristi, uba izingcolisa ngokuphinga, iyamngcolisa uyise; izatshiswa ngomlilo.

¹⁰Lompristi omkhulu phakathi kwabafowabo, okuthelwe ekhanda lakhe amafutha okugcoba, lowehlukaniselwa ukuthi embathe izembatho, kayikuvumela ukuthi ikhanda lakhe lembulwe, angadabuli izembatho zakhe;

¹¹angayi lakusiphi isidumbu, angazingcolisi ngoyise loba ngonina;

¹²angaphumi endlini engcwele, angangcolisi indlu engcwele kaNkulunkulu wakhe, ngoba umqhele wamafutha okugcoba kaNkulunkulu wakhe uphezu kwakhe. Ngiyi Nkosi.

¹³Njalo yena uzathatha umfazi ebuntombini bakhe.

¹⁴Umfelokazi, kumbe olahliweyo, loba isifebe esingcolisiweyo, laba kangabathathi. Kodwa uzathatha intombi emsulwa ebantwini bakibo ibe ngumka khe,

¹⁵njalo angangcolisi inzalo yakhe phakathi kwabantu bakibo. Ngoba ngiyi Nkosi emngcwelisayo.

¹⁶INkosi yasikhuluma kuMozisi isithi:

¹⁷Khuluma kuAroni usithi: Loba ngubani owenzalo yakho ezizukulwaneni zabo okulesici kuye kangasondeli ukunikela ukudla kukaNkulunkulu wakhe.

¹⁸Ngoba loba nguwuphi umuntu okulesici kuye angasondeli, umuntu oyisiphofu, kumbe oyisiqhuli, kumbe olimele ebusweni, kumbe olesitho eselulekileyo,

¹⁹kumbe umuntu okulokwephuka konyawo kuye, kumbe ukwephuka kwesandla,

²⁰kumbe olesifumbu, kumbe ongumuthwa, kumbe olomntwana elihlweni lakhe, kumbe olentembuzane, kumbe oloqweqwe olulumayo, loba ochotshozwe emasendeni.

²¹Kakulamuntu owenzalo kaAroni umpristi okukuye isici ozasondela ukunikela iminikelo ye Nkosi eyenziwe ngomlilo; kulesici kuye, angasondeli ukunikela ukudla kukaNkulunkulu wakhe.

²²Angadla ukudla kukaNkulunkulu wakhe, ezintweni ezingcwelengcwele lezintweni ezingcwele,

²³kodwa angezi kulo iveyili, angasondeli elathini, ngoba kulesici kuye, ukuze angangcolisi izindlu zami ezingcwele. Ngoba ngiyi Nkosi ebangcwelisayo.

²⁴UMozisi wasekhuluma lokho kuAroni, lakumadodana akhe, lakubo bonke abantwana bakoIsrayeli.