Read Ndebele-IBhayibhili Elingcwele 2006 Ulevitikusi 24 Bible Online

Ulevitikusi 24 - Ndebele-IBhayibhili Elingcwele 2006 bible

Ulevitikusi 24

¹I Nkosi yasikhuluma kuMozisi isithi:

²Laya abantwana bakoIsrayeli ukuthi balethe kuwe amafutha emihlwathi acengekileyo agigelwe ukukhanyisa ukuze izibane zivuthe njalonjalo.

³Ngaphandle kweveyili lobufakazi, ethenteni lenhlangano, uAroni uzazilungisa phambi kwe Nkosi njalonjalo, kusukela kusihlwa kuze kube sekuseni; kuzakuba yisimiso esilaphakade ezizukulwaneni zenu.

⁴Uzalungisa izibane eluthini lwesibane olucwengekileyo phambi kwe Nkosi njalonjalo.

⁵Uzathatha-ke impuphu ecolekileyo, ubhake ngayo amaqebelengwana alitshumi lambili; ingxenye ezimbili etshumini kuzakuba liqebelengwana elilodwa.

⁶Uwabeke emizileni emibili, ayisithupha emzileni, phezu kwetafula elicwengekileyo phambi kwe Nkosi;

⁷futhi ubeke ku lowo lalowo umzila inhlaka ecengekileyo, ibe yisinkwa sesikhumbuzo, umnikelo owenzelwe i Nkosi ngomlilo.

⁸Ngalo lonke usuku lwesabatha uzakulungisa phambi kwe Nkosi njalonjalo, kuvela ebantwaneni bakoIsrayeli, isivumelwano esilaphakade.

⁹Njalo kuzakuba ngokukaAroni lokwamadodana akhe, besebekudlela endaweni engcwele; ngoba kuyingcwelengcwele kuye, okuvela eminikelweni ye Nkosi eyenziwe ngomlilo, isimiso esilaphakade.

¹⁰Kwasekuphuma indodana yowesifazana umIsrayelikazi, owayeyindodana yendoda engumGibhithe, phakathi kwabantwana bakoIsrayeli. Lalindodana yomIsrayelikazi lendoda engumIsrayeli balwa enkambeni.

¹¹Indodana yowesifazana umIsrayelikazi yasihlambaza iBizo, yathuka. Basebemletha kuMozisi. Lebizo likanina lalinguShelomithi, indodakazi kaDibiri, owesizwe sakoDani.

¹²Basebemfaka esitokosini, ukuze bachasiselwe ngokomlomo we Nkosi.

¹³I Nkosi yasikhuluma kuMozisi yathi:

¹⁴Khiphela ngaphandle kwenkamba umthuki; labo bonke abamuzwayo kababeke izandla zabo ekhanda lakhe, lenhlangano yonke imkhande ngamatshe.

¹⁵Khuluma-ke ebantwaneni bakoIsrayeli uthi: Ngulowo lalowo othuka uNkulunkulu wakhe uzathwala isono sakhe.

¹⁶Lohlambaza ibizo le Nkosi uzabulawa lokubulawa; inhlangano yonke izamkhanda lokumkhanda ngamatshe. Njengowokuzalwa elizweni uzakuba njalo owemzini, nxa ehlambaza iBizo uzabulawa.

¹⁷Lomuntu nxa etshaya loba yiwuphi umphefumulo womuntu uzabulawa lokubulawa.

¹⁸Lotshaya abulale inyamazana uzayihlawula, impilo ngempilo.

¹⁹Umuntu nxa esipha-ke umakhelwane wakhe isici, njengokwenza kwakhe kuzakwenziwa njalo kuye,

²⁰ukwephuka ngokwephuka, ilihlo ngelihlo, izinyo ngezinyo; njengalokho ephe umuntu isici, kuzakwenziwa njalo kuye.

²¹Lotshaya inyamazana ife uzayihlawula; lotshaya umuntu afe uzabulawa.

²²Lizakuba lokwahlulela okukodwa, njengowezizwe uzakuba njalo owokuzalwa elizweni. Ngoba ngiyi Nkosi uNkulunkulu wenu.

²³UMozisi wakhuluma-ke ebantwaneni bakoIsrayeli, ukuthi bamkhuphele ngaphandle kwenkamba umthuki, bamkhande ngamatshe. Abantwana bakoIsrayeli basebesenza njengokulaya kwe Nkosi kuMozisi.