Read Ndebele-IBhayibhili Elingcwele 2006 Ulevitikusi 25 Bible Online

Ulevitikusi 25 - Ndebele-IBhayibhili Elingcwele 2006 bible

Ulevitikusi 25

¹I Nkosi yasikhuluma kuMozisi entabeni yeSinayi isithi:

²Tshono ebantwaneni bakoIsrayeli uthi kubo: Nxa lifika elizweni engilinika lona, ilizwe lizaphumula, isabatha e Nkosi ni.

³Iminyaka eyisithupha uzahlanyela insimu yakho, leminyaka eyisithupha uthene isivini sakho, ubuthe isithelo saso.

⁴Kodwa ngomnyaka wesikhombisa kuzakuba lesabatha lokuphumula kwelizwe, isabatha e Nkosi ni. Kawuyikuhlanyela insimu yakho, ungatheni isivini sakho.

⁵Kawuyikuvuna umkhukhuzela wesivuno sakho, kaliyikukha izithelo zamavini akho angathenwanga. Uzakuba ngumnyaka wokuphumula welizwe.

⁶Njalo isabatha lelizwe lizakuba yikudla kwenu, ngokwakho, lokwenceku yakho, lokwencekukazi yakho, lokoqatshiweyo wakho, lokowemzini wakho ohlala lawe njengowezizwe,

⁷lokwezifuyo zakho, lokwenyamazana eziselizweni lakho; konke elikuthelayo kuzakuba yikudla.

⁸Uzazibalela-ke amaviki ayisikhombisa eminyaka, iminyaka eyisikhombisa ephindwe kasikhombisa, ukuze insuku zamaviki ayisikhombisa eminyaka zibe yiminyaka engamatshumi amane lesificamunwemunye kuwe.

⁹Khona uzadlulisa uphondo lomsindo enyangeni yesikhombisa ngolwetshumi lwenyanga; ngosuku lwenhlawulo yokuthula lizadlulisa umsindo wophondo elizweni lonke lakini.

¹⁰Njalo lizangcwelisa lumnyaka wamatshumi amahlanu, limemezele inkululeko elizweni kubo bonke abakhileyo balo. Kuzakuba lijubili* kini; lizabuyela, ngulowo lalowo, elifeni lakhe; futhi lizabuyela, ngulowo lalowo, kusapho lwakhe.

¹¹Umnyaka wamatshumi amahlanu uzakuba ngumnyaka wejubili kini; lingahlanyeli, lingavuni umkhukhuzela wawo, lingakhi ngawo izinto zamavini angathenwanga.

¹²Ngoba ulijubili, uzakuba ngcwele kini; lizakudla ensimini okuthelwayo kwayo.

¹³Ngomnyaka walelijubili lizabuyela, ngulowo lalowo elifeni lakhe.

¹⁴Uba-ke uthengisa ulutho kumakhelwane wakho loba uthenga esandleni sikamakhelwane wakho, lingacindezelani.

¹⁵Ngokwenani leminyaka emva kwejubili uzathenga kumakhelwane wakho; ngokwenani leminyaka yokuthelwayo uzakuthengisela.

¹⁶Ngobunengi beminyaka uzakwandisa intengo yakho; njalo ngobulutshwana beminyaka uzanciphisa intengo yakho; ngoba ekuthengisela inani lezivuno.

¹⁷Ngakho lingacindezelani, kodwa wesabe uNkulunkulu wakho. Ngoba ngiyi Nkosi uNkulunkulu wenu.

¹⁸Ngakho yenzani izimiso zami, ligcine izehlulelo zami, lizenze, ukuze lihlale elizweni livikelekile.

¹⁹Lelizwe lizathela izithelo zalo, lidle lize lisuthe, lihlale kulo livikelekile.

²⁰Uba-ke lisithi: Sizakudlani ngomnyaka wesikhombisa? Khangela, kasihlanyeli, kasibuthi isivuno sethu.

²¹Khona ngizalaya isibusiso sami kini ngomnyaka wesithupha, ukuze uthele isivuno seminyaka emithathu.

²²Njalo lizahlanyela ngomnyaka wesificaminwembili lidle okwesivuno esidala kuze kufike umnyaka wesificamunwemunye; kuze kufike isivuno sawo lizakudla esidala.

²³Lelizwe kaliyikuthengiswa lanininini, ngoba ilizwe ngelami; ngoba lingabemzini labahlala njengabezizwe lami.

²⁴Lelizweni lonke lelifa lenu lizavumela uhlengo lwelizwe.

²⁵Uba umfowenu esiba ngumyanga, athengise okwelifa lakhe, umhlengi wakhe uzafika, isihlobo sakhe, ahlenge lokho umfowabo akuthengisileyo.

²⁶Njalo umuntu, uba engelaye umhlengi, kodwa isandla sakhe sifinyelele, athole okwenele uhlengo lwakhe,

²⁷kabale iminyaka yokuthengiswa kwalo, abuyisele okuseleyo kulowomuntu owamthengisela lona, abuyele elifeni lakhe.

²⁸Kodwa uba isandla sakhe singatholanga okwenele ukubuyisela kuye, okuthengisiweyo kuzakuba sesandleni sokuthengileyo kuze kufike umnyaka wejubili; kodwa ngejubili kuzaphuma, njalo uzabuyela elifeni lakhe.

²⁹Umuntu, uba ethengisa-ke indlu yokuhlala emzini olomthangala, ilungelo lohlengo lwayo lizakuba kuze kuphele umnyaka wokuthengiswa kwayo; ilungelo lohlengo lwayo lizakuba ngumnyaka wonke.

³⁰Kodwa uba ingahlengwanga uze umnyaka wayo wonke ugcwale, leyondlu esemzini olomthangala izamiselwa lowo owayithengayo njalonjalo, ezizukulwaneni zakhe; kayiyikuphuma ngejubili.

³¹Kodwa izindlu zemizi engabiyelwanga ngomthangala zizabalwa njengensimu yelizwe; kulohlengo lwayo, njalo izaphuma ngejubili.

³²Mayelana lemizi yamaLevi, izindlu zemizi yelifa lawo, amaLevi azakuba lohlengo lwaphakade.

³³Mayelana lohlenga kumaLevi, kuzaphuma ukuthengiswa kwendlu lokomuzi welifa lakhe ngejubili; ngoba izindlu zemizi yamaLevi ziyilifa lawo phakathi kwabantwana bakoIsrayeli.

³⁴Kodwa insimu yamaphethelo emizi yawo kayiyikuthengiswa, ngoba iyilifa lawo kuze kube nininini.

³⁵Uba-ke umfowenu esiba ngumyanga, lesandla sakhe sixega kuwe, uzamsekela: Owemzini lohlezi njengowezizwe, ukuze aphile lawe.

³⁶Ungathathi kuye umvuzo lenzuzo, kodwa wesabe uNkulunkulu wakho, ukuze umfowenu aphile lawe.

³⁷Ungamuphi imali yakho ngenzalo, futhi ungaphi ukudla kwakho ngenzuzo.

³⁸Ngiyi Nkosi uNkulunkulu wenu owalikhupha elizweni leGibhithe ukulinika ilizwe leKhanani, ukuze ngibe nguNkulunkulu wenu.

³⁹Uba-ke umfowenu olawe esiba ngumyanga, azithengise kuwe, ungamenzi asebenze umsebenzi wesigqili;

⁴⁰uzakuba lawe njengoqatshiweyo, njengohlala njengowezizwe, asebenze kuwe kuze kufike umnyaka wejubili.

⁴¹Khona ezaphuma kuwe, yena labantwana bakhe laye, abuyele kwabomdeni wakhe, abuyele elifeni laboyise.

⁴²Ngoba bayizinceku zami engabakhupha elizweni leGibhithe; kabayikuthengiswa ngokuthengiswa kwesigqili.

⁴³Ungambusi nzima, kodwa wesabe uNkulunkulu wakho.

⁴⁴Lesigqili sakho lesigqilikazi sakho ozakuba lazo, zizavela ezizweni ezilizingelezeleyo; kuzo lizathenga isigqili kumbe isigqilikazi.

⁴⁵Futhi-ke ebantwaneni babahlala njengabemzini abahlala njengabezizwe lani, kubo lingazithenga lakuzizukulwana zabo ezilani, abazizalela elizweni lakini, njalo bazakuba yimfuyo yenu.

⁴⁶Njalo lizazenza abafuyi bazo lisenz ela abantwana benu emva kwenu ukuze badle ilifa lemfuyo; lizabenza basebenze kuze kube nininini. Kodwa phakathi kwabafowenu, abantwana bakoIsrayeli, kaliyikubusa nzima, omunye phezu komunye.

⁴⁷Uba-ke isandla sowezizweni loba sowemzini ohlala lawe sesifinyelele enothweni, lomfowenu olaye abe ngumyanga, azithengise kowemzini, owezizweni ohlala lawe, kumbe kumdeni wesizukulwana sowemzini,

⁴⁸esezithengisile kungaba lokuhlengwa kwakhe; omunye wabafowabo angamhlenga,

⁴⁹loba umfowabo kayise, loba umtanomfowabo kayise angamhlenga, kumbe isihlobo sakhe segazi emdeni wakhe singamhlenga; uba isandla sakhe sesifinyelele enothweni, angazihlenga.

⁵⁰Uzabalisana lowamthengayo, kusukela emnyakeni owazithengisa kuye ngawo kuze kufike umnyaka wejubili; ukuze imali yentengiso yakhe izakuba njengenani leminyaka, njengensuku zoqatshiweyo kuzakuba njalo ngaye.

⁵¹Uba kuseleminyaka eminengi, ngokungayo uzabuyisela uhlengo lwakhe, emalini yokuthengwa kwakhe.

⁵²Uba-ke kusele iminyaka emilutshwana kuze kufike umnyaka wejubili, uzabalisana laye; njengokweminyaka yakhe uzabuyisela uhlengo lwakhe.

⁵³Uzakuba laye njengoqatshiweyo iminyaka ngeminyaka; kayikumbusa nzima phambi kwamehlo akho.

⁵⁴Kodwa uba engahlengwanga ngalokhu, uzaphuma ngomnyaka wejubili, yena labantwana bakhe kanye laye.

⁵⁵Ngoba kimi abantwana bakoIsrayeli bazinceku, bazinceku zami engazikhupha elizweni leGibhithe. Ngiyi Nkosi uNkulunkulu wenu.