Read Ndebele-IBhayibhili Elingcwele 2006 Ulevitikusi 4 Bible Online

Ulevitikusi 4 - Ndebele-IBhayibhili Elingcwele 2006 bible

Ulevitikusi 4

¹I Nkosi yasikhuluma kuMozisi isithi:

²Khuluma ebantwaneni bakoIsrayeli uthi: Uba umphefumulo usona ngokungazi umelana loba yiyiphi imilayo ye Nkosi, engafanele ukwenziwa, wenze okumelene lomunye wayo,

³uba umpristi ogcotshiweyo esona, kube licala ebantwini, uzanikela ngesono sakhe asonileyo ijongosi ithole lenkomo elingelasici, e Nkosi ni, libe ngumnikelo wesono.

⁴Uzaletha ijongosi emnyango wethente lenhlangano phambi kwe Nkosi, abeke isandla sakhe enhlokweni yejongosi, alihlabe ijongosi phambi kwe Nkosi.

⁵Njalo umpristi ogcotshiweyo uzathatha okwegazi lejongosi, alilethe ethenteni lenhlangano.

⁶Umpristi uzagxamuza-ke umunwe wakhe egazini, afafaze okwegazi kasikhombisa phambi kwe Nkosi, phambi kweveyili lendlu engcwele.

⁷Njalo umpristi uzafaka okwegazi empondweni zelathi lempepha elephunga elimnandi phambi kwe Nkosi, elisethenteni lenhlangano, athululele lonke igazi lejongosi phansi kwelathi lomnikelo wokutshiswa, elisemnyango wethente lenhlangano.

⁸Lawo wonke amahwahwa ejongosi lomnikelo wesono uzawasusa kulo, idanga, lawo wonke amahwahwa asemibilini,

⁹lezinso zombili lamahwahwa akuzo asezinkalweni, lamahwahwa angaphezu kwesibindi uzawasusa lezinso,

¹⁰njengalokhu kususwa kiyo inkabi yomhlatshelo weminikelo yokuthula. Umpristi uzakutshisa elathini lomnikelo wokutshiswa.

¹¹Kodwa isikhumba sejongosi, lenyama yalo yonke, lenhloko yalo, lemilenze yalo, lemibilini yalo, lomswane walo,

¹²yebo, ijongosi lonke uzalikhuphela ngaphandle kwenkamba, alise endaweni ehlambulukileyo, lapho okuthululelwa khona umlotha, alitshise phezu kwenkuni ngomlilo. Lizatshiselwa lapho okuthululelwa khona umlotha.

¹³Uba-ke inhlangano yonke yakoIsrayeli isona ngokungazi, lendaba ifihlwe emehlweni ebandla, benze ulutho olumelene loba yiwuphi wemilayo ye Nkosi, okungafanele ukwenziwa, njalo babe lecala,

¹⁴lapho isono abasone bemelene lawo sesisaziwa, ibandla lizanikela ijongosi ithole lenkomo, libe ngumnikelo wesono, lililethe phambi kwethente lenhlangano.

¹⁵Njalo abadala benhlangano bazabeka izandla zabo enhlokweni yejongosi phambi kwe Nkosi, lejongosi lizahlatshwa phambi kwe Nkosi.

¹⁶Umpristi ogcotshiweyo uzaletha-ke okwegazi lejongosi ethenteni lenhlangano,

¹⁷lompristi uzagxamuza umunwe wakhe egazini, afafaze kasikhombisa phambi kwe Nkosi, phambi kweveyili,

¹⁸afake okwegazi empondweni zelathi eliphambi kwe Nkosi, elisethenteni lenhlangano, athululele lonke igazi phansi kwelathi lomnikelo wokutshiswa, elisemnyango wethente lenhlangano.

¹⁹Uzathatha-ke kilo wonke amahwahwa alo, awatshise elathini.

²⁰Enze kulo ijongosi, njengakwenze kulo ijongosi lomnikelo wesono, enze njalo kulo. Umpristi abenzele inhlawulo yokuthula, njalo bazathethelelwa.

²¹Njalo uzalikhuphela ijongosi ngaphandle kwenkamba, alitshise njengalokho walitshisa ijongosi lokuqala; kungumnikelo wesono webandla.

²²Nxa induna isona, yenza ngokungazi okumelene loba yiwuphi wemilayo ye Nkosi uNkulunkulu wayo, okungafanele ukwenziwa, njalo ibe lecala,

²³kumbe isono sayo esone imelene lawo sisaziswa kuyo, izaletha umnikelo wayo, izinyane lembuzi, iduna elingelasici,

²⁴ibeke isandla sayo enhlokweni yembuzi, iyihlabe endaweni lapho okuhlatshelwa khona umnikelo wokutshiswa phambi kwe Nkosi; kungumnikelo wesono.

²⁵Umpristi abesethatha okwegazi lomnikelo wesono ngomunwe wakhe, alifake empondweni zelathi lomnikelo wokutshiswa, athululele igazi lawo phansi kwelathi lomnikelo wokutshiswa.

²⁶Lawo wonke amahwahwa awo uzawatshisa elathini njengamahwahwa omhlatshelo weminikelo yokuthula. Ngalokho umpristi uzayenzela inhlawulo yokuthula ngesono sayo, njalo ithethelelwe.

²⁷Uba-ke loba ngubani wabantu belizwe esona ngokungazi, ngoba esenza okumelene loba yiwuphi wemilayo ye Nkosi, okungafanele ukwenziwa, aze abe lecala,

²⁸kumbe isono sakhe asonileyo sisaziswa kuye, uzaletha umnikelo wakhe, izinyane lembuzi, isibhuzikazi esingelasici, ngesono sakhe asonileyo.

²⁹Uzabeka-ke isandla sakhe enhlokweni yomnikelo wesono, awuhlabe umnikelo wesono endaweni yomnikelo wokutshiswa.

³⁰Njalo umpristi uzathatha okwegazi lawo ngomunwe wakhe, alifake empondweni zelathi lomnikelo wokutshiswa, athululele lonke igazi lawo phansi kwelathi.

³¹Lawo wonke amahwahwa awo uzawasusa, njengalokhu amahwahwa esuswa kuwo umhlatshelo weminikelo yokuthula, lompristi awatshise elathini abe liphunga elimnandi e Nkosi ni. Ngalokho umpristi uzamenzela inhlawulo yokuthula, abesethethelelwa.

³²Kodwa uba eletha iwundlu lomnikelo wakhe libe ngumnikelo wesono, uzaletha elisikazi elingelasici,

³³abeke isandla sakhe enhlokweni yomnikelo wesono, awuhlabe ube ngumnikelo wesono, endaweni lapho okuhlatshelwa khona umnikelo wokutshiswa.

³⁴Njalo umpristi uzathatha okwegazi lomnikelo wesono ngomunwe wakhe, alifake empondweni zelathi lomnikelo wokutshiswa, athululele lonke igazi lawo phansi kwelathi.

³⁵Lawo wonke amahwahwa awo uzawasusa njengalokhu amahwahwa ewundlu esuswa kuwo umhlatshelo weminikelo yokuthula, lompristi awatshise elathini phezu kweminikelo ye Nkosi eyenziwe ngomlilo. Ngalokho umpristi uzamenzela inhlawulo yokuthula ngesono sakhe asonileyo, njalo uzathethelelwa.