Read Ndebele-IBhayibhili Elingcwele 2006 Ulevitikusi 8 Bible Online

Ulevitikusi 8 - Ndebele-IBhayibhili Elingcwele 2006 bible

Ulevitikusi 8

¹I Nkosi yasikhuluma kuMozisi isithi:

²Thatha uAroni lamadodana akhe kanye laye, lezembatho, lamafutha okugcoba, lejongosi lomnikelo wesono, lenqama ezimbili, lesitsha sezinkwa ezingelamvubelo,

³ubuthanise inhlangano yonke emnyango wethente lenhlangano.

⁴UMozisi wasesenza njengokulaya kwe Nkosi kuye, lenhlangano yabuthana emnyango wethente lenhlangano.

⁵UMozisi wasesithi enhlanganweni: Yiyo le into i Nkosi elaye ukuthi yenziwe.

⁶UMozisi wasesondeza uAroni lamadodana akhe, wabagezisa ngamanzi.

⁷Wasemgqokisa isigqoko, wambopha ngebhanti, wamgqokisa ibhatshi, wamfaka i-efodi*, wambopha ngebhanti le-efodi elelukwe ngobungcitshi, wa li bophela kuye ngalo.

⁸Wamgqokisa isembatho sesifuba, wabeka esembathweni sesifuba iUrimi leThumimi.

⁹Wamthwalisa iqhiye ekhanda lakhe; wabeka phezu kweqhiye, ngaphambi kobuso bayo, incence yegolide, umqhele wobungcwele, njengalokhu i Nkosi yayimlayile uMozisi.

¹⁰UMozisi wasethatha amafutha okugcoba, waligcoba ithabhanekele lakho konke okuphakathi kwalo, wakungcwelisa.

¹¹Wafafaza ngawo phezu kwelathi kasikhombisa, wagcoba ilathi lezitsha zalo zonke, lenditshi yokugezela lonyawo lwayo, ukukungcwelisa.

¹²Wathela okwamafutha okugcoba ekhanda likaAroni, wamgcoba, ukumngcwelisa.

¹³UMozisi wasesondeza amadodana kaAroni, wawagqokisa izigqoko, wawabopha ngamabhanti, wawathwalisa izingowane, njengalokhu i Nkosi yayimlayile uMozisi.

¹⁴Wasesondeza ijongosi lomnikelo wesono; uAroni lamadodana akhe basebebeka izandla zabo enhlokweni yejongosi lomnikelo wesono.

¹⁵Waselihlaba, uMozisi wasethatha igazi, walifaka ngomunwe wakhe empondweni zelathi inhlangothi zonke, wahlambulula ilathi, wathululela igazi phansi kwelathi, walingcwelisa ukulenzela inhlawulo yokuthula.

¹⁶Wathatha idanga lonke, lamahwahwa esibindi, lezinso zombili lamahwahwa azo, uMozisi wakutshisa elathini.

¹⁷Kodwa ijongosi, lesikhumba salo, lenyama yalo, lomswane walo wakutshisa ngomlilo ngaphandle kwenkamba, njengalokhu i Nkosi yayimlayile uMozisi.

¹⁸Wasesondeza inqama yomnikelo wokutshiswa; uAroni lamadodana akhe basebebeka izandla zabo phezu kwenhloko yenqama.

¹⁹Waseyihlaba, uMozisi wafafaza igazi phezu kwelathi inhlangothi zonke.

²⁰Waseyisika inqama ngeziqa zayo, uMozisi watshisa inhloko lezitho lamahwahwa.

²¹Wagezisa imibilini lemilenze ngamanzi, uMozisi watshisa inqama yonke elathini, kungumnikelo wokutshiswa oloqhatshi olumnandi, kungumnikelo owenzelwe i Nkosi ngomlilo, njengalokho i Nkosi yayimlayile uMozisi.

²²Wasesondeza enye inqama, inqama yokwehlukaniswa; uAroni lamadodana akhe basebebeka izandla zabo phezu kwenhloko yenqama.

²³Waseyihlaba, uMozisi wathatha okwegazi layo, walifaka eqwangeni lwendlebe yokunene kaAroni, lesithupheni sesandla sakhe sokunene, lezwaneni olukhulu lonyawo lwakhe lokunene.

²⁴Wasesondeza amadodana kaAroni, uMozisi wafaka okwegazi eqwangeni lwendlebe yawo yokunene, lesithupheni sesandla sawo sokunene, lezwaneni olukhulu lonyawo lwawo lokunene; uMozisi wasefafaza igazi phezu kwelathi inhlangothi zonke.

²⁵Wasethatha amahwahwa, lomsila ononileyo, ledanga lonke, lamahwahwa esibindi, lezinso zombili lamahwahwa azo, lomlenze wokunene,

²⁶wakhupha esitsheni sezinkwa ezingelamvubelo esasiphambi kwe Nkosi iqebelengwana laba linye elingelamvubelo, leqebelengwana elilodwa lesinkwa esilamafutha, lesinkwana esisodwa esiyisipatalala, wakubeka phezu kwamahwahwa laphezu komlenze wokunene;

²⁷wakubeka konke ezandleni zikaAroni lezandleni zamadodana akhe, wakuzunguza kwaba ngumnikelo wokuzunguzwa phambi kwe Nkosi.

²⁸UMozisi wasekuthatha ezandleni zabo, wakutshisa elathini phezu komnikelo wokutshiswa, kwaba yikwehlukaniswa okoqhatshi olumnandi, kungumnikelo owenzelwe i Nkosi ngomlilo.

²⁹UMozisi wasethatha isifuba, wasizunguza saba ngumnikelo wokuzunguzwa phambi kwe Nkosi; saba yisabelo sikaMozisi senqama yokwehlukaniswa, njengalokho i Nkosi yayimlayile uMozisi.

³⁰UMozisi wasethatha okwamafutha okugcoba lokwegazi okwakuphezu kwelathi, wakufafaza phezu kukaAroni, phezu kwezembatho zakhe, laphezu kwamadodana akhe, laphezu kwezembatho zamadodana akhe kanye laye. Wamngcwelisa uAroni, izembatho zakhe, lamadodana akhe, lezembatho zamadodana akhe kanye laye.

³¹UMozisi wasesithi kuAroni lemadodaneni akhe: Phekani inyama emnyango wethente lenhlangano, liyidle lapho lezinkwa ezisesitsheni sokwehlukaniswa, njengokulaya kwami ngisithi: UAroni lamadodana akhe bazakudla.

³²Lokuseleyo kwenyama lokwezinkwa lizakutshisa ngomlilo.

³³Njalo kaliyikuphuma ngomnyango wethente lenhlangano, insuku eziyisikhombisa, kuze kufike usuku okuzagcwaliswa ngalo insuku zokwehlukaniswa kwenu, ngoba uzalehlukanisa okwensuku eziyisikhombisa.

³⁴Njengoba enzile lamuhla i Nkosi ilayile ukukwenza, ukulenzela inhlawulo yokuthula.

³⁵Ngakho lizahlala emnyango wethen te lenhlangano insuku eziyisikhombisa, imini lebusuku, ligcine imfanelo ye Nkosi ukuze lingafi; ngoba ngilaywe njalo.

³⁶UAroni lamadodana akhe basebesenza izinto zonke i Nkosi eyazilayayo ngesandla sikaMozisi.