Read Ndebele-IBhayibhili Elingcwele 2006 Ulevitikusi 9 Bible Online

Ulevitikusi 9 - Ndebele-IBhayibhili Elingcwele 2006 bible

Ulevitikusi 9

¹Kwasekusithi ngosuku lwesificaminwembili uMozisi wabiza oAroni lamadodana akhe labadala bakoIsrayeli.

²Wathi kuAroni: Zithathele ithole, inkonyana yenkomo, libe ngumnikelo wesono, lenqama ibe ngumnikelo wokutshiswa, okungelasici, ukusondeze e Nkosi ni.

³Lebantwaneni bakoIsrayeli uzakhuluma uthi: Thathani izinyane lembuzi libe ngumnikelo wesono, lethole, lewundlu, abe lomnyaka owodwa, angelasici, abe ngumnikelo wokutshiswa,

⁴lenkabi lenqama zibe yiminikelo yokuthula, zihlatshwe phambi kwe Nkosi, lomnikelo wokudla oxubene lamafutha; ngoba lamuhla i Nkosi izabonakala kini.

⁵Basebethatha lokho uMozisi akulayayo bakuletha phambi kwethente lenhlangano; lenhlangano yonke yasondela, yema phambi kwe Nkosi.

⁶UMozisi wasesithi: Le into i Nkosi elilaye ngayo lizayenza; lenkazimulo ye Nkosi izabonakala kini.

⁷UMozisi wasesithi kuAroni: Sondela elathini, wenze umnikelo wakho wesono lomnikelo wakho wokutshiswa, uzenzele wena inhlawulo yokuthula lokwabantu; ubususenza umnikelo wabantu, ubenzele inhlawulo yokuthula, njengokulaya kwe Nkosi.

⁸UAroni wasesondela elathini, walihlaba ithole lomnikelo wesono owawungowakhe.

⁹Amadodana kaAroni aseletha igazi kuye, wasegxamuza umunwe wakhe egazini, walifaka phezu kwempondo zelathi, legazi walithululela phansi kwelathi;

¹⁰kodwa amahwahwa, lezinso, lamahwahwa esibindi omnikelo wesono wakutshisa elathini, njengalokho i Nkosi imlayile uMozisi.

¹¹Kodwa inyama lesikhumba wakutshisa ngomlilo ngaphandle kwenkamba.

¹²Wasehlaba umnikelo wokutshiswa; lamadodana kaAroni amnika igazi, waselifafaza phezu kwelathi inhlangothi zonke.

¹³Amnika lomnikelo wokutshiswa ngezitho zawo lenhloko; wasekutshisa phezu kwelathi.

¹⁴Wagezisa imibilini lemilenze, wayitshisa phezu komnikelo wokutshiswa elathini.

¹⁵Wasesondeza umnikelo wabantu, wathatha impongo yomnikelo wesono eyayingeyabantu, wayihlaba, wayinikela yaba ngumnikelo wesono, njengowokuqala.

¹⁶Wasondeza umnikelo wokutshiswa, wawulungisa njengokwesimiso.

¹⁷Wasondeza umnikelo wokudla, wagcwalisa isandla sakhe ngokwawo, wakutshisa phezu kwelathi, ngaphandle komnikelo wokutshiswa wekuseni.

¹⁸Wahlaba inkabi lenqama zibe ngumhlatshelo weminikelo yokuthula owawungowabantu; lamadodana kaAroni amnika igazi, owalifafaza phezu kwelathi inhlangothi zonke.

¹⁹Lamahwahwa enkabi lawenqama, umsila ononileyo, le danga elisibekelayo, lezinso, lamahwahwa esibindi,

²⁰asebeka amahwahwa phezu kwezifuba; wasetshisa amahwahwa elathini;

²¹kodwa izifuba lomlenze wokunene uAroni wakuzunguza kwaba ngumnikelo wokuzunguzwa phambi kwe Nkosi, njengokulaya kukaMozisi.

²²UAroni wasephakamisela isandla sakhe ebantwini, wababusisa. Wehla ekunikeleni umnikelo wesono lomnikelo wokutshiswa leminikelo yokuthula.

²³UMozisi loAroni basebengena ethenteni lenhlangano; baphuma bababusisa abantu, lenkazimulo ye Nkosi yabonakala kubo bonke abantu.

²⁴Kwasekuphuma umlilo uvela phambi kwe Nkosi, watshisa phezu kwelathi umnikelo wokutshiswa lamahwahwa. Bonke abantu bathi bekubona lokhu bamemeza, bawa ngobuso babo.