Read Ndebele-IBhayibhili Elingcwele 2006 Ujoromiya 10 Bible Online

Ujoromiya 10 - Ndebele-IBhayibhili Elingcwele 2006 bible

Ujoromiya 10

¹Zwanini ilizwi i Nkosi elikhuluma kini, lina ndlu kaIsrayeli.

²I Nkosi ithi: Lingayifundi indlela yabezizwe, lingatshaywa luvalo ngezibonakaliso zamazulu, ngoba bona abezizweni bayazesaba;

³izithombe zabezizwe ziyize. Ngoba kuganyulwa isihlahla ehlathini, sibazwe ngehloka lombazi;

⁴abantu basicecisa ngesiliva langegolide, basibethela ngesando lezipikili ukuze singasuki.

⁵Izithombe zabo zinjengesihlahla selala emasimini, kazikhulumi, futhi ziyathwalwa, ngoba kazihambi; lingazesabi, ngoba kazilamandla okwenza okubi, lokuhle kazilakukwenza.

⁶Kakho onjengawe, Nkosi, ngoba umkhulu, lebizo lakho likhulu kakhulu.

⁷Ngubani ongaze wakwesaba, wena Nkosi yezizwe? Ngoba kukufanele. Ngoba phakathi kwabahlakaniphileyo bonke bezizwe, lakuyo yonke imibuso yabo, kakho onjengawe.

⁸Bonke bayizithutha leziphukuphuku; izithombe zesigodo zingabafundisa ulutho yini?

⁹Isiliva esikhandiweyo sivela eTarshishi, legolide livela eOfiri. Ukwenza izithombe kungumsebenzi wesisebenzi lowezandla zomkhandi, zigqokiswe okuluhlaza okwesibhakabhaka lokuyibubende; konke kungumsebenzi wezingcitshi.

¹⁰Kodwa i Nkosi inguNkulunkulu weqiniso, inguNkulunkulu ophilayo lenkosi yaphakade. Ekuthukutheleni kwayo umhlaba uyazamazama, lezizwe kazilakukumela ukufutheka kwayo.

¹¹Tshono kubo uthi: Onkulunkulu abangenzanga iphezulu lomhlaba bazabhubha emhlabeni langaphansi kwezulu.

¹²Owenza umhlaba ngamandla akhe, omise ilizwe ngenhlakanipho yakhe, langokuqedisisa kwakhe wendlala amazulu.

¹³Lapho ekhupha ilizwi lakhe, amanzi ayahlokoma emazulwini; uyakhupha inkungu emikhawulweni yomhlaba, enze imibane iphazime lapho lisina, akhuphe umoya eziphaleni zakhe.

¹⁴Bonke abantu bayizithutha, kabalalwazi; wonke umkhandi uyangiswa yizithombe zakhe, ngoba izithombe zakhe ezibunjiweyo ziyinkohliso, kazilamphefumulo.

¹⁵Ziyize nje, zingumsebenzi wenkohliso; ngesikhathi sempindiselo yazo ziyabhubha.

¹⁶UNkulunkulu kaJakobe kanjengazo, ngoba nguye owadala zonke izinto, uIsrayeli yisizwe asikhethayo; ubizwa ngokuthi yi Nkosi yamabandla.

¹⁷Qoqa impahla yakho elizweni, wena ovinjezelweyo.

¹⁸Ngoba i Nkosi ithi: Khangela, ngiyabaphosela ngaphandle abakhileyo elizweni ngalesisikhathi; ngizabacindezela baphele nya.

¹⁹Maye mina ngenxa yokulimala kwami! Inxeba lami libi. Kodwa ngathi mina: Lokhu kungumkhuhlane wami engifanele ukuwuthwala.

²⁰lthente lami lidilikile, lentambo zalo zonke ziqamukile; abantwana bami basukile kimi, kabasekho; kakho ongangimisela ithente lami futhi, longalengisa amakhetheni alo.

²¹Abelusi babantu bayiziphukuphuku, kababuzanga e Nkosi ni; ngakho kabaphumelelanga, lemihlambi yabo ihlakazekile.

²²Khangela, kulamahungahunga okuthi kukhona ukuzamazama okukhulu okusuka elizweni lenyakatho, okuzakwenza yonke imizi yakoJuda ibe yinkangala lendawo yamakhanka.

²³Ngiyazi, Nkosi, ukuthi indlela yomuntu kayikho emandleni akhe, umuntu kalamandla ukuqondisa ukuhamba kwakhe.

²⁴Siqondisa, wena Nkosi, kodwa kube ngokufaneleyo, kungabi ngolaka lwakho, hlezi usenze sibe yinto engesilutho.

²⁵Thululela ulaka lwakho phezu kwezizwe ezingakwaziyo, laphezu kwensendo ezingabizi ebizweni lakho; ngoba bamdlile uJakobe, bamdlile bamqeda, bayichitha indawo yakhe yokuhlala.