Read Ndebele-IBhayibhili Elingcwele 2006 Ujoromiya 12 Bible Online

Ujoromiya 12 - Ndebele-IBhayibhili Elingcwele 2006 bible

Ujoromiya 12

¹Ulungile, wena Nkosi, loba ngisola kuwe; kanti ngizabeka ukusola kwami phambi kwakho. Kungani indlela yababi iphumelela? Kungani bephumelela bonke ababi?

²Uyabahlanyela wena, bamile, bakhule, bathele izithelo, bathanda ukukhuluma ngawe, kanti inhliziyo zabo zikhatshana lawe.

³Kodwa, wena Nkosi, uyangazi, uyangibona, uyahlola inhliziyo yami ukuthi injani kuwe. Bakhuphe njengezimvu zokuhlatshwa, ubalungisele usuku lokuhlatshwa.

⁴Koze kube nini ilizwe likhala, lotshani bonke beganga bubuna? Ngenxa yobubi balabo abakhileyo khona inyamazana lenyoni ziyabhubha, ngoba abantu bathi: Kayiyikubona esikwenzayo.

⁵Uba ugijimile labahamba ngenyawo, bakudinisa, uzancintanisana njani lamabhiza? Uba ungaqinanga elizweni elilokuthula, uzakwenza njani emahlathini eJordani?

⁶Ngoba abafowenu kanye lendlu kayihlo labo bakukhohlisile, bakuzingela; ungabathembi, loba bekhuluma amazwi amnandi kuwe.

⁷Ngiyitshiyile indlu yami, ngibalahlile abantu bami; nginikele othandekayo wami ezandleni zezitha zakhe.

⁸Abantu bami kimi sebenjengesilwane ehlathini, bayangibhongela, ngakho ngiyabazonda.

⁹Ilizwe lami linjengenyoni elamabalabala yini? Inyoni ezilesihluku ziyayihlasela inhlangothi zonke yini? Wozani, lina zilo, wozani, lonke ukuze lidle.

¹⁰Abelusi abanengi basichithile isivini sami, basinyathezela phansi isabelo sami, isabelo sami esihle basenza saba yinkangala engelalutho.

¹¹Basenzile saba yinkangala, sichithekile, siyakhala kimi; ilizwe lonke lichithekile, kodwa kakulamuntu ozihlupha ngakho.

¹²Abaphangi bafikile phezu kwawo wonke amadundulu angelalutho asenkangala, ngoba inkemba ye Nkosi iyadla kusukela komunye umngcele welizwe kusiya komunye, kayikho inyama elokuthula.

¹³Bahlanyele ingqoloyi, bavuna ameva, bazidinise ngokusebenza, kodwa kabazuzanga lutho. Bazakuba lenhloni ngezivuno zabo, ngenxa yolaka oluvuthayo lwe Nkosi.

¹⁴I Nkosi ithi mayelana labo bonke omakhelwane ababi abalihlaselayo ilizwe engilinike isizwe sami uIsrayeli ukuthi libe yilizwe labo: Khangela, ngizabasiphuna elizweni labo, ngiyisiphune indlu yakoJuda, ngiyisuse phakathi kwabo.

¹⁵Emva kokubasiphuna kwami, ngizabuya ngibe lesihawu kubo, ngibabuyise futhi kube ngulowo lalowo endaweni yakhe lelizweni lakibo.

¹⁶Kuzakuthi uba bezazifunda kuhle indlela zabantu bami, bafunge ngebizo lami bathi: Kuphila kukaJehova; njengalokho bafundisa abantu bami ukufunga ngoBhali, bazakwakha phakathi kwabantu bami.

¹⁷Kodwa lesosizwe esingalaleliyo ngizasisiphuna isibili, ngisibhubhise, kutsho i Nkosi.