Read Ndebele-IBhayibhili Elingcwele 2006 Ujoromiya 13 Bible Online

Ujoromiya 13 - Ndebele-IBhayibhili Elingcwele 2006 bible

Ujoromiya 13

¹I Nkosi yathi kimi: Hamba uyezithengela ibhanti lelembu elicolekileyo, uzibophe ngalo ekhalweni, ungalifaki emanzini.

²Ngasengithenga ibhanti njengokutsho kwelizwi le Nkosi, ngazibopha ngalo ekhalweni.

³Ilizwi le Nkosi labuya lafika kimi ngokwesibili lathi:

⁴Thatha ibhanti olithengileyo, ozibophe ngalo ekhalweni, usuke uye emfuleni iYufrathi, ulithukuze khona engoxweni yedwala.

⁵Ngasengihamba, ngalithukuza emfuleni iYufrathi njengokutsho kwe Nkosi kimi.

⁶Kwathi emva kwensuku ezinengi, i Nkosi yathi kimi: Suka uye emfuleni iYufrathi, uyethatha khona ibhanti engakutshela ukuthi ulifihle khona.

⁷Ngasengisuka ngaya emfuleni iYufrathi, ngagebha, ngalikhupha ibhanti endaweni lapho engangilifihle khona. Khangela-ke, ibhanti laselonakele, lalingasasizi lutho.

⁸Laselifika kimi ilizwi le Nkosi lisithi:

⁹I Nkosi ithi: Ngalindlela ngizachitha ukuziqhenya kukaJuda lokuziqhenya okukhulu kweJerusalema.

¹⁰Lababantu ababi, abala ukuzwa amazwi ami, belandela inhliziyo zabo ezilenkani, belandela onkulunkulu abanye ukuze babasebenzele babakhonze, bazakuba njengalelibhanti elingasizi lutho.

¹¹Ngoba njengoba ibhanti linamathela ekhalweni lomuntu, ngokunjalo-ke ngenzile ukuthi indlu yonke yakoIsrayeli lendlu yakoJuda zinamathele kimi, kutsho i Nkosi, ukuze babe ngabantu bami, lebizo, lodumo, lokudunyiswa; kodwa kabalalelanga.

¹²Uzakutsho lamazwi kibo uthi: I Nkosi, uNkulunkulu kaIsrayeli, ithi: Zonke imbiza zizagcwaliswa ngewayini. Kodwa bazakuthi kuwe: Uthi kasikwazi yini ukuthi zonke imbiza zizagcwaliswa ngewayini?

¹³Ubususithi kibo: I Nkosi ithi: Khangelani, ngizabadakisa bonke abakhileyo kulelilizwe, ngitsho amakhosi ahlala esihlalweni sobukhosi sikaDavida, labapristi, labaprofethi, kanye labo bonke abakhileyo eJerusalema.

¹⁴Ngizabatshayanisa, oyise lamadodana ndawonye, kutsho i Nkosi. Kangiyikubahawukela, kangiyikubaxolela, ngibe lesihawu sokuthi ngingababulali.

¹⁵Zwanini libeke indlebe, lingaziqhenyi, ngoba i Nkosi isikhulumile.

¹⁶Inikeni i Nkosi udumo, uNkulunkulu wenu, ingakalethi umnyama, lenyawo zenu zingakakhubeki ezintabeni ngoba sekuhlwile, kuthi lisadinga ukukhanya, ikuphendule kube ngumnyama, ikwenze kube ngumnyama onzima.

¹⁷Kodwa lapho lingalaleli, umphefumulo wami uzakhala inyembezi ensitha ngenxa yokuziqhenya kwenu, uzakhala lokukhala, lamehlo ami ehlise inyembezi, ngoba umhlambi we Nkosi uthunjiwe.

¹⁸Tshono enkosini lendlovukazini uthi: Hlalani phansi ngokuzithoba, ngoba umqhele wenu omuhle uwele phansi.

¹⁹Imizi yeningizimu ivaliwe, kakho ongayivula, uJuda wonke uthunjiwe ngokupheleleyo.

²⁰Phakamisani amehlo enu libone labo abavela enyakatho. Ungaphi umhlambi elaliwunikiwe, umhlambi wenu omuhle?

²¹Lizakuthini uba belibekela labo elabenza abangane benu ukuthi babe ngabaphathi benu? Kaliyikwehlelwa yibuhlungu obunjengowesifazana ohelelwayo yini?

²²Uba lisithi enhliziyweni zenu: Lezizinto zehleleleni phezu kwethu? Ngenxa yobukhulu bokona kwenu izidwaba zenu zembuliwe, lehlelwa yikuhlupheka.

²³UmEtiyopiya angasiphendula yini isigogo sakhe, kumbe ingwe ingaphendula amabala ayo? Khona-ke lani lingenza okuhle lina elejwayele ukwenza okubi.

²⁴Ngizalichithachitha njengamakhoba aphetshulwe ngumoya ovela enkangala.

²⁵Lokhu yikho ukuphela kwakho, lesabelo engikukhethele sona, kutsho i Nkosi; ngoba ungikhohliwe, wathemba onkulunkulu bamanga.

²⁶Mina uqobo ngizakwembula izidwaba zakho, kubonakale ubuze bakho.

²⁷Ngibonile amanyala akho, lobufebe bakho, lentokozo yakho ngakho, lendlela zokuphinga kwakho phezu kwamaqaqa egangeni. Maye kuwe, wena Jerusalema! Koze kube nini ungakahlambuluki?