Read Ndebele-IBhayibhili Elingcwele 2006 Ujoromiya 15 Bible Online

Ujoromiya 15 - Ndebele-IBhayibhili Elingcwele 2006 bible

Ujoromiya 15

¹I Nkosi yasisithi kimi: Loba bekumi phambi kwami oMozisi loSamuweli, inhliziyo yami yayingekho kulababantu. Basuse phambi kwami, bahambe!

²Lapho bekubuza besithi: Sizakuya ngaphi? uzakuthi kibo: I Nkosi ithi: Abokufa baya ekufeni, abenkemba baya enkembeni, abendlala baya endlaleni, labokuthunjwa baya ekuthunjweni.

³Ngizabamisela inhlobo ezine zababulali, kutsho i Nkosi, ngitsho inkemba yokubulala, izinja zokubabamba, inyoni zamazulu, lenyamazana zeganga zokubadla lokubabhubhisa.

⁴Ngizabenza ukuthi babe yinto eyesabekayo kuyo yonke imibuso yomhlaba, ngenxa yalokho okwenziwa eJerusalema nguManase indodana kaHezekhiya, inkosi yakoJuda.

⁵Ngubani ozakuhawukela, wena Jerusalema, lozakukhalela? Ngubani ozaphambukela eceleni ukubuza ngempilo yakho?

⁶Wena ungilahlile, kutsho i Nkosi, wabuyela emuva; ngalokho-ke ngikuphakamisele isandla sami, ngakuchitha; sengikhathele ngokuphenduka.

⁷Ngibelile ngesitsha sokwela emizini yelizwe; ngabemuka abantwana, ngababhubhisa abantu bami; ngoba kabaphendukanga endleleni zabo.

⁸Ngandisile abafelokazi baba banengi okwedlula itshebetshebe lolwandle, ngehlisela phezu kwabonina bamajaha umbulali emini; ngenza usizi lokwesaba kwehlela phezu kwabo bengananzeleli.

⁹Owazala abayisikhombisa usekhathele, waqaleka; watshonelwa lilanga kusesemini; waba lenhloni, wayangeka. Abaseleyo ngizabanikela ezitheni zabo ukuze babulawe, kutsho i Nkosi.

¹⁰Maye mina, maye ngomama! Ngoba wangizala ngaba ngumuntu wokuphikisana lokuxabana elizweni lonke. Kangebolekisanga ngalutho, futhi kangebolekanga lutho, kodwa bonke bayangithuka.

¹¹Nkosi, zonke iziqalekiso zakho kazigcwaliseke uba ngingakukhonzanga ngokupheleleyo, ngingazincengelanga kuwe izitha zami ngesikhathi sokuhlupheka kwazo lesosizi lwazo.

¹²Umuntu angayephula insimbi, insimbi evela enyakatho kanye lethusi yini?

¹³Ngizanikela imfuyo yakho lenotho yakho ibe yimpango engabizi mali, ngenxa yezono zakho zonke ezigcwele elizweni lonke lakini.

¹⁴Ngizakwenza ukuthi usebenzele zonke izitha zakho elizweni ongalaziyo, ngoba ekuthukutheleni kwami kuphembeke umlilo ozavutha kuze kube nininini.

¹⁵Uyazi, wena Nkosi; ngikhumbula, ungihambele, ungiphindiselele kwabangihluphayo. Ngoba ulokubekezela, ungangisusi; yazi ukuthi ngenxa yakho ngithwele ukuthukwa.

¹⁶Ekufikeni kwamazwi akho ngawadla. Ngathokoza ngamazwi akho, futhi athokozisa inhliziyo yami; ngoba ngabizwa ngebizo lakho, Nkosi, uNkulunkulu wamabandla.

¹⁷Kangihlalanga emihlanganweni yabazithokozisayo, futhi kangijabulanga; ngahlala ngedwa nje, ngoba isandla sakho sasiphezu kwami, ngoba ungigcwalise ngokuthukuthela.

¹⁸Kungani ubuhlungu bami bungapheli, lamanxeba ami engapholi, elapheke? Uzakuba njengesifula esikhohlisayo kimi, lanjengamanzi angathembekanga yini?

¹⁹Ngakho-ke, kutsho i Nkosi, uba ubuya, ngizakwemukela ungisebenzele. Uba ukhuluma okuhle, ungakhulumi okubi, uzakuba njengomlomo wami. Bazakuza kuwe, kodwa wena kawuyikuya kubo.

²⁰Ngizakwenza ukuthi ube ngumduli wethusi obiyelwe ngomthangala kulababantu; bazakulwa bemelene lawe, kodwa kabayikukwehlula, ngoba ngilawe ukukusiza lokukukhulula, kutsho i Nkosi.

²¹Ngizakukhulula esandleni sababi, ngikwephule ezandleni zabalesihluku.