Read Ndebele-IBhayibhili Elingcwele 2006 Ujoromiya 17 Bible Online

Ujoromiya 17 - Ndebele-IBhayibhili Elingcwele 2006 bible

Ujoromiya 17

¹Isono sakoJuda sibhaliwe ngepheni yensimbi; ngomcijo wendayimana sibhaliwe enhliziyweni yabo lezimpondweni zamalathi abo,

²abantwana babo besakhumbula amalathi abo, lezixuku zabo eziphansi kwazo zonke izihlahla eziluhlaza, lemaqaqeni aphakemeyo,

³laphezu kwezintaba eziselizweni. Imfuyo yenu layo yonke inotho yenu ngizayinikela ibe yimpango yokuhlawulela izono zenu elizweni lonke lakini.

⁴Uzaliyekela ngokwakho ilizwe lakho engakunika lona, ngikwenze ukuthi usebenzele izitha zakho elizweni ongalaziyo, ngoba ekuthukutheleni kwami kuphembeke umlilo ozavutha kuze kube nininini.

⁵I Nkosi ithi: Uqalekisiwe umuntu othemba abantu, owenza inyama ibe yingalo yakhe, olenhliziyo edela i Nkosi.

⁶Unjengesihlahlana enkangala, kayikubona okuhle lokukodwa. Uzahlala endaweni ezomileyo enkangala, elizweni eligcwele itswayi, elingahlalwa muntu.

⁷Ubusisiwe umuntu othemba i Nkosi, othemba lakhe lise Nkosi ni.

⁸Unjengesihlahla esihlanyelwe emanzini, esinabisela impande zaso emfuleni, esingesabi lapho kufika ukutshisa, lemahlamvu aso ahlala eluhlaza; kasethuki lemnyakeni wokubalela kwelanga, ngoba kasiyekeli ukuthela izithelo.

⁹Inhliziyo iyakhohlisa okwedlula izinto zonke, futhi imbi kakhulu. Ngubani ongayazi?

¹⁰Mina Nkosi ngiyahlola ingqondo, ngiyilinge inhliziyo, ukuze nginike wonke umuntu okufanele indlela zakhe, lokufanele izenzo zakhe.

¹¹Njengenkwali efukamela amatsiyane engawazalanga, kunjalo-ke lowomuntu ozuze inotho ngokungalungi; phakathi kwensuku zakhe izamtshiya, abe yisithutha ekucineni.

¹²Indlu yethu engcwele injengesihlalo sobukhosi esilenkazimulo, esabekwa phezulu kusukela ekuqaleni.

¹³Wena Nkosi, olithemba likaIsrayeli, bonke abakudelayo bazayangeka, labakutshiyayo bazaqedwa emhlabeni, ngoba bayidelile i Nkosi engumthombo wamanzi aphilayo.

¹⁴Ngisilisa, wena Nkosi, ngisile; ungikhulule ukuze ngikhululwe; ngoba nguwe engikudumisayo.

¹⁵Khangela, bathi kimi: Lingaphi ilizwi le Nkosi? Kalize phela!

¹⁶Kodwa mina kangikukhuthazanga ukuthi wenze okubi, futhi kangilufisanga usuku lokuhlupheka, lokhu uyakwazi; okwaphuma emlonyeni wami kwakuphambi kwakho.

¹⁷Ungabi ngokwesabekayo kimi, ngoba wena uyisiphephelo sami esukwini olubi.

¹⁸Kabayangeke labo abangizingelayo, kodwa mina kangingayangeki, kabadideke, kodwa mina kangingadideki; behlisele usuku olubi, ubabhubhise ngokupheleleyo.

¹⁹I Nkosi yathi kimi: Hamba uyekuma eSangweni lakoBhenjamini, angena ngalo amakhosi akoJuda, aphuma ngalo futhi, lakuwo wonke amasango eJerusalema,

²⁰uthi: Zwanini ilizwi le Nkosi, lina makhosi akoJuda, lani lonke bakoJuda, labo bonke abakhileyo eJerusalema abangena ngawo lamasango.

²¹I Nkosi ithi: Qaphelani ngenxa yokusila kwenu: Lingathwali umthwalo ngesabatha, lingawungenisi ngamasango eJerusalema.

²²Futhi lingakhuphi umthwalo ezindlini zenu ngesabatha, lingasebenzi lutho; kodwa lwenzeni usuku lwesabatha lube ngcwele, njengokubalaya kwami oyihlo.

²³Kanti kabezwanga, kabalalelanga; baba lenkani kabaze bezwa, belaywa.

²⁴Kodwa uba lina lingilalela, kutsho i Nkosi, lingangenisi umthwalo ngamasango alumuzi ngosuku lwesabatha, kodwa lilenze isabatha libe ngcwele, lingasebenzi ngalo,

²⁵kuzangena ngamasango alumuzi amakhosi ahlala esihlalweni sobukhosi sikaDavida, ekhwele izinqola, egade amabhiza, wona leziphathamandla zawo, labantu bakoJuda, labakhileyo eJerusalema; bahlale kulumuzi kuze kube nininini.

²⁶Abantu bazavela emizini yakoJuda lakuzo zonke indawo ezizingelezele iJerusalema, bavele elizweni lakoBhenjamini, leShefela, lelizweni lamaqaqa, leningizimu, beletha iminikelo yokutshiswa lemihlatshelo, leminikelo yempuphu lenhlaka, leminikelo yokubonga endlini ye Nkosi.

²⁷Kodwa uba lingangilaleli, lingenzi isabatha libe ngcwele, lingena ngamasango eJerusalema ngosuku lwesabatha, lithwele imithwalo, ngizaphemba umlilo emasangweni ayo, ozatshisa uqothule indlu zamakhosi zeJerusalema, ungacitsheki.