Read Ndebele-IBhayibhili Elingcwele 2006 Ujoromiya 18 Bible Online

Ujoromiya 18 - Ndebele-IBhayibhili Elingcwele 2006 bible

Ujoromiya 18

¹Ilizwi le Nkosi elafika kuJeremiya lathi:

²Suka, wehlele endlini yombumbi wembiza, ngizakutshela amazwi ami khona.

³Ngasengisehlela endlini yombumbi wembiza, khangela-ke wenza umsebenzi wakhe ngevili lokubumba.

⁴Imbiza ayeyibumba ngebumba yonakala ezandleni zakhe; waseyidiliza, wenza enye imbiza njengokubona kwakhe.

⁵Laselifika ilizwi le Nkosi kimi lisithi:

⁶Wena ndlu kaIsrayeli, ngingeze ngenza kini lokho okwenziweyo ngumbumbi wembiza yini? kutsho i Nkosi. Khangela, njengebumba esandleni sombumbi wembiza, lani linjalo esandleni sami, lina ndlu kaIsrayeli.

⁷Ngokucwayiza kwelihlo ngizakhuluma ngesizwe langombuso ukuthi ngizakusiphuna, ngikudilize, ngikuchithe,

⁸uba lesosizwe engikhulume ngaso sitshiya ububi baso, ngizazisola ngokubi ebengisithi ngizabenza kiso.

⁹Ngokucwayiza kwelihlo ngizakhuluma ngesizwe langombuso ukuthi ngizakwakha ngikumise.

¹⁰Uba lesosizwe sisenza okubi phambi kwami, singalaleli ilizwi lami, ngizazisola ngokuhle ebengisithi ngizakwenza kiso.

¹¹Ngakho-ke tshono ebantwini bakoJuda lakwabakhileyo eJerusalema ukuthi: I Nkosi ithi: Khangelani, ngilibumbela okubi, ngenza ugobe ngani. Tshiyani ububi benu bonke, lilungise indlela zenu lezenzo zenu.

¹²Kodwa bona bathi: Lokho kakusizi lutho. Sizalandela awethu amacebo, sonke senze ngenkani yenhliziyo zethu ezimbi.

¹³Ngakho-ke i Nkosi ithi: Buzani phakathi kwezizwe, ukuthi ngubani owake wezwa okunjengalokhu? Intombi emsulwa yakoIsrayeli yenzile into eyesabekayo.

¹⁴Iliqhwa elikhithikayo lingazitshiya yini ingqonga zeLebhanoni, lamanzi aqandayo ageleza ezintabeni azakutsha?

¹⁵Kodwa abantu bami bangikhohliwe, batshisela onkulunkulu bamanga impepha; bakhubeka endleleni zabo, emigwaqweni yasendulo, baphambukela ezindledlaneni, kabahambanga ngemigwago;

¹⁶benza ilizwe labo laba ngelesabekayo lento yokuncifelwa kuze kube nininini; bonke abedlula khona bayethuka, banikina amakhanda abo.

¹⁷Njengomoya wempumalanga ngizabachitha phambi kwezitha zabo, ngizabafulathela, bangaboni ubuso bami, ngosuku lokuchitheka kwabo.

¹⁸Basebesithi: Wozani simenzele ugobe uJeremiya; ngoba kuzabe kulokhu kukhona abapristi ukusifundisa, labahlakaniphileyo ukuseluleka, labaprofethi ukutshumayela ilizwi. Wozani simtshaye ngolimi, singananzi wonke amazwi akhe.

¹⁹Ngizwisisa, Nkosi, uzwe lokho izitha zami ezikukhulumayo ngami.

²⁰Okuhle kuyaphindiselwa ngokubi yini? Ngoba bangigebhele umgodi. Khumbula ukuthi ngema phambi kwakho ukubakhulumela okuhle ukuthinta ulaka lwakho kibo.

²¹Ngalokho-ke nikela abantwana babo endlaleni, ubanikele ekubulaweni ngenkemba; abafazi babo balahlekelwe ngabantwana, babe ngabafelokazi, lamadoda abo abulawe ngumkhuhlane, lamajaha abo atshaywe ngenkemba empini.

²²Kakuzwakale ukukhala endlini zabo, lapho bejunywa libutho. Ngoba bengigebhele umgodi ukungibamba, bazithiya ngomjibila inyawo zami.

²³Kanti, wena Nkosi, uyawazi amacebo abo okungibulala. Ungathetheleli ububi babo, lezono zabo ungazicitshi phambi kwakho. Kodwa kabawe phambi kwakho, ubavukele wena ngesikhathi sokuthukuthela kwakho.