Read Ndebele-IBhayibhili Elingcwele 2006 Ujoromiya 19 Bible Online

Ujoromiya 19 - Ndebele-IBhayibhili Elingcwele 2006 bible

Ujoromiya 19

¹I Nkosi yathi: Hamba uyethenga inqayi; uthathe abanye abadala babantu labanye abapristi abadala,

²uye esihotsheni sendodana kaHinomu eSangweni leziNdengezi, utshumayele khona amazwi engikutshela wona.

³Uzakuthi: Zwanini ilizwi le Nkosi, lina makhosi akoJuda labakhileyo eJerusalema. I Nkosi yamabandla, uNkulunkulu kaIsrayeli, ithi: Khangelani, ngizaletha okubi okukhulu kulindawo, kuthi labo bonke abakuzwayo kubabande indlebe.

⁴Ngoba abantu bangitshiyile, bayingcolisa lindawo ngokutshisela kiyo impepha kwabanye onkulunkulu abangabaziyo bona laboyise kanye lamakhosi akoJuda; futhi bayigcwalisa lindawo ngegazi labangelacala,

⁵bakha izindawo eziphakemeyo zikaBhali ukutshisa amadodana abo ngomlilo abe ngumnikelo wokutshiswa kuBhali, into engingabalayanga yona ngayitsho, lengafikanga engqondweni yami.

⁶Ngakho khangela, insuku ziyeza, kutsho i Nkosi, lapho lindawo ingasayikuthiwa yiTofethi, loba isihotsha sendodana kaHinomu, kodwa izathiwa yisiHotsha sokuBulala.

⁷Ngizachitha kulindawo amacebo akoJuda laweJerusalema, ngenze ukuthi abantu babo bawe ngenkemba phambi kwezitha zabo, langesandla salabo ababazingelayo; nginike izidumbu zabo zibe yikudla kwenyoni zamazulu lenyamazana zeganga.

⁸Ngenze lumuzi ube yinto eyesabekayo, into yokuncifelwa; bonke abadlula khona bazatshaqeka, bancife ngenxa yazo zonke inhlupheko zawo.

⁹Ngizabenza badle inyama yamadodana leyamadodakazi abo; bonke bazakudla inyama yabomakhelwane babo ngesikhathi sokuvinjezelwa lesokuhlupheka okuzalethwa yizitha zabo lalabo ababazingelayo.

¹⁰Ubusuyibulala inqayi phambi kwamadoda ohamba lawo;

¹¹ubususithi kibo: I Nkosi yamabandla ithi: Ngokunjalo ngizabulala lababantu lalumuzi, njengalokho umuntu ebulala imbiza yombumbi, ingaphindi ilungiswe futhi. Abantu bazangcwatshelwa eTofethi, ngoba kungasekho enye indawo lapho abangangcwatshelwa khona.

¹²Ngizakwenza njalo kulindawo lakubo abakhileyo kiyo, ngenze lumuzi ufanane leTofethi, kutsho i Nkosi.

¹³Izindlu zeJerusalema lezamakhosi akoJuda, zonke izindlu okwatshiselwa phezu kwazo impepha kuwo amabutho amazulu, okwachithelwa kuzo leminikelo yokunathwayo kwabanye onkulunkulu, zizangcoliswa njengendawo yeTofethi.

¹⁴Wabuya-ke uJeremiya evela eTofethi, lapho i Nkosi eyayimthume ukuprofetha khona, wema egumeni lendlu ye Nkosi, wathi ebantwini bonke:

¹⁵I Nkosi yamabandla, uNkulunkulu kaIsrayeli, ithi: Khangelani, ngizakwehlisela kulumuzi lakuyo yonke imizana yawo konke okubi engikutshiloyo, ngoba balenkani, bala ukuzwa amazwi ami.