Read Ndebele-IBhayibhili Elingcwele 2006 Ujoromiya 2 Bible Online

Ujoromiya 2 - Ndebele-IBhayibhili Elingcwele 2006 bible

Ujoromiya 2

¹Laselifika kimi ilizwi le Nkosi lisithi:

²Hamba uyememezela eJerusalema uthi: I Nkosi ithi: Ngiyakhumbula uthembeko lwakho usemutsha, lothando lwakho usengumakoti, lokungilandela kwakho enkangala, elizweni elingahlanyelwanga.

³UIsrayeli wayengcwele e Nkosi ni, eyizithelo zokuqala zesivuno sayo. Bonke abazidlayo baba lecala, behlelwa ngokubi, kutsho i Nkosi.

⁴Zwanini ilizwi le Nkosi, lina ndlu kaJakobe, lani lonke sendo lwendlu yakoIsrayeli.

⁵I Nkosi ithi: Yibubi bani oyihlo ababuthola kimi ukuze basuke baye khatshana lami, balandele lokho okuyize, babe yize?

⁶Kabatshongo ukuthi: Ingaphi i Nkosi eyasikhupha elizweni leGibhithe, yasikhokhela enkangala, elizweni eliligwadule lelilemigodi, elizweni elomileyo elimnyama kakhulu, elizweni elingahanjwa muntu, lalapho okungahlali muntu khona?

⁷Ngalingenisa elizweni elivundileyo ukuze lidle izithelo zalo lokuhle kwalo. Kodwa lapho selingenile lalingcolisa ilizwe lami, lenza ilizwe engalinika lona laba ngamanyala.

⁸Abapristi kabatshongo ukuthi: Ingaphi i Nkosi? Lalabo abaphatha umlayo kabangazanga. Ababusi baphambuka kimi, labaprofethi baprofetha ngoBhali, balandela izithombe ezingasizi lutho.

⁹Ngakho-ke ngilibeka icala, kutsho i Nkosi, ngizabeka icala labantwana babantwana benu.

¹⁰Hambani liye ezihlengeni zeKuprosi libone, lithume abantu eKedari lihlolisise, libone ukuthi yake yaba khona into enjengale yini?

¹¹Isizwe sake santshintsha onkulunkulu baso, loba bengesibo onkulunkulu balutho yini? Kodwa abantu bami bangintshintshile mina enginguNkulunkulu wabo obalethela udumo ngonkulunkulu ongasizi lutho.

¹²Mangalani ngalokho, lina mazulu, lithuthumele, lidane kakhulu, kutsho i Nkosi.

¹³Ngoba abantu bami benzile izinto ezimbi ezimbili; bangihlamukele, mina mthombo wamanzi aphilayo, bazigebhela imithombo etshayo, engabambi manzi.

¹⁴UIsrayeli uyisigqili, wazalwa eyisigqili yini? Pho, waba yimpango njani?

¹⁵Amabhongo ezilwane asembhongele, zakhonya kakhulu. Zenza ilizwe lakhe laba yinkangala, lemizi yakhe ingamanxiwa, kayiselamuntu.

¹⁶Futhi labantu baseMemfisi leTahafanesi baphucile ikhanda lakho.

¹⁷Wena Israyeli, kawuzehliseli lokhu ngokuhlamuka i Nkosi uNkulunkulu wakho lapho ikukhokhela endleleni yini?

¹⁸Ngakho uzuzani ngokuya eGibhithe, ukuthi unathe amanzi eNile? Futhi uzuzani ngokuya eAsiriya, ukuthi unathe amanzi eYufrathi?

¹⁹Ububi bakho buzakutshaya, lokuhlehlela kwakho emuva kuzakukhuza. Yazi, ubone ukuthi kuyinto embi lebabayo ukuyihlamukela i Nkosi uNkulunkulu wakho, lokuthi ukungesaba kakukho kuwe, kutsho iNkosi uJehova wamabandla.

²⁰Wephula ijogwe lakho endulo, waziqamula izibopho zakho, wathi wena: Kangiyikukukhonza. Kodwa phezu kwalo lonke uqaqa oluphakemeyo, langaphansi kwezihlahla zonke eziluhlaza, walala njengesifebe.

²¹Kukanti mina ngakuhlanyela ulivini elihle, uyinhlanyelo elungileyo kuphela. Pho-ke, usuphenduke njani waba mubi, waba livini elibi?

²²Ngoba uba ugeza ngesoda, usebenzise isepa enengi, ububi bakho busekhona phambi kwami, kutsho iNkosi uJehova.

²³Ungatsho njani ukuthi: Kangingcolanga, kangilandelanga oBhali? Khangela ukuziphatha kwakho esigodini, wazi ukuthi wenzeni. Unjengekamela elisikazi elizulazulayo emzileni yalo,

²⁴lanjengobabhemi weganga owejwayele inkangala, ophembela umoya ekukhanukeni kwakhe. Ngubani ongavimbela inkanuko yakhe? Bonke abamdingayo kabangazikhathazi, bazamthola ngesikhathi sokukhwelwa.

²⁵Ungazidinisi ngokuhambahamba ulandela abanye onkulunkulu, loba uzibulale ngomhawu. Kodwa wena wathi: Hatshi, kangiyekeli, ngoba ngithandile abezizweni, ngizabalandela.

²⁶Njengoba isela lilenhloni lapho selibanjiwe, kunjalo indlu kaIsrayeli izakuba lenhloni, bona kanye lamakhosi abo, leziphathamandla zabo, labapristi babo, labaprofethi babo,

²⁷abathi esihlahleni: Wena ungubaba; abathi lelitsheni: Wena wasizala. Ngoba bangifulathela, kabangikhangelanga. Kodwa ngesikhathi sokuhlupheka kwabo bathi: Vuka, usikhulule!

²⁸Kanti bangaphi onkulunkulu bakho ozenzele bona? Kabavuke bona uba bengakukhulula ngesikhathi sokuhlupheka kwakho; ngoba onkulunkulu bakho banengi njengemizi yakho, wena Juda.

²⁹Lingisolelani? Lingihlamukele lonke, kutsho i Nkosi.

³⁰Kwaba yize ukubatshaya kwami abantwana benu, kabakwemukelanga ukulaywa. Inkemba yenu ibadlile abaprofethi bakho njengesilwane esichithayo.

³¹Wena sizukulwana, lalela ilizwi le Nkosi. Benginjengenkangala kuIsrayeli, lelizwe elilomnyama omkhulu yini? Pho-ke, batsholoni abantu bami ukuthi: Sesikhululekile, kasisayikuza kuwe futhi?

³²Intombi emsulwa ingazikhohlwa yini iziceco zayo lomakoti izembatho zakhe? Kanti abantu bami bangikhohliwe insuku ezingelakubalwa.

³³Uyazi kuhle indlela yokudinga amakhwa, uze wafundisa abesifazana ababi indlela zakho.

³⁴Lezigqokweni zakho kutholakala igazi labayanga abangelacala; kawubatholanga befohlela. Kanti kukho konke lokho uthi:

³⁵Kangilacala; ngakho intukuthelo yakhe isukile kimi. Khangela, ngizakugweba ngoba uthi: Kangonanga.

³⁶Kulula kuwe kangaka ukuntshintsha indlela yakho. Uzayangiswa yiGibhithe, njengoba wayangiswa yiAsiriya.

³⁷Uzaphuma lalapho uthwele imikhono yakho ekhanda, ngoba i Nkosi ibalahlile labo obathembayo, kawuyikuphumelela ngabo.