Read Ndebele-IBhayibhili Elingcwele 2006 Ujoromiya 21 Bible Online

Ujoromiya 21 - Ndebele-IBhayibhili Elingcwele 2006 bible

Ujoromiya 21

¹Yileli ilizwi le Nkosi elafika kuJeremiya mhla inkosi uZedekhiya ethuma kuye uPashuri indodana kaMalikiya, loZefaniya umpristi, indodana kaMahaseya isithi:

²Ake usibuzele e Nkosi ni, ngoba uNebukadinezari inkosi yeBhabhiloni uyasihlasela; mhlawumbe i Nkosi ingasenzela njengazo zonke izimangaliso zayo, imenze asuke kithi.

³UJeremiya wathi kubo:

⁴Lizakuthi kuZedekhiya: I Nkosi, uNkulunkulu kaIsrayeli, ithi: Khangela, ngizabuyisa izikhali zempi oziphetheyo, olwa ngazo umelene lenkosi yeBhabhiloni lamaKhaladiya abakuvimbezeleyo ngaphandle kwemiduli, ngizilethe phakathi kwalumuzi.

⁵Mina uqobo ngizakulwa ngimelene lawe ngesandla esilamandla langengalo elamandla, ngilokuthukuthela lokufutheka lolaka oluvuthayo.

⁶Ngizatshaya abakhileyo balumuzi, abantu lezifuyo; bazabulawa ngomatshayabhuqe wesifo onzima.

⁷Kuthi emva kwalokho, kutsho i Nkosi, nginikele uZedekhiya inkosi yakoJuda, lenceku zakhe, labantu balumuzi abasilileyo kumatshayabhuqe wesifo, lenkembeni, lendlaleni, esandleni sikaNebukadinezari inkosi yeBhabhiloni, lezandleni zezitha zabo, ezandleni zalabo ababazingelayo. Uzabatshaya ngobukhali benkemba; kayikuba lasihawu, kayikubahawukela, kayikuba lamusa kibo.

⁸Kulababantu lizakuthi: I Nkosi ithi: Khangelani, ngibeka phambi kwenu indlela yokuphila lendlela yokufa.

⁹Osala kulumuzi uzabulawa ngenkemba langendlala langomatshayabhuqe wesifo; kodwa ophumayo azinikele kumaKhaladiya alivimbezeleyo uzaphila, aphunyuke lempilo yakhe.

¹⁰Ngoba ngiwukhangele lumuzi ukuze ngiwenzele okubi, ngingawenzeli okuhle, kutsho i Nkosi; uzanikelwa esandleni senkosi yeBhabhiloni ezawutshisa ngomlilo.

¹¹Kuyo indlu yenkosi yakoJuda lithi: Zwana ilizwi le Nkosi,

¹²ndlu kaDavida. I Nkosi ithi: Yenzani okulungileyo ekuseni, likhulule esandleni socindezelayo lowo ophangiweyo, hlezi ulaka lwami luvuthe njengomlilo, lutshise, kungabi khona olucitshayo, ngenxa yezenzo zenu ezimbi.

¹³Khangelani, ngilwa lani, lina abakhileyo esigodini abanjengedwala emagcekeni, kutsho i Nkosi, lina elithi: Ngubani ozasehlela, angene emizini yethu?

¹⁴Ngizalitshaya ngokufanele izenzo zenu, kutsho i Nkosi; ngizaphemba umlilo ehlathini ozatshisa konke okuseduze lalo.