Read Ndebele-IBhayibhili Elingcwele 2006 Ujoromiya 23 Bible Online

Ujoromiya 23 - Ndebele-IBhayibhili Elingcwele 2006 bible

Ujoromiya 23

¹Maye kubo abelusi abachitha behlakaza izimvu zomhlambi wami! kutsho i Nkosi.

²Ngalokho i Nkosi, uNkulunkulu kaIsrayeli, ithi mayelana labelusi abelusa abantu bayo: Liwuhlakazile umhlambi wami, lawuxotsha, kaliwunanzelelanga. Khangelani, ngizakwehlisela phezu kwenu umvuzo wezenzo zenu ezimbi, kutsho i Nkosi.

³Ngizabutha eziseleyo emhlanjini wami kuwo wonke amazwe lapho engizixotshele khona, ngizibuyise futhi esibayeni sazo, zizazala, zande.

⁴Ngizazimisela abelusi abazazilondoloza; kazisayikwesaba, zitshaywe luvalo; futhi kakusayikulahleka leyodwa yazo, kutsho i Nkosi.

⁵Khangela, insuku ziyeza, kutsho i Nkosi, lapho ngizamhlumisela uDavida uGatsha olulungileyo; luzabusa njengeNkosi, lube lokuhlakanipha, lwenze ukulunga lobuqotho elizweni.

⁶Ensukwini zalo uJuda uzasindiswa, loIsrayeli ahlale evikelekile. Njalo leli libizo oluzabizwa ngalo: I Nkosi Ukulunga Kwethu.

⁷Ngakho khangela, insuku ziyeza, kutsho i Nkosi, lapho abantu bengasayikutsho ukuthi: Kuphila kukaJehova owabakhupha abantwana bakoIsrayeli elizweni leGibhithe.

⁸Kodwa bazakuthi: Kuphila kukaJehova owakhupha wakhokhela inzalo yendlu kaIsrayeli elizweni lenyakatho lakuwo wonke amazwe eyayiyixotshele kuwo. Khona izahlala elizweni lakibo.

⁹Ngabaprofethi. Inhliziyo yami yephukile phakathi kwami, lamathambo ami wonke ayathuthumela; nginjengomuntu odakiweyo, lanjengomuntu owehlulwe liwayini, ngenxa ye Nkosi, langenxa yamazwi ayo angcwele.

¹⁰Ngoba ilizwe ligcwele izifebe; ngenxa yesiqalekiso ilizwe liyakhala, lamadlelo enkangala omile. Indlela yabo yimbi, lamandla abo kawalunganga.

¹¹Umprofethi lompristi kabamesabi uNkulunkulu, ngitsho lendlini yami ngithole ububi babo, kutsho i Nkosi.

¹²Ngalokho-ke indlela yabo izakuba njengezindlela ezitshelelayo emnyameni, abazasunduzelwa kizo, bawe; ngoba ngizabalethela okubi ngomnyaka wempindiselo yabo, kutsho i Nkosi.

¹³Kubaprofethi beSamariya ngibone into eyenyanyekayo; baprofetha ngoBhali, baduhisa abantu bami uIsrayeli.

¹⁴Kubaprofethi beJerusalema ngibone okwesabekayo; bayafeba, baqambe amanga, baqinisa izandla zalabo abenza okubi kungasuki muntu ebubini bakhe; bonke sebefanana leSodoma kimi, labakhileyo khona bafanana leGomora.

¹⁵Ngakho i Nkosi yamabandla ithi mayelana labaprofethi: Khangela, ngizabanika ukuze badle umhlonyane, ngibanathise amanzi abulalayo; ngoba kusukela kubaprofethi beJerusalema ububi buphumele elizweni lonke.

¹⁶I Nkosi yamabandla ithi: Lingawalaleli amazwi abaprofethi abawaprofetha kini belithembisa okuyize, bekhuluma imibono yengqondo zabo, kungeyisikho okuvela emlonyeni we Nkosi.

¹⁷Bahlala besithi kulabo abadelela ilizwi le Nkosi: Kuzalilungela lonke; lakubo bonke abalandela inhliziyo zabo ezilenkani bathi: Kaliyikwehlelwa ngokubi.

¹⁸Ngubani phakathi kwabo owayekhona emhlanganweni we Nkosi ukuze alalele alizwe ilizwi layo? Ngubani owake waliqaphela walizwa?

¹⁹Khangelani, ulaka lwe Nkosi lunjengesivunguzane, luphumile, lunjengesiphepho esivunguzayo. Luzakwehlela phezu kwababi.

²⁰Ulaka lwe Nkosi kaluyikudeda, ize iphelelise izifiso zenhliziyo yayo. Ensukwini zokucina lizakuqedisisa lokhu.

²¹Kangibathumanga mina abaprofethi, kanti bagijima; kangikhulumanga kibo, kodwa baprofetha.

²²Kodwa uba babekhona emhlanganweni wami, ngabe batshumayela amazwi ami ebantwini bami, babanqande ezindleleni zabo ezimbi lezenzweni ezimbi.

²³NginguNkulunkulu oseduze yini, itsho i Nkosi, njalo hatshi uNkulunkulu okhatshana?

²⁴Umuntu angacatsha yini endaweni ezisithekileyo ukuze mina ngingamboni? kutsho i Nkosi. Kangigcwalisi yini amazulu lomhlaba? kutsho i Nkosi.

²⁵Ngizwile ukuthi batheni abaprofethi abaprofetha amanga ebizweni lami besithi: Ngiphuphile, ngiphuphile!

²⁶Koze kube nini amanga ekhona enhliziyweni zabaprofethi abaprofetha amanga, betshumayela inkohliso zenhliziyo zabo,

²⁷abacabanga ukwenza abantu bami ukuze bakhohlwe ibizo lami ngamaphupho abo abawaxoxayo, njengaboyise abalikhohlwayo ilizwi lami ngenxa kaBhali.

²⁸Umprofethi olephupho kalixoxe iphupho lakhe, kodwa olelizwi lami kalikhulume ilizwi lami ngeqiniso. Amahlanga ayini kulamabele? kutsho i Nkosi.

²⁹Ilizwi lami kalinjengomlilo yini lanjengesando esiqhekeza ilitshe? kutsho i Nkosi.

³⁰Ngakho khangela, ngimelana labaprofethi abeba amazwi ami kwabanye, kutsho i Nkosi.

³¹Khangela, ngimelana labaprofethi abasebenzisa inlimi zabo besithi i Nkosi itsho lokhu lalokhu.

³²Khangela, ngimelana lalabo abaprofetha amaphupho amanga, baduhise abantu bami ngamanga abo langokuwalazela kwabo, ngingabathumanga, ngabalaya; ngakho kababasizi ngalutho lababantu, kutsho i Nkosi.

³³Lapho omunye walababantu loba umprofethi kumbe umpristi ekubuza esithi: Uyini umthwalo we Nkosi? Wena uzakuthi kibo: Yini elingumthwalo, lokuthi ngizalilahla, kutsho i Nkosi.

³⁴Umprofethi lompristi loba omunye wabantu othi: Umthwalo we Nkosi; ngizamtshaya lowomuntu kanye lendlu yakhe.

³⁵Lizakhulumisana ngalindlela, umakhelwane lomakhelwane, lomfowabo kumfowabo, lithi: I Nkosi iphendule yathini? lokuthi: Itheni i Nkosi?

³⁶Kodwa ukuthi: Umthwalo we Nkosi; kalisayikukutsho lokhu. Ngoba umuntu otsho njalo isibili kuzakuba ngumthwalo kuye, ngoba liwahlanekela amazwi kaNkulunkulu ophilayo, amazwi e Nkosi yamabandla, uNkulunkulu wethu.

³⁷Nansi indlela yokukhuluma lomprofethi, lithi: I Nkosi iphendule yathini? loba: I Nkosi itheni?

³⁸Kodwa uba lisithi: Umthwalo we Nkosi; i Nkosi ithi: Uba lokhu lisebenzisa amazwi okuthi umthwalo we Nkosi, loba sengilitshelile ukuyekela ukutsho njalo,

³⁹ngakho khangelani, mina uqobo ngizalihluthuna, ngiliphosele khatshana lami, lina kanye lomuzi engawunika lina laboyihlo,

⁴⁰ngilehlisele ihlazo elilaphakade lokuyangeka okungayikukhohlakala.