Read Ndebele-IBhayibhili Elingcwele 2006 Ujoromiya 24 Bible Online

Ujoromiya 24 - Ndebele-IBhayibhili Elingcwele 2006 bible

Ujoromiya 24

¹Emva kokuthi uNebukadinezari inkosi yeBhabhiloni esethumbile eJerusalema uJekoniya indodana kaJehoyakhimi, inkosi yakoJuda, kanye leziphathamandla zakoJuda, lezingcitshi zemisebenzi, labakhandi, wabasa eBhabhiloni, i Nkosi yangitshengisa lumbono: Khangela, izitsha ezimbili zilomkhiwa zibekwe phambi kwethempeli le Nkosi.

²Esinye isitsha sasilomkhiwa omuhle kakhulu ovuthwe kuqala; kodwa esinye sasilomkhiwa omubi kakhulu ongadlekiyo ngenxa yobubi bawo.

³I Nkosi yathi kimi: Jeremiya, ubonani? Ngathi: Umkhiwa, omuhle muhle kakhulu, lomubi mubi kakhulu, kawudleki ngenxa yobubi bawo.

⁴Laselifika kimi ilizwi le Nkosi lisithi:

⁵I Nkosi, uNkulunkulu kaIsrayeli, ithi: Njengalumkhiwa omuhle bazakuba njalo kimi abathunjiweyo bakoJuda, engibase elizweni lamaKhaladiya elikhatshana lalindawo.

⁶Ngizabaphatha kuhle, ngibabuyise kulelilizwe. Ngizabakha, ngingabadilizi, ngibagxumeke, ngingabasiphuni,

⁷ngibanike inhliziyo yokwazi ukuthi mina ngiyi Nkosi; bazakuba ngabantu bami, ngibe nguNkulunkulu wabo, ngoba bazabuyela kimi ngenhliziyo yabo yonke.

⁸Kodwa i Nkosi ithi: Njengalumkhiwa omubi ongadlekiyo ngenxa yobubi bawo, ngizaphatha ngokunjalo uZedekhiya, inkosi yakoJuda, leziphathamandla zakhe, lensali yeJerusalema eseleyo kulelilizwe, lalabo abakhileyo elizweni leGibhithe.

⁹Ngizabenza babe yinto eyesabekayo kuyo yonke imibuso yomhlaba, babe lihlazo, lesiga, lenhlekisa, lesiqalekiso kuzo zonke indawo engibaxotshele kuzo.

¹⁰Ngizabehlisela inkemba lendlala lomatshayabhuqe wesifo, baze babhubhe baphele elizweni engibanika lona laboyise.