Read Ndebele-IBhayibhili Elingcwele 2006 Ujoromiya 25 Bible Online

Ujoromiya 25 - Ndebele-IBhayibhili Elingcwele 2006 bible

Ujoromiya 25

¹Ilizwi elafika kuJeremiya ngabantu bonke bakoJuda, emnyakeni wesine kaJehoyakhimi indodana kaJosiya, inkosi yakoJuda, ngomnyaka wokuqala kaNebukadinezari, inkosi yeBhabhiloni.

²Ilizwi alikhulumayo uJeremiya umprofethi kubo bonke abantu bakoJuda labo bonke abakhileyo eJerusalema esithi:

³Sekuyiminyaka engamatshumi amabili lantathu, kusukela emnyakeni wetshumi lantathu wokubusa kukaJosiya indodana kaAmoni, inkosi yakoJuda, kuze kube lamuhla, ilizwi le Nkosi lifikile kimi, ngalikhuluma kini ngivuke ngovivi ngikhuluma, kodwa kalilalelanga.

⁴Kalilalelanga, kalizwanga lanxa i Nkosi iphikelela ukuthuma kini zonke inceku zayo abaprofethi, ivuka ngovivi, ithuma

⁵lapho kuthiwa: Phendukani, lina lonke, endleleni zenu ezimbi lekwenzeni kwenu okubi, lihlale elizweni i Nkosi elinike lona lina laboyihlo kusukela endulo kuze kube nininini,

⁶lingalandeli abanye onkulunkulu ukubasebenzela lokubakhonza, ukuze lingivuse ulaka ngezithombe elizenzileyo. Kangiyikulenzela okubi.

⁷Kodwa kalingilalelanga, kutsho i Nkosi, ukuthi lingivuse ulaka ngezithombe zenu, ukuthi lehlelwe ngokubi.

⁸Ngakho i Nkosi yamabandla ithi: Ngenxa yokuthi lingawalalelanga amazwi ami,

⁹khangela, ngizabiza izizwe zenyakatho, kutsho i Nkosi, loNebukadinezari inkosi yeBhabhiloni inceku yami, ngizilethe kulelilizwe lakwabakhileyo kulo, lakuzo zonke izizwe eziseduze lalo, ngibatshabalalise, ngibenze babe yinto eyesabekayo, into yokuncifelwa, lehlazo elilaphakade.

¹⁰Ngizaqeda phakathi kwabo umsindo wentokozo lowenjabulo, lelizwi lomyeni lelomakoti, lomsindo wokuchola kwelitshe, lokukhanya kwesibane.

¹¹Ilizwe lonke leli lizakuba ngamanxiwa lenkangala; lezizizwe zizasebenzela i Nkosi yeBhabhiloni iminyaka engamatshumi ayisikhombisa.

¹²Emva kweminyaka engamatshumi ayisikhombisa ngizatshaya inkosi yeBhabhiloni lesizwe sayo, ngenxa yobubi babo, kutsho i Nkosi, ngilenze ilizwe lamaKhaladiya libe yinkangala kokuphela,

¹³ngehlisele phezu kwalelolizwe amazwi wonke engawakhuluma ngalo, lakho konke okubhaliweyo kulolugwalo okwaprofethwa nguJeremiya ngazo zonke izizwe.

¹⁴Ngoba izizwe ezinengi lamakhosi amakhulu zizabenza babe yizigqili; ngizaphindisela kibo njengokufanele izenzo zabo lemisebenzi yabo.

¹⁵I Nkosi, uNkulunkulu kaIsrayeli, yathi kimi: Yemukela esandleni sami linkezo yewayini egcwele ulaka lwami, unathise ngayo zonke izizwe engikuthuma kuzo.

¹⁶Zizanatha zidakwe, zihlanye ngenxa yenkemba engiyithuma phakathi kwazo.

¹⁷Ngasengiyemukela inkezo esandleni se Nkosi, nganathisa ngayo zonke izizwe i Nkosi engithume kizo,

¹⁸ngitsho iJerusalema lemizi yakoJuda, amakhosi ayo leziphathamandla zayo, ukuze kuchitheke, kube yinkangala, lento yokuncifelwa leyokuthukwa, njengoba kunjalo lalamuhla;

¹⁹loFaro inkosi yeGibhithe, lenceku zakhe, leziphathamandla zakhe, labantu bakhe bonke,

²⁰kanye labo bonke abezizwe abaphakathi kwabo, lamakhosi wonke elizweni leUzi, lawelizwe leFilisti leAshikeloni leGaza leEkhironi lensali eAshidodi,

²¹iEdoma loMowabi, lamaAmoni,

²²wonke amakhosi eTire laweSidoni, lamakhosi ezihlenge, ezingaphetsheya kolwandle,

²³eDedani leTema leBuzi, labo bonke abagela inwele zabo emaceleni,

²⁴lamakhosi wonke eArabhiya, lamakhosi ezizwe ezixubeneyo ezihlala enkangala,

²⁵lamakhosi wonke eZimri, laweElamu laweMede,

²⁶lawo wonke amakhosi enyakatho akhatshana leduze ngokulandelana, lemibuso yonke yomhlaba ekhona emhlabeni. Emva kwabo inkosi yeBhabhiloni izanatha.

²⁷Ubususithi kibo: I Nkosi yamabandla, uNkulunkulu kaIsrayeli, ithi: Nathani lidakwe, lihlanze, liwe, lingaphindi livuke futhi, ngenxa yenkemba engiyithuma phakathi kwenu.

²⁸Kuzakuthi lapho besala ukuyemukela inkezo esandleni sakho, ukuze banathe, uthi kibo: I Nkosi yamabandla ithi: Limele ukunatha isibili.

²⁹Ngoba khangela, sengiqalile ukwenza okubi emzini lapho ibizo lami elidunyiselwa khona; lizayekelwa ukutshaywa yini? Hatshi, kaliyikuyekelwa, ngoba ngibiza inkemba ezabehlela bonke abakhileyo emhlabeni, kutsho i Nkosi.

³⁰Ngakho-ke wena uzaprofetha kibo wonke lamazwi engikutshela wona, uthi: I Nkosi izaduma iphezulu, iliphumise ilizwi layo endlini yayo engcwele; izaduma kakhulu phezu kwesibaya sayo, imemeze njengalabo abakhama izithelo zevini kubo bonke abakhileyo emhlabeni.

³¹Umsindo uzafinyelela emikhawulweni yomhlaba, ngoba i Nkosi iyamelana lezizwe, iyahlulela yonke inyama, ababi izabanikela ekubulaweni, kutsho i Nkosi.

³²I Nkosi yamabandla ithi: Khangelani, ububi buphuma kwesinye isizwe busiya kwesinye, isiphepho esikhulu siyavunguza, sisuka endaweni ezikhatshana zomhlaba.

³³Ngalolosuku ababulewe yi Nkosi bazasukela komunye umkhawulo womhlaba baze bafike komunye; kabayikukhalelwa, kabayikubuthwa bangcwatshwe, bazakuba ngamalongwe emhlabathini.

³⁴Lilani, lina belusi, likhale, zibhuqeni emlotheni, lina ziphathamandla zomhlambi, ngoba insuku zokuhlatshwa kwenu lezokuhlakazeka sezifikile, lizakuwa njengenqama ezinhle.

³⁵Abelusi kabayikuba lesiphephelo, leziphathamandla zomhlambi kaziyikuphunyuka.

³⁶Zwanini ukukhala kwabelusi lokulila kweziphathamandla zomhlambi: ngoba i Nkosi izachitha idlelo labo,

³⁷lezibaya ezilokuthula zidilikile, ngenxa yokuvutha kolaka lwe Nkosi.

³⁸Iphumile esikhundleni sayo njengebhongo esilwane, ngoba ilizwe labo seliyinkangala ngenxa yabachithi, langenxa yolaka lwayo oluvuthayo.