Read Ndebele-IBhayibhili Elingcwele 2006 Ujoromiya 26 Bible Online

Ujoromiya 26 - Ndebele-IBhayibhili Elingcwele 2006 bible

Ujoromiya 26

¹Ekuqaleni kokubusa kukaJehoyakhimi indodana kaJosiya, inkosi yakoJuda, kwafika lelilizwi le Nkosi lathi:

²I Nkosi ithi: Mana egumeni lethempeli, ukhulume kuyo yonke imizi yakoJuda efikayo ukuzakhonza ethempelini, utsho wonke amazwi engakulaya wona, ungatshiyi lelilodwa.

³Mhlawumbe bazalalela, bonke batshiye indlela zabo ezimbi, ukuze ngiyekele okubi ebengisithi ngizakwenza kubo ngenxa yezenzo zabo ezimbi.

⁴Uzakuthi kibo: I Nkosi ithi: Uba lingayikungilalela, lihambe ngomlayo wami engiwubeka phambi kwenu,

⁵lingawalaleli amazwi enceku zami abaprofethi engibathume kini, ngivuka ngovivi ngibathuma, kodwa lingabalaleli,

⁶ngizakwenza lindlu ibe njengeShilo, ngenze lumuzi ube yisiqalekiso kuzo zonke izizwe zomhlaba.

⁷Abapristi labaprofethi labo bonke abantu bamuzwa uJeremiya ekhuluma lamazwi ethempelini.

⁸Lapho eseqedile ukukhuluma konke i Nkosi eyayimlayile ukukukhuluma ebantwini, abapristi labaprofethi labo bonke abantu bamdumela bathi: Sizakubulala!

⁹Kungani uprofetha ngebizo le Nkosi usithi: Lindlu izakuba njengeShilo, lomuzi lo uzakuba yinkangala, kungabi lamuntu? Bonke abantu bambuthanela uJeremiya ethempelini.

¹⁰Kwathi iziphathamandla zakoJuda sezizwile lezizinto zafika ethempelini, zivela esigodlweni se Nkosi, zahlala eSangweni elitsha.

¹¹Abapristi labaprofethi basebesithi kuzo iziphathamandla lakubo bonke abantu: Umuntu lo ufanele ukubulawa, ngoba uprofethe ngalumuzi njengoba lizizwele lani.

¹²Wasekhuluma uJeremiya kuzo zonke iziphathamandla lakubo bonke abantu esithi: I Nkosi yangithuma ukuprofetha ngalindlu langalumuzi wonke amazwi eliwezwileyo.

¹³Ngakho lungisani indlela zenu lezenzo zenu, lilalele ilizwi le Nkosi uNkulunkulu wenu, izayekela ukwenza okubi konke ekukhulume ngani.

¹⁴Kodwa mina, khangelani, ngisezandleni zenu. Yenzani kimi njengokuthanda kwenu lanjengokufaneleyo emehlweni enu.

¹⁵Kodwa lazi isibili ukuthi uba lingibulala, lizakwehlisela igazi elingelacala phezu kwenu laphezu kwalumuzi labakhileyo kiwo, ngoba isibili i Nkosi yangithuma ukukhuluma lamazwi kini.

¹⁶Iziphathamandla labo bonke abantu basebesithi kubapristi labaprofethi: Lumuntu kafanelanga ukubulawa, ngoba ukhulumile kithi ebizweni le Nkosi, uNkulunkulu wethu.

¹⁷Kwasekusukuma abanye abadala belizwe, bakhuluma kulo lonke ibandla labantu besithi:

¹⁸UMika weMoreshethi waprofetha ensukwini zikaHezekhiya, inkosi yakoJuda, wathi kibo bonke abantu bakoJuda: I Nkosi yamabandla ithi: IZiyoni izalinywa njengensimu; iJerusalema ibe lunxiwa oludilikileyo, lentaba okwakhiwe kuyo ithempeli ibe lisandle.

¹⁹Kambe inkosi yakoJuda uHezekhiya labo bonke abakoJuda bambulala yena yini? Angithi bayesaba i Nkosi, bayincenga, kayiyekelanga yini i Nkosi ukukwenza okubi eyayikukhulume ngabo? Sizakwehlisela phezu kwethu ububi obukhulu yini?

²⁰Kwakukhona lomunye umuntu owaprofetha ebizweni le Nkosi, uUriya indodana kaShemaya oweKiriyathi-Jeyarimi. Laye waprofetha ngalumuzi langalelilizwe ngamazwi afanana lamazwi kaJeremiya.

²¹Kwathi lapho inkosi uJehoyakhimi, lawo wonke amaqhawe akhe, leziphathamandla zakhe, besizwa amazwi akhe, inkosi yadinga ukumbulala; kodwa kwathi uUriya esekuzwile lokhu, wesaba, wabalekela eGibhithe.

²²Inkosi uJehoyakhimi yasithuma eGibhithe amadoda athile, uElinathani indodana kaAkhibhori, kanye labanye,

²³bamthatha uUriya eGibhithe, bamletha enkosini uJehoyakhimi, owamtshaya ngenkemba, lesidumbu sakhe wasiphosela endaweni yokungcwabela abantukazana.

²⁴Kodwa uAhikhamu indodana kaShafani wamvikela uJeremiya ukuze anganikelwa ebantwini ukubulawa.