Read Ndebele-IBhayibhili Elingcwele 2006 Ujoromiya 27 Bible Online

Ujoromiya 27 - Ndebele-IBhayibhili Elingcwele 2006 bible

Ujoromiya 27

¹Ekuqaleni kokubusa kukaZedekhiya indodana kaJosiya, inkosi yakoJuda, lelilizwi lafika kuJeremiya livela e Nkosi ni lathi:

²I Nkosi ithi kimi: Zenzele imichilo lamajogwe, ukugaxe entanyeni yakho.

³Thumela ilizwi enkosini yeEdoma leyakoMowabi leyeAmoni leyeTire leyeSidoni, ngezithunywa ezifika eJerusalema zisiza kuZedekhiya, inkosi yakoJuda,

⁴uzilaye ukuthi zithi emakhosini azo: I Nkosi yamabandla, uNkulunkulu kaIsrayeli, ithi: Lizawatshela lokhu amakhosi enu,

⁵lithi: Kuyimi ngamandla ami amakhulu langengalo yami elamandla engenze umhlaba, labantu, lenyamazana ezikhona emhlabeni, ngiwunika lowo engimbona ukuthi ufanele.

⁶Sengiwanikele wonke lamazwe kuNebukadinezari inkosi yeBhabhiloni, inceku yami, ngimnikile futhi inyamazana zeganga ukuze zimsebenzele.

⁷Zonke izizwe zizamsebenzela yena lendodana yakhe, lomzukulu wakhe, kuze kufike isikhathi sokuchithwa kwelizwe lakhe; kuzakuthi izizwe ezinengi lamakhosi amakhulu bamenze isigqili.

⁸Kodwa uba isizwe kumbe umbuso ungamsebenzeli uNebukadinezari inkosi yeBhabhiloni, uthobele ijogwe lenkosi yeBhabhiloni, ngizatshaya lesosizwe ngenkemba langendlala langomatshayabhuqe wesifo, ngize ngisinikele esandleni sakhe ngokupheleleyo, kutsho i Nkosi.

⁹Ngakho-ke lingabalaleli abaprofethi benu, labavumisi benu, labaphuphi benu, labachasisa ngemibono benu, labathakathi benu abathi kini: Kaliyikuyisebenzela inkosi yeBhabhiloni.

¹⁰Ngoba baprofetha amanga kini, ukuze lisuswe elizweni lakini, ngilixotshe kilo, libhubhe.

¹¹Kodwa isizwe esizathobela inkosi yeBhabhiloni, siyisebenzele, ngizasiyekela elizweni laso, ukuze sililime, sakhe kulo, kutsho i Nkosi.

¹²Ngakhuluma kuZedekhiya inkosi yakoJuda ngalawomazwi ngathi: Thobelani ijogwe lenkosi yeBhabhiloni, liyisebenzele labantu bayo, ukuze lisile.

¹³Lizafelani, wena labantu bakho ngenkemba langendlala langomatshayabhuqe wesifo, njengokutsho kwe Nkosi mayelana lesizwe esingayikuyisebenzela inkosi yeBhabhiloni?

¹⁴Ungawalaleli amazwi abaprofethi abathi kuwe: Kaliyikuyisebenzela inkosi yeBhabhiloni; ngoba baliprofetha amanga.

¹⁵Kangibathumanga mina, kutsho i Nkosi, kodwa baprofetha amanga ngebizo lami, ukuze ngilixotshe, libhubhe wena kanye lalabo abaprofethi abaliprofethayo.

¹⁶Ngasengikhuluma kubapristi lakubo bonke abantu ngisithi: I Nkosi ithi: Lingawalaleli amazwi abaprofethi benu abaliprofetha besithi: Khangelani, izitsha zethempeli zizabuyiswa masinyane zivela eBhabhiloni; ngoba lokhu kungamanga abaliprofethayo.

¹⁷Lingabalaleli; sebenzelani inkosi yeBhabhiloni ukuze lisile. Uzachithelwani lumuzi?

¹⁸Uba bengabaprofethi, belalo ilizwi le Nkosi, kabayincenge i Nkosi yamabandla, ukuthi izitsha eziseleyo ethempelini, lesigodlweni senkosi yakoJuda, leJerusalema, zingasiwa eBhabhiloni.

¹⁹Ngoba i Nkosi yamabandla ithi ngezinsika, langolwandle, langezinyawo, langezinye izitsha zethempeli eziseleyo kulumuzi,

²⁰angazithathanga uNebukadinezari inkosi yeBhabhiloni ekuthumbeni kwakhe eJerusalema uJekoniya indodana kaJehoyakhimi, inkosi yakoJuda, lazo zonke iziphathamandla zakoJuda lezeJerusalema, ebasa eBhabhiloni.

²¹I Nkosi yamabandla, uNkulunkulu kaIsrayeli, ithi mayelana lezitsha eziseleyo ethempelini, lesigodlweni senkosi yakoJuda, leJerusalema:

²²Zizasiwa eBhabhiloni, zihlale khona kuze kufike usuku lokuzihambela kwami, kutsho i Nkosi. Khona ngizazibuyisa kulindawo.