Read Ndebele-IBhayibhili Elingcwele 2006 Ujoromiya 29 Bible Online

Ujoromiya 29 - Ndebele-IBhayibhili Elingcwele 2006 bible

Ujoromiya 29

¹Nanka amazwi encwadi ayithumelayo uJeremiya umprofethi eseJerusalema kwabadala babathunjiweyo, lakubapristi labaprofethi, labantu bonke ayebathumbile uNebukadinezari eJerusalema, wabasa eBhabhiloni.

²Kwakusemva kokuthi sebesukile eJerusalema, inkosi uJekoniya, lendlovukazi, labathenwa, leziphathamandla zakoJuda lezeJerusalema, lezingcitshi zemisebenzi, kanye labakhandi.

³Incwadi yasiwa nguElasa indodana kaShafani, loGemariya indodana kaHilikhiya, ababethunywe nguZedekhiya, inkosi yakoJuda, eBhabhiloni kuNebukadinezari inkosi yeBhabhiloni. Yathi:

⁴I Nkosi yamabandla, uNkulunkulu kaIsrayeli, ithi kibo bonke abathunjwe eJerusalema basiwa eBhabhiloni:

⁵Yakhani izindlu, lihlale kizo, lilime amasimu, lidle izithelo zawo;

⁶lithathe abafazi, lizale amadodana lamadodakazi, lithathele amadodana enu abafazi, lendise amadodakazi enu, ukuze azale amadodana lamadodakazi, lande lina, linganciphi.

⁷Sebenzelani ukuthula komuzi lapho engilithumbele khona, liwukhulekele e Nkosi ni, ngoba ekuthuleni kwawo lizakuba lokuthula lani.

⁸I Nkosi yamabandla, uNkulunkulu kaIsrayeli, ithi: Lingavumeli abaprofethi benu labavumisi benu abakhona phakathi kwenu balikhohlise, lingawalaleli amaphupho abawaphuphayo;

⁹ngoba baprofetha amanga kini ngebizo lami; kangibathumanga, kutsho i Nkosi.

¹⁰I Nkosi ithi: Lapho iminyaka engamatshumi ayisikhombisa isiphelile eBhabhiloni, ngizalihambela, ngigcwalise isithembiso sami, ngilibuyise kulindawo.

¹¹Ngoba ngiyazi mina imicabango engiyicabanga ngani, kutsho i Nkosi; yimicabango yokuthula, kayisiyo eyokubi, ukuthi ngilinike isikhathi esizayo esilethemba.

¹²Lizangibiza, lize, likhuleke kimi, ngilizwe.

¹³Lizangidinga, lingithole; lapho lingidingisisa ngenhliziyo yenu yonke,

¹⁴lizangithola, kutsho i Nkosi, ngilibuyise ekuthunjweni kwenu, ngiliqoqe kuzo zonke izizwe lakuzo zonke indawo lapho engilixotshele khona, ngilibuyise endaweni engalithumba kuyo.

¹⁵Litshilo ukuthi: I Nkosi uNkulunkulu isivusele abaprofethi eBhabhiloni.

¹⁶I Nkosi uNkulunkulu ikhuluma mayelana lenkosi ehlezi esihlalweni sobukhosi sikaDavida, langabo bonke abantu abahlala kulumuzi, abafowenu abangathunjwanga kanye lani;

¹⁷ithi: Khangelani, ngiyathumela kibo inkemba lendlala lomatshayabhuqe wesifo, ngibenze babe njengomkhiwa omubi kakhulu ongadlekiyo ngenxa yobubi bawo.

¹⁸Ngizaxotshana labo ngenkemba langendlala langomatshayabhuqe wesifo, ngibenze babe yinto eyesabekayo kuyo yonke imibuso yomhlaba, babe yisiqalekiso, lesimangaliso, lento yokuncifelwa, lehlazo, phakathi kwazo zonke izizwe lapho engibaxotshele khona;

¹⁹ngoba bengawalalelanga amazwi ami engawathumela kibo ngenceku zami abaprofethi, ngivuka ngovivi ngithumela, kodwa kabalalelanga, kutsho i Nkosi.

²⁰Zwanini ilizwi le Nkosi, lina lonke bathunjiweyo, engabasusa eJerusalema ngabasa eBhabhiloni.

²¹I Nkosi yamabandla uNkulunkulu kaIsrayeli, ithi mayelana loAhabi indodana kaKolaya, loZedekhiya indodana kaMahaseya, aprofetha amanga ngebizo lami: Khangelani, ngizabanikela esandleni sikaNebukadinezari inkosi yeBhabhiloni, ozabatshaya phambi kwamehlo enu.

²²Ngenxa yabo, lamazwi azasetshenziswa kibo bonke abathunjiweyo koJuda abeBhabhiloni, abe yisiqalekiso okuthi: I Nkosi ikwenze ube njengoZedekhiya loAhabi, abosiwa yinkosi yeBhabhiloni ngomlilo;

²³ngoba benze ubuthutha koIsrayeli, bafeba labafazi babomakhelwane babo, baqamba amanga ngebizo lami, into engingabalayanga yona. Yimi engaziyo, ngingumfakazi, kutsho i Nkosi.

²⁴Uzakutsho kuShemaya weNehelamu uthi:

²⁵I Nkosi yamabandla, uNkulunkulu kaIsrayeli, ithi: Uthumele izincwadi ngebizo lakho kubo bonke abantu abeJerusalema, lakuZefaniya indodana kaMahaseya umpristi, lakubo bonke abapristi, usithi:

²⁶I Nkosi isikumisile ukuthi ube ngumpristi esikhundleni sikaJehoyada umpristi, ukuze ulondoloze ithempeli; uba kukhona umuntu ohlanyayo ozitshaya umprofethi, uzamfaka esitokisini, umbophe ngeketane.

²⁷Pho-ke, uyekeleleni ukumkhuza uJeremiya weAnathothi ozitshaya umprofethi yini?

²⁸Ngoba usethumile ilizwi kithi eBhabhiloni esithi: Ukuthunjwa kwenu kuzakuba ngokwesikhathi eside; ngakho yakhani izindlu, lihlale kizo, lilime amasimu, lidle izithelo zawo.

²⁹UZefaniya umpristi wayifunda lincwadi, uJeremiya umprofethi esizwa.

³⁰Laselifika ilizwi le Nkosi kuJeremiya lisithi:

³¹Thumela ilizwi kubo bonke abathunjiweyo uthi: I Nkosi ithi ngoShemaya weNehelamu: Njengoba uShemaya eprofethe kini ngingamthumanga mina, walenza ukuthi lithembe ize,

³²ngakho khangela, ngizamtshaya yena kanye lenzalo yakhe; kakuyikuba lamuntu wakwakhe ozasala phakathi kwalababantu abone okuhle engizakwenzela abantu bami, ngoba ukhulumile ukuhlamuka kimi, kutsho i Nkosi.