Read Ndebele-IBhayibhili Elingcwele 2006 Ujoromiya 30 Bible Online

Ujoromiya 30 - Ndebele-IBhayibhili Elingcwele 2006 bible

Ujoromiya 30

¹Ilizwi le Nkosi elafika kuJeremiya lathi:

²I Nkosi, uNkulunkulu kaIsrayeli, ithi: Bhala encwadini wonke amazwi engiwakhulume kuwe.

³Ngoba khangela, insuku ziyeza, lapho ngizabuyisa abantu bami uIsrayeli loJuda, kutsho i Nkosi. Ngizababuyisela elizweni engalinika oyise, libe ngelabo.

⁴La ngamazwi i Nkosi eyawakhuluma ngoIsrayeli loJuda,

⁵yathi: Sizwile ilizwi lokwethuka, lelokwesaba, lelokuswela ukuthula.

⁶Ake libuze lizwe, kumbe indoda ingazala umntwana yini? Pho-ke, kungani ngibona wonke amadoda ebambe inkalo zawo njengowesifazana ohelelwayo? Kungani ubuso bonke bunyukumele?

⁷Maye! lukhulu lolosuku, kalukho olunye olunjengalo. Kuyisikhathi sokuhlupheka kukaJakobe, kanti uzakhululwa kukho.

⁸Kuzakuthi ngalolosuku, kutsho i Nkosi yamabandla, ngilephule ijogwe entanyeni zabo, ngiqamule izibopho zabo, kabasayikusebenzela abezizwe,

⁹kodwa bazasebenzela mina Nkosi, uNkulunkulu wabo, loDavida inkosi yabo engizabavusela yena.

¹⁰Ngakho-ke ungesabi, wena Jakobe, nceku yami; ungatshaywa luvalo, wena Israyeli, kutsho i Nkosi; ngoba khangela, ngizakukhulula endaweni ekhatshana, lenzalo yakho elizweni lokuthunjwa kwayo. UJakobe uzabuya aphumule, ahlale kuhle, angethuswa muntu.

¹¹Ngoba mina ngilawe ukukukhulula, kutsho i Nkosi. Ngoba ngizachitha ngokupheleleyo zonke izizwe engikuhlakazele phakathi kwazo, kodwa wena kangiyikukubhubhisa ngokupheleleyo; ngizakukhuza ngokufaneleyo, kangiyikukuyekela.

¹²I Nkosi ithi: Ukulimala kwakho kakwelapheki, lesilonda sakho sibi.

¹³Kakho onanzelela amanxeba akho, kakulamuthi ozakwelapha ukuthi usile.

¹⁴Zonke izithandwa zakho zikukhohliwe, kazisakudingi. Ngoba ngikutshayile njengesitha, ngokutshaya okulolunya, ngoba icala lakho likhulu, lezono zakho zandile.

¹⁵Ukhalelani ngokulimala kwakho? Ubuhlungu bakho kabelapheki. Ngoba ukona kwakho kukhulu, lezono zakho zandile. Ngikwenzile lokhu kuwe.

¹⁶Ngalokho-ke bonke abakudlayo bazakudliwa, lezitha zakho zonke zizathunjwa, labakuphangayo bazaphangwa, labo bonke abakwemukayo bazakwemukwa.

¹⁷Ngoba ngizabuyisa ukusila kwakho, ngelaphe amanxeba akho, kutsho i Nkosi. Ngoba bakubize ngokuthi: Ungolahliweyo, yiZiyoni, kakulamuntu oyidingayo.

¹⁸I Nkosi ithi: Khangela, ngizabuyisa abantwana bakoJakobe, ngihawukele wonke amakhaya abo. Yonke imizi izakwakhiwa futhi endaweni yayo, lazo zonke indlu zakhiwe njengakuqala.

¹⁹Kuzaphuma kubo ingoma zokubonga, lokumemeza kwabathokozayo. Ngizabandisa babebanengi, bazahlonitshwa, bangabi balutshwana.

²⁰Abantwana babo bazakuba njengakuqala, lenhlangano yabo izakuma phambi kwami; ngizabatshaya bonke ababacindezelayo.

²¹Isiphathamandla sabo sizakuba ngomunye wabo, lombusi wabo uzavela phakathi kwabo; ngizamsondeza, asondele kimi, ngoba ngubani ongaba lesibindi sokusondela kimi? kutsho i Nkosi.

²²Lizakuba ngabantu bami, lami ngibe nguNkulunkulu wenu.

²³Khangelani ulaka lwe Nkosi lunjengesivunguzane, luphumile, lunjengesiphepho esivunguzayo, luzakwehlela phezu kwababi.

²⁴Ulaka oluvuthayo lwe Nkosi kaluyikudeda, ize iphelelise izifiso zenhliziyo yayo. Ensukwini zokuphela lizakuqedisisa lokhu.