Read Ndebele-IBhayibhili Elingcwele 2006 Ujoromiya 32 Bible Online

Ujoromiya 32 - Ndebele-IBhayibhili Elingcwele 2006 bible

Ujoromiya 32

¹Ilizwi le Nkosi lafika kuJeremiya emnyakeni wetshumi wokubusa kukaZedekhiya, inkosi yakoJuda, ongumnyaka wetshumi lesificaminwembili kaNebukadinezari.

²Ngalesosikhathi ibutho lenkosi yeBhabhiloni layivimbezela iJerusalema; uJeremiya umprofethi wayevalelwe egumeni labalindi, elalisesigodlweni senkosi yakoJuda.

³Ngoba uZedekhiya inkosi yakoJuda wayemvalele khona esithi: Kungani uprofetha usithi: I Nkosi ithi: Khangela, lumuzi ngiwunikela esandleni senkosi yeBhabhiloni, izawuthumba;

⁴loZedekhiya inkosi yakoJuda kayiyikuphunyuka esandleni samaKhaladiya, kodwa uzanikelwa isibili esandleni seNkosi yaseBhabhiloni, akhulume layo bekhangelene;

⁵izamthatha uZedekhiya, imuse eBhabhiloni, ahlale khona ngize ngimhambele mina, kutsho i Nkosi; lanxa usilwa lamaKhaladiya, kawuyikuphumelela?

⁶UJeremiya wathi: Ilizwi le Nkosi lafika kimi lisithi:

⁷Khangela, uHanameli indodana kaShaluma uyihlo omncinyane, uzafika kuwe athi: Thenga insimu yami eseAnathothi, ngoba nguwe oyisihlobo sokuqala olelungelo lokuyithenga.

⁸Wasefika kimi uHanameli umfowethu egumeni labalindi, njengokutsho kwe Nkosi, wathi kimi: Thenga insimu yami eseAnathothi elizweni lakoBhenjamini, ngoba nguwe oyisihlobo sokuqala olelungelo lokuyithenga; zithengele yona. Ngasengisazi ukuthi lelilizwi livela e Nkosi ni.

⁹Ngayithenga insimu eseAnathothi kuHanameli umfowethu, ngamnika imali engamashekeli* alitshumi lesikhombisa esiliva.

¹⁰Ngaloba incwadi, ngayinamathisela, ngadinga labafakazi, ngayilinganisa imali ngezikali.

¹¹Ngasengithatha incwadi yokuthenga enanyekiweyo elemithetho lezimiso, lenye incwadi evulekileyo,

¹²nganikela incwadi yokuthenga kuBaruki indodana kaNeriya, indodana kaMahaseya, phambi kukaHanameli umfowethu, laphambi kwabafakazi ababhala amabizo abo encwadini yokuthenga, laphambi kwawo wonke amaJuda ayehlezi egumeni labalindi.

¹³Ngamlaya uBaruki phambi kwabo ngathi:

¹⁴I Nkosi yamabandla, uNkulunkulu kaIsrayeli, ithi: Thatha lezizincwadi, incwadi yokuthenga enanyekiweyo lencwadi evulekileyo, uzifake embizeni yebumba ukuze zihlale isikhathi eside.

¹⁵Ngoba i Nkosi yamabandla, uNkulunkulu kaIsrayeli, ithi: Izindlu lamasimu lezivini kuzabuya kuthengwe futhi kulelilizwe.

¹⁶Sengimnikile uBaruki indodana kaNeriya incwadi yokuthenga, ngakhuleka e Nkosi ni ngathi:

¹⁷Hawu Nkosi Jehova! Khangela, kunguwe owenze amazulu lomhlaba ngamandla akho amakhulu langengalo yakho elamandla. Kakukho okungakwehlula wena

¹⁸otshengisa uthando kwabayizinkulungwane, kodwa uphindisela ububi baboyise kubantwana babo emva kwabo. Wena Nkulunkulu omkhulu lolamandla, oyi Nkosi yamabandla,

¹⁹omkhulu ngokucabanga, lolamandla ekwenzeni, omehlo akho abona zonke indlela zabantu ukuze unike wonke umuntu umvuzo wendlela zakhe, lezenzo zakhe,

²⁰owaveza izibonakaliso lezimangaliso elizweni leGibhithe, lakhathesi uyazenza koIsrayeli laphakathi kwabo bonke abantu; wazenzela ibizo ukuze ubizwe ngalo lalamuhla.

²¹Wabakhupha abantu bakho uIsrayeli elizweni leGibhithe ngezibonakaliso langezimangaliso, langesandla esilamandla, langengalo elamandla, langokwesabeka okukhulu;

²²wabanika lelilizwe, owafunga kuboyise ukubanika lona, ilizwe eligeleza uchago loluju;

²³bangena bahlala kilo, kodwa kabalilalelanga ilizwi lakho, kabahambanga ngomlayo wakho, kabakwenzanga lokho owabatshela khona. Ngakho-ke ubehlisele bonke lobububi.

²⁴Khangela, amadundulu okuvimbezela umuzi asekhona ukuze umuzi uthathwe, langenxa yenkemba lendlala lomatshayabhuqe wesifo umuzi unikelwe ezandleni zamaKhaladiya alwa emelene lawo. Lokho owakutshoyo kwenzakele njengoba khangela, ubona.

²⁵Kanti, wena Nkosi Jehova, utshilo kimi ukuthi: Thenga insimu ngemali, udinge labafakazi; lapho umuzi unikelwa ezandleni zamaKhaladiya.

²⁶Ilizwi le Nkosi lafika kuJeremiya lathi:

²⁷Khangela, mina ngiyi Nkosi, uNkulunkulu wayo yonke inyama; kambe kukhona okungehlulayo yini?

²⁸Ngakho khangela, ngiyawunikela lumuzi ezandleni zamaKhaladiya lezandleni zikaNebukadinezari inkosi yeBhabhiloni ozawunqoba.

²⁹AmaKhaladiya alwa emelene lumuzi azafika, awuthungele ngomlilo, awutshise kanye lezindlu obekunikelelwa phezu kwazo impepha kuBhali, lobekuthululelwa phezu kwazo iminikelo yokunathwayo kwabanye onkulunkulu ukungicunula.

³⁰Ngoba amadodana akoIsrayeli lamadodana akoJuda enzile okubi kuphela phambi kwami, kusukela ebutsheni bawo; yebo, amadodana akoIsrayeli angicunule kuphela ngezenzo zabo, kutsho i Nkosi.

³¹Lumuzi uvuse ukuthukuthela kwami lolaka, kusukela mhla wakhiwayo kuze kube lamuhla, ukuze ngiwususe kimi,

³²ngenxa yabo bonke ububi amadodana akoIsrayeli lawakoJuda abenza ukungithukuthelisa, ngitsho amakhosi abo leziphathamandla zabo, abapristi babo labaprofethi babo, abantu bakoJuda labakhileyo eJerusalema.

³³Bangiphendulela intamo, kabakhangelanga kimi; lanxa ngibafundise ngivuke ngovivi ngifundisa, kabalalelanga ukufundisa kwami.

³⁴Bamisa izinengiso zabo endlini lapho ibizo lami elidunyiselwa khona, ukuze bayingcolise.

³⁵Bakha indawo eziphakemeyo zikaBhali esihotsheni sendodana kaHinomu, ukuze benze amadodana lamadodakazi adabule aye kuMoleki, into engingabalayanga yona lengafikanga engqondweni yami, ukuze benze uJuda one.

³⁶Ngakho-ke i Nkosi, uNkulunkulu kaIsrayeli, ithi mayelana lomuzi lo othi ngawo: Unikelwe esandleni senkosi yeBhabhiloni ngenkemba langendlala langomatshayabhuqe wesifo:

³⁷Khangela, ngizabaqoqa emazweni wonke lapho engibaxotshele khona ekuthukutheleni kwami langokufutheka kwami langolaka olukhulu; ngizababuyisa kulindawo, ngibenze ukuthi bahlale bevikelekile.

³⁸Bazakuba ngabantu bami, lami ngibe nguNkulunkulu wabo.

³⁹Ngizabanika inhliziyonye lendlelanye, ukuze bangesabe zonke izinsuku, kube kuhle kubo lakubantwana babo emva kwabo.

⁴⁰Ngizakwenza labo isivumelwano esilaphakade, ukuze ngingaphenduki ekubalandeleni, ukuthi ngibenzele okuhle, ngifake ukungesaba enhliziyweni yabo ukuze bangasuki kimi.

⁴¹Ngizathokoza ngokubenzela okuhle, ngibagxumeke ngobuqotho kulelilizwe ngenhliziyo yami yonke langomoya wami wonke.

⁴²Ngoba i Nkosi ithi: Njengoba ngehlisele phezu kwalababantu bonke lobububi, ngokunjalo ngizabehlisela konke okuhle engikukhulumileyo.

⁴³Amasimu azathengwa kulelilizwe elilibiza ngokuthi: Liyinkangala engelamuntu lenyamazana, futhi linikelwe ezandleni zamaKhaladiya.

⁴⁴Amasimu azathengwa ngemali, kulungiswe incwadi zokuthenga, kubhalwe kuzo amabizo abafakazi, zinamatheliswe elizweni lakoBhenjamini lemaphandleni eJerusalema lemizini yakoJuda lemizini yemaqaqeni lemizini yeShefela lemizini yeningizimu; ngoba ngizabuyisa abantu bakhona, kutsho i Nkosi.