Read Ndebele-IBhayibhili Elingcwele 2006 Ujoromiya 33 Bible Online

Ujoromiya 33 - Ndebele-IBhayibhili Elingcwele 2006 bible

Ujoromiya 33

¹Ilizwi le Nkosi lafika kuJeremiya ngokwesibili, esavalelwe egumeni labalindi, lathi:

²I Nkosi eyenza umhlaba leyawubumba, yawumisa waqina, yona ethiwa yi Nkosi, ithi:

³Ngibiza, ngizasabela, ngikutshele izinto ezinkulu ezifihlakeleyo ongazaziyo.

⁴Ngoba i Nkosi, uNkulunkulu wakoIsrayeli, ithi mayelana lezindlu zalumuzi langendlu yamakhosi akoJuda. ezidilizwe ukuthi kwenziwe indawo yokuvika phambi kwamadundulu okuvimbezela laphambi kwenkemba:

⁵AmaKhaladiya azafika ukulwa, azigcwalise ngezidumbu zabantu engizabatshaya ekuthukutheleni kwami lekufuthekeni kwami; ngoba lumuzi ngiwufihlele ubuso bami ngenxa yobubi babo bonke.

⁶Khangela, ngizawulethela impilo enhle lokusiliswa; ngizabasilisa abantu bawo, ngibatshengise ukuphumelela lokulondoloza kwami okunengi.

⁷Ngizabuyisa abathunjwa bakoJuda labakoIsrayeli, ngibamise babe njengakuqala,

⁸ngibahlambulule kubo bonke ububi babo abona ngabo kimi, ngibathethelele isono sabo lobubi bokungihlamuka kwabo.

⁹IJerusalema izakuba libizo elingijabulisayo, udumo lwami lokuzincoma kwami, kuzo zonke izizwe zomhlaba ezizakuzwa ngokuhle konke engibenzela khona; zizakwesaba, zithuthumele ngokuhle konke langokuphumelela konke engibenzele khona.

¹⁰I Nkosi ithi: Kulindawo elithi iyinkangala engelamuntu lenyamazana, emizini yakoJuda lendleleni zeJerusalema eziyinkangala engelamuntu lenyamazana, kuzazwakala futhi

¹¹ilizwi lokuthaba lelizwi lentokozo, ilizwi lomyeni lelomakoti, lelizwi labahlabelayo lapho beletha iminikelo yabo yokubonga ethempelini lami besithi: Bongani i Nkosi yamabandla, ngoba ilungile, ngoba isihawu sayo simi kuze kube nininini. Ngoba ngizabuyisa abantu belizwe babe njengakuqala. kutsho i Nkosi.

¹²I Nkosi yamabandla ithi: Kuyona le indawo eyinkangala engelamuntu lenyamazana, lemizini yonke yakhona, kuzakuba khona futhi imizi yabelusi abazaphuma kuyo lemihlambi yabo.

¹³Emizini yemaqaqeni lemizini yeShefela lemizini yeningizimu, lelizweni lakoBhenjamini, ezindaweni eziseduze leJerusalema, lemizini yakoJuda, izimvu zizabuya zidlule phambi kwalabo abazibalayo, kutsho i Nkosi.

¹⁴Khangela, insuku ziyeza, kutsho i Nkosi, lapho ngizagcwalisa isithembiso engasenza endlini yakoIsrayeli lendlini yakoJuda.

¹⁵Ngalezonsuku langalesosikhathi ngizahlumisela uDavida uGatsha olulungileyo, oluzakwenza ukulunga lobuqotho elizweni.

¹⁶Ngalezonsuku uJuda uzakhululwa, leJerusalema ivikeleke. Yileli ibizo elizabizwa ngalo elithi: I Nkosi ukulunga kwethu.

¹⁷Ngoba i Nkosi ithi: UDavida kayikuswela umuntu wokuhlala esihlalweni sobukhosi sendlu kaIsrayeli,

¹⁸lakubapristi abangamaLevi kakuyikusweleka umuntu wokutshisa iminikelo yokutshiswa phambi kwami, lokutshisa iminikelo yempuphu, lokunikela imihlatshelo insuku zonke.

¹⁹Ilizwi le Nkosi lafika kuJeremiya lisithi:

²⁰I Nkosi ithi: Uba lingasephula isivumelwano sami semini lesivumelwano sami sobusuku, ukuze kungabi khona imini lobusuku ngesikhathi sakho,

²¹khona lesivumelwano sami lenceku yami uDavida sizakwephulwa, ukuze angabi landodana yokubusa esihlalweni sakhe sobukhosi, lesivumelwano sami labapristi abangamaLevi abangikhonzayo sizakwephulwa.

²²Njengoba amabutho amazulu engebalwe, letshebetshebe lolwandle lingalinganiseki, ngokunjalo ngizakwandisa inzalo kaDavida inceku yami labapristi abangamaLevi abangikhonzayo.

²³Ilizwi le Nkosi lafika kuJeremiya lathi:

²⁴Kawuqaphelisanga yini abakutshoyo lababantu ukuthi: I Nkosi izilahlile indlu zombili ebizikhethile? Ngalokho-ke babadelela abantu bami, babenza bangabe besaba yisizwe emehlweni abo.

²⁵Itsho njalo i Nkosi: Uba isivumelwano sami singekho emini lebusuku, ngingamisanga izimiso zamazulu lomhlaba,

²⁶ngizalahla inzalo kaJakobe lenzalo kaDavida inceku yami, kangiyikukhetha omunye wenzalo yakhe ukuze abuse phezu kwenzalo kaAbrahama loIsaka loJakobe. Ngoba ngizabuyisa abantu babo, ngibe lesihawu kibo.