Read Ndebele-IBhayibhili Elingcwele 2006 Ujoromiya 35 Bible Online

Ujoromiya 35 - Ndebele-IBhayibhili Elingcwele 2006 bible

Ujoromiya 35

¹Ilizwi le Nkosi elafika kuJeremiya ensukwini zikaJehoyakhimi indodana kaJosiya, inkosi yakoJuda, lathi:

²Yana endlini yamaRekabi, ukhulume lawo, uwalethe ethempelini uwangenise kwenye indlu yalo, ubusuwanika iwayini ukuze anathe.

³Ngasengithatha uJahazaniya indodana kaJeremiya, indodana kaHabaziniya, labafowabo, lawo wonke amadodana akhe, lendlu yonke yamaRekabi.

⁴Ngabaletha ethempelini, ngabangenisa endlini yamadodana kaHanani indodana kaIgidaliya, umuntu kaNkulunkulu, eyayiseduze lendlu yeziphathamandla, ngaphezu kwendlu kaMahaseya indodana kaShaluma umlindisango.

⁵Ngasengibeka phambi kwamaRekabi izimbiza ezigcwele iwayini, kanye lezinkezo, ngathi kibo: Nathani nanti iwayini.

⁶Kodwa baphendula bathi: Kasilinathi iwayini, ngoba uJonadabi indodana kaRekabi, ubaba, wasilaya wathi: Lingalinathi iwayini lina labantwana benu kuze kube nininini,

⁷lingakhi izindlu, lingahlanyeli inhlanyelo, lingabi lazivini; kodwa lihlale emathenteni insuku zenu zonke ukuze lihlale insuku ezinengi elizweni elihlezi kilo.

⁸Salilalela ilizwi likaJonadabi indodana kaRekabi, ubaba, kukho konke asilaya ngakho, ukuthi singanathi iwayini insuku zethu zonke thina labomkethu lamadodana ethu lamadodakazi ethu,

⁹lokuthi singakhi izindlu zokuhlala; kasilazivini lamasimu, kasihlanyeli inhlanyelo,

¹⁰kodwa sihlala emathenteni, senze konke lokho ubaba uJonadabi asilaya khona.

¹¹Kodwa kwathi lapho uNebukadinezari inkosi yeBhabhiloni ifika ukuhlasela ilizwe, sathi: Asihambeni siye eJerusalema, sibalekele ibutho lamaKhaladiya lebutho lamaSiriya. Sesihlala eJerusalema.

¹²Laselifika ilizwi le Nkosi kuJeremiya lisithi:

¹³I Nkosi yamabandla, uNkulunkulu kaIsrayeli ithi: Hamba uyetshela abantu bakoJuda labakhileyo eJerusalema ukuthi: Kaliyikuvuma ukulaywa lokulalela amazwi ami yini? kutsho i Nkosi.

¹⁴Ugciniwe umlayo uJonadabi indodana kaRekabi awunika amadodana akhe wokuthi anganathi iwayini; kuze kube lamuhla kawalinathi, ngoba awulalele umlayo kayise. Lami ngikhulumile kini ngivuke ngovivi ngikhuluma, kodwa kalingilalelanga.

¹⁵Ngithume kini zonke inceku zami abaprofethi, ngivuke ngovivi ngithuma, ngisithi: Phendukani lonke endleleni yenu embi, lenze izenzo zenu zibe zinhle, lingalandeli abanye onkulunkulu ukuthi libakhonze, ukuze lihlale elizweni engalinika lina laboyihlo. Kodwa kalingilalelanga, kalingizwanga.

¹⁶Amadodana kaJonadabi indodana kaRekabi awugcinile umlayo uyise awanika wona, kodwa lababantu kabangilalelanga.

¹⁷Ngakho-ke i Nkosi, uNkulunkulu wamabandla, uNkulunkulu kaIsrayeli, ithi: Khangela, ngizakwehlisela phezu kwabakoJuda laphezu kwabakhileyo bonke eJerusalema konke okubi engikukhulume ngabo; ngoba ngikhulumile kibo, kabangilalelanga, ngibabizile, kodwa kabasabelanga.

¹⁸UJeremiya wathi endlini yamaRekabi: I Nkosi yamabandla, uNkulunkulu kaIsrayeli, ithi: Ngenxa yokuthi lilalele umlayo kaJonadabi uyihlo, lagcina yonke imilayo yakhe, lenza njengokulilaya kwakhe.

¹⁹Ngakho-ke i Nkosi yamabandla, uNkulunkulu kaIsrayeli, ithi: UJonadabi indodana kaRekabi kayikuswela umuntu ozakuma phambi kwami insuku zonke.