Read Ndebele-IBhayibhili Elingcwele 2006 Ujoromiya 39 Bible Online

Ujoromiya 39 - Ndebele-IBhayibhili Elingcwele 2006 bible

Ujoromiya 39

¹Ngomnyaka wesificamunwemunye wokubusa kukaZedekhiya inkosi yakoJuda, ngenyanga yetshumi, uNebukadinezari inkosi yeBhabhiloni lebutho lakhe lonke bafika bayivimbezela iJerusalema.

²Ngomnyaka wetshumi lanye wokubusa kukaZedekhiya, ngosuku lwesificamunwemunye lwenyanga yesine, umuzi wafohlelwa.

³Kwathi iJerusalema isithunjiwe, zonke iziphathamandla zenkosi yeBhabhiloni zeza zahlala esangweni eliphakathi, uNerigali-Sharezi, loSamiganebo, loSarisekimi induna yabathenwa, loNerigali-Sharezi induna yamabutho, lazo zonke ezinye induna zenkosi yeBhabhiloni.

⁴Kwathi lapho uZedekhiya inkosi lawo wonke amabutho bebabona, babaleka, baphuma emzini ebusuku ngendlela yensimu yenkosi, ngesango eliphakathi kwemiduli emibili, baphuma ngendlela yamagceke.

⁵Kodwa ibutho lamaKhaladiya laxotshana labo, lamfica uZedekhiya emagcekeni eJeriko. Selimbambile lamletha kuNebukadinezari inkosi yeBhabhiloni eRibila, elizweni leHamathi, wapha isigwebo phezu kwakhe.

⁶Inkosi yeBhabhiloni yawabulala amadodana kaZedekhiya phambi kwakhe eRibila, yabulala zonke iziphathamandla zakoJuda.

⁷Yamkhupha amehlo uZedekhiya, yambopha ngamaketane ukuze imuse eBhabhiloni.

⁸AmaKhaladiya atshisa indlu yenkosi lezindlu zabantu, adilizela phansi imiduli yeJerusalema.

⁹UNebuzaradani induna yabalindi yabathumba bonke abantu ababesele emzini, yabasa eBhabhiloni, labo ababebalekele kuye.

¹⁰UNebuzaradani induna yabalindi watshiya elizweni lakoJuda abantukazana ababengelalutho, ukuze balime izivini lamasimu ngalesosikhathi.

¹¹UNebukadinezari inkosi yeBhabhiloni walaya uNebuzaradani induna yabalindi ngoJeremiya wathi:

¹²Mthathe, umlondoloze kuhle, ungamenzeli okubi, kodwa wenze lokho akutshela khona.

¹³Ngakho uNebuzaradani induna yabalindi loNebushazibani induna yabathenwa, loNerigali-Sharezi induna yamabutho, lazo zonke induna zenkosi yeBhabhiloni,

¹⁴bamsusa uJeremiya egumeni labalindi, bamnikela kuGedaliya indodana kaAhikhamu, indodana kaShafani, ukuze amuse ekhaya. Wasehlala phakathi kwabantu.

¹⁵Ilizwi le Nkosi lafika kuJeremiya esavalelwe egumeni labalindi, lathi:

¹⁶Hamba uyekuthi kuEbedimeleki umEtiyopiya: I Nkosi yamabandla, uNkulunkulu kaIsrayeli, ithi: Khangela, ngizagcwalisa amazwi ami ngalumuzi ngokubi kungeyisikho ngokuhle, azagcwaliseka phambi kwakho ngalolosuku.

¹⁷Kodwa wena ngizakukhulula ngalolosuku, kutsho i Nkosi, kawuyikunikelwa ezandleni zabantu obesabayo;

¹⁸ngoba ngizakhulula isibili, kawuyikubulawa, kodwa uzaphunyuka, ngoba ungithembile, kutsho i Nkosi.