Read Ndebele-IBhayibhili Elingcwele 2006 Ujoromiya 4 Bible Online

Ujoromiya 4 - Ndebele-IBhayibhili Elingcwele 2006 bible

Ujoromiya 4

¹Uba uphenduka, wena Israyeli, kutsho i Nkosi, phendukela kimi. Uba ususa phambi kwami izinengiso zakho, ungasuki kimi,

²futhi uzafunga: Kuphila kukaJehova, ngeqiniso, ngokwahlulela, langokulunga; lezizwe zizabusiswa kuyo, lakuyo zizincome.

³Ngoba i Nkosi ithi ebantwini bakoJuda labeJerusalema: Qhathani ingqatho yenu, lingahlanyeli phakathi kwameva.

⁴Zisokeleni e Nkosi ni, ukusoka kwenu kube ngokwenhliziyo, lina bantu bakoJuda labeJerusalema, hlezi ulaka lwami luphembeke njengomlilo, luthungele, kungabi khona ongalucitsha, ngenxa yezenzo zenu ezimbi.

⁵Khulumani koJuda, limemeze eJerusalema lithi: Vuthelani uphondo elizweni, limemeze kakhulu lithi: Buthanani, singene emizini ebiyelweyo.

⁶Misani uphawu olukhomba iZiyoni, libaleke lingemi, ngoba ngiletha okubi okuvela ngenyakatho, lokuchitheka okukhulu.

⁷Isilwane siphumile ehlathini laso, umchithi wezizwe uyeza, uphumile endaweni yakhe ukuze achithe ilizwe lakho; lemizi yakho izakuba ngamanxiwa, kungabi khona umuntu kuyo.

⁸Ngenxa yalokho yembatha amalembu amasaka, ukhale ulile; ngoba ulaka lwe Nkosi olwesabekayo kaluhlehlanga kithi.

⁹Kuzakuthi ngalolosuku, kutsho i Nkosi, amakhosi aphelelwe yisibindi kanye leziphathamandla; abapristi bazamangala, labaprofethi bethuke.

¹⁰Ngasengisithi: Hawu, Nkosi Jehova! ubakhohlisile isibili lababantu kanye leJerusalema ngokuthi: Lizakuba lokuthula; kanti inkemba ifinyelela emphefumulweni.

¹¹Ngalesosikhathi kuzakuthiwa kulabobantu lakuyo iJerusalema: Umoya otshisayo ovela enkangala emadundulwini angelalutho, uyavunguza phezu kwabantu bami, ungeyisiwo wokwela lokuhlungula,

¹²kodwa umoya olamandla, uyeza uthunywe yimi. Mina uqobo ngizabagweba.

¹³Khangela, umufo uyeza njengamayezi, inqola zakhe zinjengesivunguzane, lamabhiza akhe alejubane kulokhozi. Maye babo, ngoba sichithekile!

¹⁴Wena Jerusalema, hlambulula inhliziyo yakho kuphume ububi, ukuze uphephe. Koze kube nini imicabango yakho emibi ihlala phakathi kwakho?

¹⁵Ngoba ilizwi liyamemeza lisuka koDani, libika okubi kuvela entabeni yakoEfrayimi.

¹⁶Xwayisani izizwe ukuthi uyeza, khangela, bikani kuyo iJerusalema lithi: Kufika abavimbezeli bevela elizweni elikhatshana; bayamemeza kuyo imizi yakoJuda.

¹⁷Njengabalindi bensimu balihanqa inhlangothi zonke, ngoba lingihlamukele, kutsho i Nkosi.

¹⁸Ukuhamba kwakho lezenzo zakho kukulethele lokho. Lokhu kuyikuphela kwakho, kuyababa, sekufinyelele enhliziyweni yakho uqobo.

¹⁹Ngilobuhlungu obukhulu, ngiyazitshila ngenxa yobuhlungu. Maye inhliziyo yami! Inhliziyo yami iyatshaya, kangilakuthula; ngoba ngizwile ukukhala kophondo, lomkhosi wempi.

²⁰Ukuchitheka kulandela ukuchitheka, ilizwe lonke lichithekile. Amathente ethu adilikile masinyane, lamakhetheni awo ngokucwayiza kwelihlo.

²¹Koze kube nini ngibona isiboniso, ngizwe ukukhala kophondo?

²²Abantu bami bayizithutha, kabangazi; bangabantwana abayiziphukuphuku, kabalakuqedisisa. Bahlakaniphele ukwenza okubi, kodwa ukwenza okuhle kabakwazi.

²³Ngabona umhlaba, khangela, wawuze ungelalutho, lamazulu ayengelakukhanya.

²⁴Ngabona izintaba, khangela, zazinyikinyeka, lamaqaqa wonke ayenyakazela.

²⁵Ngabona, khangela, kakulamuntu, lenyoni zonke zamazulu zasezibalekile.

²⁶Ngabona, khangela, ilizwe elivundileyo liyinkangala, lemizi yalo yonke yayidiliziwe phambi kwe Nkosi, laphambi kolaka lwayo oluvuthayo.

²⁷Ngoba i Nkosi ithe: Ilizwe lonke lizachitheka, kodwa kangizukuliqeda ngokupheleleyo.

²⁸Ngenxa yalokho umhlaba uzalila lamazulu aphezulu abe mnyama; ngoba sengikukhulumile engikuqondileyo; kangiyikuzisola, ngibuyele emuva.

²⁹Imizi yonke iyabaleka ngenxa yomsindo wabagadi bamabhiza labaphathi bamadandili; bangena ezixukwini bakhwele emadwaleni, imizi yonke isele ize, kakho ohlala kiyo.

³⁰Wena-ke, uzakwenzani? Loba ugqoka okubomvu, ufaka izigqizo zegolide, ugcoba amehlo akho ngomuthi, uzicecisela ize, ngoba izithandwa zakho ziyakudelela, zidinga ukukubulala.

³¹Ngoba ngizwile ilizwi kungathi ngelowesifazana ohelelwayo, ukukhala okubuhlungu okunjengokozibulayo; yikukhala kweZiyoni ekhefuzelayo, iselula izandla zayo isithi: Maye mina! Ngiphelelwa ngamandla ngoba nampa ababulali bayeza.