Read Ndebele-IBhayibhili Elingcwele 2006 Ujoromiya 41 Bible Online

Ujoromiya 41 - Ndebele-IBhayibhili Elingcwele 2006 bible

Ujoromiya 41

¹Kwathi ngenyanga yesikhombisa uIshmayeli indodana kaNethaniya, kaElishama, owenzalo yenkosi, wafika lamadoda alitshumi kuGedaliya indodana kaAhikhamu eMizipa. Kwathi besadla laye eMizipa,

²uIshmayeli indodana kaNethaniya lamadoda alitshumi ayelaye bamtshaya ngenkemba uGedaliya indodana kaAhikhamu, kaShafani, bambulala, yena inkosi yeBhabhiloni eyayimbeke ukuba ngumbusi elizweni.

³UIshmayeli watshaya lawo wonke amaJuda ayeloGedaliya eMizipa, kanye lamabutho amaKhaladiya ayekhona lapho.

⁴Ngosuku lwesibili sebembulele uGedaliya, kungakaziwa muntu,

⁵kwafika amadoda angamatshumi ayisificaminwembili evela eShekema leShilo leSamariya, ephucile indevu zawo, lezigqoko zawo zidatshuliwe, lemizimba yawo isikiwe, eletha iminikelo yempuphu kanye lempepha ukuyinikela ethempelini.

⁶UIshmayeli indodana kaNethaniya wasuka eMizipa ukuwahlangabeza, ehamba ekhala inyembezi. Kwathi lapho ehlangana lawo, wathi kuwo: Wozani kuGedaliya indodana kaAhikhamu.

⁷Kwathi esengenile emzini, uIshmayeli indodana kaNethaniya lamadodana ayelaye bawabulala, bawaphosela emgodini.

⁸Kodwa kwakulamadoda alitshumi phakathi kwawo athi kuIshmayeli: Ungasibulali. ngoba sileziphala ezigcwele ingqoloyi lebhali* lamafutha kanye loluju, sikufihlile egangeni. Ngakho wawayekela, kaze awabulala.

⁹Umgodi uIshmayeli ayephosele kuwo izidumbu zabo bonke abantu ayebatshayile, wawungumgodi omkhulu owawenziwe yinkosi uAsa ukuzivikela kuBahasha inkosi yakoIsrayeli. UIshmayeli indodana kaNethaniya wawugcwalisa ngezidumbu.

¹⁰UIshmayeli wasethumba bonke abantu ababesele eMizipa, amadodakazi enkosi labo bonke ababesele eMizipa, uNebuzaradani induna yabalindi ayebanikezele kuGedaliya indodana kaAhikhamu. UIshmayeli indodana kaNethaniya wabathumba, wabasa kumaAmoni.

¹¹Kodwa kwathi lapho uJohanani indodana kaKareya lazo zonke induna zamabutho ezazilaye besizwa konke okubi okwenziwe nguIshmayeli indodana kaNethaniya,

¹²bathatha abantu babo bonke, bayakulwa loIshmayeli. Bamfica echibini elikhulu eliseGibeyoni.

¹³Kwathi lapho bonke abantu ababeloIshmayeli bebona uJohanani indodana kaKareya lazo zonke induna zebutho ezazilaye bathokoza.

¹⁴Basebetshibilika abantu bonke uIshmayeli ayebathumbe eMizipa, babuya baya kuJohanani indodana kaKareya.

¹⁵Kodwa uIshmayeli indodana kaNethaniya waphunyuka kuJohanani lamadoda ayisificaminwembili, wabalekela kumaAmoni.

¹⁶UJohanani indodana kaKareya lazo zonke induna zamabutho ezazilaye bathatha bonke abantu ababesele uIshmayeli indodana kaNethaniya ayebathumbe eMizipa, esetshaye uGedaliya indodana kaAhikhamu, amadoda empi, labafazi, labantwana, labathenwa, labo uJohanani ayebuyele labo eGibeyoni.

¹⁷Basuka bayahlala eGeruthi-Kimihamu eduze leBhethelehema, bezama ukuya eGibhithe,

¹⁸bebalekela amaKhaladiya; ngoba babewesaba, ngoba uIshmayeli kaNethaniya wayetshaye uGedaliya indodana kaAhikhamu, inkosi yeBhabhiloni eyayimbekile ukuba ngumbusi welizwe.