Read Ndebele-IBhayibhili Elingcwele 2006 Ujoromiya 43 Bible Online

Ujoromiya 43 - Ndebele-IBhayibhili Elingcwele 2006 bible

Ujoromiya 43

¹Kwathi lapho uJeremiya eseqedile ukukhuluma ebantwini wonke lamazwi e Nkosi uNkulunkulu wabo eyayimthume wona kibo,

²uAzariya indodana kaHoshaya, loJohanani indodana kaKareya, labo bonke abantu abazikhukhumezayo, bathi kuJeremiya: Uqamba amanga. I Nkosi uNkulunkulu wethu kayikuthumanga ukuze uthi kithi: Lingayi eGibhithe ukuze lihlale khona;

³kodwa uBaruki indodana kaNeriya uyakuxabanisa lathi ukuze asinikele kumaKhaladiya ukuze asibulale, kumbe asithumbe asise eBhabhiloni.

⁴Ngakho uJohanani indodana kaKareya, lazo zonke induna zebutho, labo bonke abantu kabalilalelanga ilizwi le Nkosi ukuze bahlale elizweni lakoJuda.

⁵UJohanani indodana kaKareya lazo zonke induna zebutho bathatha bonke abaseleyo bakoJuda ababebuyele ukuhlala elizweni lakoJuda bevela kuzo zonke izizwe ababexotshelwe kuzo, baya labo eGibhithe,

⁶amadoda, labafazi, labantwana, amadodakazi enkosi, bonke abantu uNebuzaradani induna yabalindi ayebatshiye kuGedaliya indodana kaAhikhamu, indodana kaShafani; bathatha loJeremiya umprofethi loBaruki indodana kaNeriya.

⁷Bayafika elizweni leGibhithe, ngoba kabalilalelanga ilizwi le Nkosi; bafikela eTahafanesi.

⁸Laselifika ilizwi le Nkosi kuJeremiya eseTahafanesi,

⁹lathi: Thatha amatshe amakhulu, uwafihle endaweni egandelweyo esangweni lesigodlo sikaFaro eTahafanesi, phambi kwabantu bakoJuda,

¹⁰uthi kibo: I Nkosi yamabandla, uNkulunkulu kaIsrayeli, ithi: Khangela, ngizabiza uNebukadinezari inkosi yeBhabhiloni inceku yami; uzamisa isihlalo sakhe sobukhosi phezu kwalamatshe engiwabekileyo, amise ithente lakhe phezu kwawo.

¹¹Uzafika, atshaye ilizwe leGibhithe, labo abamiselwe umkhuhlane abanikele emkhuhlaneni, abamiselwe ukuthunjwa abanikele ekuthunjweni, labamiselwe inkemba abanikele enkembeni;

¹²aphembe umlilo emathempelini abonkulunkulu beGibhithe, abatshise, abathumbe, alicuthe ilizwe leGibhithe njengomelusi ecutha isigqoko sakhe esigcwele izibungu, asuke khona esenqobile.

¹³Uzakwephula insika zeHeliyopolisi eziyizithombe elizweni leGibhithe, atshise ngomlilo amathempeli abonkulunkulu beGibhithe.