Read Ndebele-IBhayibhili Elingcwele 2006 Ujoromiya 44 Bible Online

Ujoromiya 44 - Ndebele-IBhayibhili Elingcwele 2006 bible

Ujoromiya 44

¹Ilizwi elafika kuJeremiya ngawo wonke amaJuda ayehlala elizweni leGibhithe eMigidoli leTahafanesi, leMemfisi, laselizweni lePatrosi,

²lathi: I Nkosi yamabandla, uNkulunkulu kaIsrayeli, ithi: Likubonile konke okubi engakwehlisela phezu kweJerusalema laphezu kwayo yonke imizi yakoJuda. Khangela, lamuhla iyinkangala, kakulamuntu ohlala khona,

³ngenxa yobubi babo ababenzayo, bangivusa ulaka ngoba batshisa impepha, bakhonza abanye onkulunkulu abangabaziyo bona kanye lani laboyihlo.

⁴Kanti ngathuma inceku zami zonke abaprofethi, ngivuke ngovivi ngathuma, ngisithi: Lingayenzi linto enengisayo lengiyizondayo.

⁵Kodwa kabalalelanga kabezwanga, ukuthi baphenduke ebubini babo, bangatshiseli abanye onkulunkulu impepha.

⁶Ngakho ulaka lwami lokuthukuthela kwami kwavutha emizini yonke yakoJuda lendleleni zeJerusalema; zaphenduka zaba yinkangala, zachitheka njengalamuhla nje.

⁷Ngakho-ke i Nkosi, uNkulunkulu wamabandla. uNkulunkulu kaIsrayeli, ithi: Likwenzelani phezu kwenu lokhu okubi kangaka, ukuthi liqume basuke kini indoda lomfazi, usane lomntwana, baphele koJuda, kungasali muntu?

⁸Kungani lingithukuthelisa ngezithombe zenu, litshisela abanye onkulunkulu impepha elizweni leGibhithe lapho eselihlala khona, ukuze libhujiswe, liphenduke into yokuthukwa leyokuhlekwa phakathi kwazo zonke izizwe zasemhlabeni?

⁹Selakhohlwa yini ububi baboyihlo, lobubi bamakhosi akoJuda, lobubi babomkabo, lobenu ububi, lobubi babomkenu, elabenza elizweni lakoJuda lendleleni zeJerusalema?

¹⁰Kalizithobanga kuze kube lamuhla, futhi kalesabanga, kalihambanga ngomlayo wami langezimiso zami engazibeka phambi kwenu laphambi kwaboyihlo.

¹¹Ngakho-ke i Nkosi yamabandla, uNkulunkulu kaIsrayeli, ithi: Khangela, ngizalenzela okubi ukuze ngiliqede elizweni lonke lakoJuda.

¹²Ngizathatha abaseleyo koJuda abafise ukuzahlala elizweni leGibhithe, bazabhubha bonke, babulawe ngenkemba layindlala elizweni iGibhithe, baphele bonke abancinyane labakhulu, babe yinto eyenyanyekayo, into eyesabekayo, leyokuthukwa, leyokuhlekwa.

¹³Ngizatshaya labo abahlezi elizweni leGibhithe, njengoba ngatshaya iJerusalema, ngenkemba langendlala langomatshayabhuqe wesifo,

¹⁴ukuze kungabi khona loyedwa kwabaseleyo koJuda, abafikileyo ukuhlala elizweni leGibhithe, ozaphunyuka asile, abuyele elizweni lakoJuda abafisa ukubuyela kulo, bahlale khona; ngoba kabayikubuyela kuphela abaphunyukileyo.

¹⁵Wonke amadoda ayesazi ukuthi omkabo batshisela abanye onkulunkulu impepha, labo bonke abesifazana ababekhona belibandla elikhulu, labo bonke abantu ababehlala ePatrosi elizweni leGibhithe, bamphendula uJeremiya bathi:

¹⁶Ilizwi olikhulume kithi ebizweni le Nkosi kasiyikulilalela.

¹⁷Kodwa sizakwenza konke esizimisele ukukwenza; sizatshisela indlovukazi yamazulu impepha, siyithululele iminikelo yokunathwayo, njengoba besisenza thina, labobaba, lamakhosi ethu, leziphathamandla zethu, emizini yakoJuda lendleleni zeJerusalema; ngoba sasilokudla okunengi, sihlezi kuhle singaboni okubi.

¹⁸Kodwa lokhu sayekela ukutshisela indlovukazi yamazulu impepha lokuyithululela iminikelo yokunathwayo, siswele konke, siqedwe ngenkemba layindlala.

¹⁹Abesifazana bona bathi: Lapho sasitshisela indlovukazi yamazulu impepha, siyithululela iminikelo yokunathwayo, kumbe siyenzela izinkwa ezilomfanekiso wayo, siyithululela iminikelo yokuthululwa, sakwenza lokho ngaphandle kwemvumo yabomkethu yini?

²⁰UJeremiya wasesithi kubo bonke abantu, amadoda labesifazana, bonke ababemphendule ngalawomazwi:

²¹Impepha elayitshisa emizini yakoJuda lendleleni zeJerusalema, lina laboyihlo, lamakhosi enu, leziphathamandla zenu, labantu belizwe, i Nkosi kayikukhumbulanga yini? Kakungenanga engqondweni yayo yini?

²²I Nkosi yayingaselakuthwala okubi kwemisebenzi yenu lezinengiso elazenzayo; ngakho-ke ilizwe lenu lachitheka, laba yinkangala, laba yisiqalekiso, kakusekho okuhlala khona njengoba kunjalo lamuhla.

²³Kungenxa yokuthi litshisile impepha, lona e Nkosi ni, lingalilalelanga ilizwi layo, lingahambanga ngomlayo wayo langezimiso zayo langemithetho yayo, ngalokho okubi lokhu kwehlele phezu kwenu njengalamuhla nje.

²⁴UJeremiya wathi kubo bonke abantu lakwabesifazana bonke: Zwanini ilizwi le Nkosi, lina lonke bakoJuda eliselizweni leGibhithe.

²⁵Itsho njalo i Nkosi yamabandla, uNkulunkulu kaIsrayeli, ithi: Lina labomkenu likukhulumile ngemilomo yenu, lakugcwalisa ngezandla zenu, lisithi: Sizakwenza lokwenza izithembiso zethu esizithembisayo zokutshisela indlovukazi yamazulu impepha, lokuyithululela iminikelo yokunathwayo. Lizaqinisa lokuqinisa izithembiso zenu, lenze sibili izithembiso zenu!

²⁶Ngakho zwanini ilizwi le Nkosi, lonke Juda elihlala elizweni leGibhithe: Khangelani, mina ngifungile ngebizo lami elikhulu, kutsho i Nkosi, ukuthi isibili ibizo lami kalisayikubizwa ngumlomo waloba ngubani wakoJuda, elizweni lonke leGibhithe, esithi: Kuphila kweNkosi uJehova.

²⁷Khangela, ngilindele ukubenza okubi, kungeyisikho okuhle; bonke abakoJuda elizweni leGibhithe bazaqedwa ngenkemba layindlala, baze baphele bonke.

²⁸Labo abaphepha enkembeni bazabuyela elizweni lakoJuda bevela elizweni leGibhithe, bebalutshwana nje; labo bonke abaseleyo koJuda abeze elizweni leGibhithe ukuhlala khona, bazakwazi ukuthi ilizwi elizakuma ngelikabani, elami kumbe elabo.

²⁹Lokhu kuzakuba yisibonakaliso kini, kutsho i Nkosi, ukuthi ngizalitshaya kulindawo, ukuze lazi ukuthi amazwi ami engiwakhuluma ngani azakuma isibili.

³⁰I Nkosi ithi: Khangelani, ngizanikela uFaro Hofra inkosi yeGibhithe ezandleni zezitha zakhe, lezandleni zalabo abamzingelayo, njengoba nganikela uZedekhiya inkosi yakoJuda esandleni sikaNebukadinezari inkosi yeBhabhiloni, owayeyisitha sakhe emzingela.