Read Ndebele-IBhayibhili Elingcwele 2006 Ujoromiya 46 Bible Online

Ujoromiya 46 - Ndebele-IBhayibhili Elingcwele 2006 bible

Ujoromiya 46

¹Nanti ilizwi le Nkosi elafika kuJeremiya umprofethi ngezizwe.

²Mayelana leGibhithe. Ngebutho likaFaro Neko inkosi yeGibhithe, elalisemfuleni iYufrathi, eKarikemishi, alitshayayo uNebukadinezari inkosi yeBhabhiloni ngomnyaka wesine wokubusa kukaJehoyakhimi indodana kaJosiya, inkosi yakoJuda, ilizwi lathi:

³Lungisani amahawu lezihlangu ezinkulu, liye empini.

⁴Bophelani amabhiza, ligade lina bagadi bamabhiza. Lisuke lime, lithwele ingowane zenu, lilole imikhonto yenu, ligqoke amabhatshi enu ensimbi.

⁵Ngibonani? Sebephele amandla, babuyele emuva. Lamaqhawe abo ayehlulwa, ayabaleka, kawanyemukuli emuva; lokwesaba kusenhlangothini zonke, kutsho i Nkosi.

⁶Olejubane kalakubaleka, leqhawe kalilakuphunyuka; ngenyakatho eceleni komfula iYufrathi bakhubekile, bawa.

⁷Ngubani lo okhukhumala njengeNile, njengemifula elamanzi aqubukayo?

⁸IGibhithe likhukhumala njengeNile, njengemifula elamanzi aqubukayo. Lithi: Ngizakhukhumala, ngiwusibekele umhlaba, ngichithe imizi kanye labahlala kiyo.

⁹Qhubekelani phambili, lina mabhiza, liye phambili njengabahlanyayo, lina zinqola. Kawaphume amaqhawe, amadoda eEtiyopiya lePuti aphatha izihlangu, lamadoda eLudi akwazi ukubamba lokugobisa idandili.

¹⁰Lolosuku lusuku lwe Nkosi, i Nkosi yamabandla, losuku lwempindiselo ukuze iziphindisele ezitheni zayo. Inkemba izakudla isuthe, yeneliswe ligazi labo. Ngoba iNkosi, i Nkosi yamabandla, izakwenza umhlatshelo elizweni lenyakatho emfuleni iYufrathi.

¹¹Yehlela eGileyadi, uyethatha ibhalisamu*, ntombi emsulwa, ndodakazi yeGibhithe. Lokhu eyakho yonke iyize, ngoba kawusili.

¹²Izizwe zizwile ngehlazo lakho, lomhlaba ugcwele ukukhala kwakho; ngoba iqhawe likhutshwa ngelinye iqhawe, awele phansi womabili.

¹³Ilizwi le Nkosi eyalikhuluma kuJeremiya umprofethi ngokuza kukaNebukadinezari inkosi yeBhabhiloni ukutshaya ilizwe leGibhithe, lathi:

¹⁴Memezelani eGibhithe, lizwakalise eMigidoli, limemeze eMemfisi leTahafanesi, lithi: Sukumani, lime, lizilungiselele, ngoba umkhonto uzakudla inhlangothi zonke zenu.

¹⁵Ubalekeleni uApisi? Kayimanga ngani linkunzi yakho? Kungoba i Nkosi yayilahla phansi.

¹⁶Abanengi benu bakhubeka bawa, bakhulumisana besithi: Vukani, sibuyele ebantwini bakithi, lelizweni esazalelwa kilo, ngenxa yenkemba yomchithi.

¹⁷Bizani uFaro inkosi yeGibhithe ngokuthi: Ngumsindo okhutha ithuba. Wekele isikhathi esimisiweyo sedlula.

¹⁸Ngifunga ngami uqobo, kutsho iNkosi, mina engiyi Nkosi yamabandla. NjengeThabhori phakathi kwezintaba lanjengeKharmeli phansi kolwandle uzafika othile.

¹⁹Zilungiseleni umthwalo wokuthunjwa, lina beGibhithe. Ngoba iMemfisi izakuba yinkangala, lonxiwa olungahlalwa muntu.

²⁰IGibhithe lilithokazi elihle, kodwa isibawu esivela enyakatho sesifikile kulo.

²¹Lamabutho alo aqatshiweyo akhona phakathi kwalo anjengamathole anonileyo; abuyela emuva, abaleka kanyekanye, kawemanga, ngoba usuku lokuhlupheka kwawo luwehlele, isikhathi sempindiselo yawo.

²²Liyahotshoza njengenyoka ebalekayo; ngoba izitha zalo ziyeza zilibutho, ziphethe amahloka njengabantu abagamulayo izihlahla.

²³Zizagamula amahlathi alo, kutsho i Nkosi, lanxa engangeneki, ngoba zinengi okwedlula isikhonyane, kazilakubalwa.

²⁴AmaGibhithe azayangeka, azanikelwa ezandleni zabantu abavela enyakatho.

²⁵I Nkosi yamabandla, uNkulunkulu kaIsrayeli, ithi: Khangela, ngizatshaya uAmoni weNo, loFaro, leGibhithe kanye labonkulunkulu babo, lamakhosi alo, yebo uFaro kanye labamthembayo.

²⁶Ngizabanikela ezandleni zalabo ababazingelayo, esandleni sikaNebukadinezari inkosi yeBhabhiloni lenduna zakhe, emva kwalokho iGibhithe lakhiwe futhi njengensukwini zendulo, kutsho i Nkosi.

²⁷Kodwa ungesabi, wena Jakobe nceku yami, ungatshaywa luvalo, wena Israyeli, ngoba khangela, ngizakukhulula usekhatshana, lenzalo yakho elizweni lokuthunjwa kwayo. UJakobe uzabuya aphumule, ahlale kuhle, angethuswa muntu.

²⁸Ungesabi, wena Jakobe nceku yami, kutsho i Nkosi, ngoba ngilawe. Ngizachitha ngokupheleleyo zonke izizwe engikuxotshele kuzo, kodwa wena kangiyikukuqeda ngokupheleleyo. Ngizakukhuza ngokufaneleyo, kangiyikukuyekela.