Read Ndebele-IBhayibhili Elingcwele 2006 Ujoromiya 48 Bible Online

Ujoromiya 48 - Ndebele-IBhayibhili Elingcwele 2006 bible

Ujoromiya 48

¹Mayelana loMowabi. I Nkosi yamabandla, uNkulunkulu kaIsrayeli, ithi: Maye ngeNebo! ngoba ichithekile. IKiriyathayimi iyangekile, inqotshiwe; inqaba iyangekile, yadilika;

²udumo lukaMowabi kalusekho. EHeshiboni baceba okubi ngayo, bathi: Wozani siyiqume, ingabe isaba yisizwe. Lani elihlala eMadimeni lizachitheka, baxotshane lani ngenkemba.

³Zwanini, ilizwi lokukhala livela eHoronayimi lisithi: Ukuchithwa, lokutshabalala okukhulu!

⁴IMowabi uchithekile; ukukhala kuzwakala kuze kufike eZowari.

⁵Emadundulwini eLubithi bakhwela bekhala, lekwehleni ukuya eHoronayimi bazwile ukukhala kokuchitheka.

⁶Balekani, lisindise umphefumulo wenu, libe njengobabhemi weganga enkangala.

⁷Ngoba ngenxa yokuthi lathemba inqaba zenu lenotho yenu lani lizathunjwa; uKemoshi uzathunjwa kanye labapristi bakhe lezikhulu zakhe.

⁸Umchithi uzafikela yonke imizi, kawukho lowodwa ozasala; isihotsha sizachitheka, lamagceke aqothulwe, njengokutsho kwe Nkosi.

⁹Bekelani uMowabi ilitshe lengcwaba, ngoba uMowabi uzachitheka masinyane, imizi yakhe izakuba ngamanxiwa angelamuntu.

¹⁰Uqalekisiwe lowo owenza umsebenzi we Nkosi ngokungananzeleli; uqalekisiwe lalowo ogodla inkemba yakhe ekuchitheni igazi.

¹¹UMowabi uchelesile kusukela ebutsheni bakhe, ubehlezi ezinzile; kathululelwanga embizeni ngembiza, kathunjwanga; ngakho ukunambitheka kwakhe kuhlala kunjalo, iphunga lakhe kaliphenduki.

¹²Ngakho khangela, insuku ziyeza, kutsho i Nkosi, lapho ngizathuma kuye abathambeki abazamthambeka, bathulule imbiza zakhe, babulale inqayi zakhe.

¹³Khona-ke uMowabi uzakuba lenhloni ngoKemoshi, njengalokho indlu kaIsrayeli yaba lenhloni ngeBhetheli, ithemba layo.

¹⁴Lingatsho njani ukuthi: Singamaqhawe lamadoda empi alamandla?

¹⁵Umchithi kaMowabi lemizi yakhe usefikile, lamajaha akhe akhethiweyo sehlele ekubulaweni, kutsho iNkosi eyi Nkosi yamabandla.

¹⁶Ukuhlupheka kukaMowabi kusondele, lokutshaywa kwakhe kuyaphangisa.

¹⁷Likhalelani, lina lonke elimzingelezeleyo, lani lonke elazi ibizo lakhe; lithi: Yeka ukwaphuka kwenduku elamandla, udondolo oluhle!

¹⁸Yehla ebukhosini bakho, uhlale emhlabathini owomileyo, wena ohlala eDiboni. Ngoba umchithi kaMowabi usekufikele, wachitha inqaba zakho.

¹⁹Mana endleleni, ulinde, wena ohlala eAroweri. Ubuze obalekayo lalowo ophunyukileyo uthi: Kwenze njani?

²⁰UMowabi uyangekile, ngoba uchithekile; lilani likhale; libike eArinoni ukuthi uMowabi uchithekile.

²¹Isigwebo sehlele phezu kwelizwe elilamagceke, eHoloni leJahazi leMefahathi,

²²leDiboni leNebo leBeti-Dibilathayimi,

²³leKiriyathayimi, leBeti-Gamuli, leBeti-Meyoni,

²⁴leKeriyothi leBozira, lakuyo yonke imizi yelizwe lakoMowabi, eduze lakhatshana.

²⁵Uphondo lukaMowabi luqunyiwe, lengalo yakhe yephukile, kutsho i Nkosi.

²⁶Mdakiseni, ngoba ezikhukhumezile e Nkosi ni; uMowabi uzazibhixa emahlanzweni akhe, abe yinhlekisa.

²⁷UIsrayeli kabanga yinhlekisa kuwe yini? Watholakala phakathi kwamasela yini ukuthi lapho ukhuluma ngaye, unikine ikhanda lakho?

²⁸Tshiyani imizi, lihlale phakathi kwamadwala, lina elihlala koMowabi. Libe njengejuba elakha isidleke salo emaweni.

²⁹Sizwile ngokuzigqaja kukaMowabi; uyazigqaja kakhulu. Sizwile ngokuziphakamisa kwakhe, lokuziqakisa kwakhe, langokuzikhukhumeza kwakhe.

³⁰Ngiyakwazi ukudelela kwayo, kutsho i Nkosi; ukuzincoma kwayo kuyinkohliso, lezenzo zayo ziyinkohliso.

³¹Ngalokho-ke ngiyalila ngoMowabi, ngikhale ngabo bonke abakoMowabi, ngililele abantu beKiri-Heresi.

³²Ngiyakukhalela inyembezi wena vini leSibima ukudlula iJazeri. Ingatsha zakho zedlula phezu kolwandle, zaze zafinyelela eJazeri. Umchithi wehlele phezu kwezithelo zakho zehlobo lemavinini akho avuniweyo.

³³Ukuthaba lentokozo kususiwe elizweni lakoMowabi elilenala enengi; ngiqedile iwayini ezikhamelweni; kakho osakhama izithelo zevini ngentokozo, lomsindo wentokozo kawusekho.

³⁴Ukukhala kweHeshiboni leEleyale kuzwakala kuze kube seJahazi. Ukukhala okukhulu kuzwakala eZowari kuze kufike eJoronayimi leEgilathi-Shelishiya; ngoba amanzi aseMimrimi lawo asesitsha.

³⁵Ngizaqeda koMowabi lowo onikela umhlatshelo endaweni ephakemeyo yokukhonzela, atshisele uNkulunkulu wakhe impepha, kutsho i Nkosi.

³⁶Ngakho-ke inhliziyo yami ikhalela uMowabi njengomhubhe, inhliziyo yami iyakhala njengomhubhe ngabantu beKiri-Heresi; inotho ababeyizuzile ichithekile.

³⁷Ngoba wonke amakhanda aphuciwe, lazo zonke indevu zigeliwe; izandla zonke zilamanxeba, bonke bavunule amalembu amasaka enkalweni.

³⁸Phezu kwazo zonke indlu zamaMowabi kanye lemagumeni akhona yikukhala kuphela; ngoba ngimbulele uMowabi njengembiza engananzwa muntu, kutsho i Nkosi.

³⁹Yeka ukufa kwayo! Yeka ukukhala kwayo! Yeka ukuphendula intamo kukaMowabi elenhloni! Ngakho uMowabi uphenduke waba yinhlekisa, lento eyesabekayo kibo bonke abaseduze laye.

⁴⁰Ngoba i Nkosi ithi: Khangela, ukhona ozaphapha njengokhozi, elulele impiko zakhe koMowabi.

⁴¹Imizi izathunjwa, lezinqaba zithathwe, kuthi inhliziyo zamaqhawe koMowabi ngalolosuku zibe njengenhliziyo yowesifazana ohelelwayo.

⁴²UMowabi uzachithwa, angabe esaba yisizwe, ngoba wazikhukhumeza e Nkosi ni.

⁴³Ukwesaba lomgodi lomjibila kuphambi kwenu, lina elihlala koMowabi, kutsho i Nkosi.

⁴⁴Obalekela ukwesaba uzawela emgodini, lophuma emgodini uzabanjwa ngumjibila. Ngoba lezizinto ngizazehlisela koMowabi ngomnyaka wempindiselo yabo, kutsho i Nkosi.

⁴⁵Emthunzini weHeshiboni ababalekayo bayema bephelelwe ngamandla, ngoba umlilo uphumile eHeshiboni, lelangabi liphumile endlini kaSihoni, umlilo utshisile imingcele yakoMowabi, lezingqonga zabantu besiphithiphithi.

⁴⁶Maye kuwe, wena Mowabi! Abantu bakaKemoshi baphelile, ngoba amadodana akho athunjiwe, lamadodakazi akho asiwe ekuthunjweni.

⁴⁷Kodwa ngizabuyisa abantu bakoMowabi ensukwini ezizayo, kutsho i Nkosi. Siphela lapha isigwebo sakoMowabi.