Read Ndebele-IBhayibhili Elingcwele 2006 Ujoromiya 49 Bible Online

Ujoromiya 49 - Ndebele-IBhayibhili Elingcwele 2006 bible

Ujoromiya 49

¹Mayelana lamaAmoni. I Nkosi ithi: UIsrayeli kalamadodana yini? Kalayo indlalifa yini? Abakhonza uMilkomu bathathelani ilizwe lakoGadi, bahlale emizini yalo?

²Ngakho khangela, insuku ziyeza, kutsho i Nkosi, lapho ngizakwenza ukuthi kuhlatshwe umkhosi wempi ngeRaba elamaAmoni. Lizachitheka, lemizi yayo itshiswe ngomlilo; loIsrayeli alithathe futhi ilizwi lakhe kulabo abamemukayo, kutsho i Nkosi.

³Lila, Heshiboni, ngoba iAyi ichithekile. Khalani, lina besifazana beRaba. Ligqoke amalembu amasaka, lilile, lizisike ngezingqamu; ngoba uMilkomu uzathunjwa kanye labapristi bakhe leziphathamandla zakhe.

⁴Lizincomelani ngenotho yenu, lina elingathembekanga, elilenotho ephelayo, elithemba amandla enu lisithi: Ngubani ongasihlasela?

⁵Khangelani, ngizakwehlisela ukwesaba okukhulu phezu kwenu, kutsho iNkosi, i Nkosi yamabandla, kuvela kubo bonke abaseduze lani, lizaxotshwa, kube ngulowo lalowo ngendlela yakhe, kungabi khona obutha abaphunyukileyo.

⁶Kodwa emva kwalokho ngizabuyisa abantu beAmoni, kutsho i Nkosi.

⁷Mayelana leEdoma. I Nkosi yamabandla ithi: Kakusekho yini ukuhlakanipha eThemani? Amacebo aphelile kwabaqondileyo yini? Ukuhlakanipha kwabo kuphelile yini?

⁸Balekani, libuyele emuva, licatshe endaweni eziminyeneyo, lina bahlala eDedani. Ngoba ngizakwehlisela inhlupheko phezu kukaEsawu ngesikhathi sokumphindisela kwami.

⁹Uba abavuna amavini befika kuwe kabayikutshiya yini ingcosana? Uba amasela efika ebusuku, kawayikuphanga yini aze azikholise?

¹⁰Kodwa uEsawu ngimhlubule waze wasalaze, ngizembule indawo zakhe zokucatsha, kaselakho ukucatsha. Abantwana bakhe babulewe, labazalwane bakhe kanye labomakhelwane bakhe; yena kasekho.

¹¹Tshiya izintandane zakho, ngizazilondoloza, abafelokazi bakho kabathembe kimi.

¹²Ngoba i Nkosi ithi: Khangela, uba labo ababengafanele ukuyinatha inkezo yesigwebo bemele ukuyinatha, wena uzayekelwa ungatshaywa yini? Kawuyikuyekelwa, kodwa lawe uzayinatha.

¹³Ngoba ngifungile ngami uqobo, kutsho i Nkosi, ukuthi iBozira izakuba yinto eyesabekayo, into yokuhlekwa, lenkangala, lesiqalekiso, lemizi yayo yonke izahlala iyinkangala kokuphela.

¹⁴Ngizwile imibiko evela e Nkosi ni, lesithunywa sithunyiwe phakathi kwezizwe, ukuthi: Buthanani, liyihlasele, lisukele impi.

¹⁵Ngoba khangela, ngizakwenza ube mncinyane phakathi kwezizwe, udeleleke phakathi kwabantu.

¹⁶Ukwesabeka kwakho kukukhohlisile, kanye lokuziqhenya kwenhliziyo yakho, wena ohlala ezingoxweni zamawa, lobamba ingqonga yoqaqa. Loba usakha isidleke sakho endaweni ephakemeyo njengokhozi, ngizakwehlisa khona, kutsho i Nkosi.

¹⁷IEdoma lizakuba yinto eyesabekayo; wonke umuntu odlula kulo uzakwethuka, ancife ngenxa yakho konke ukuhlupheka kwalo.

¹⁸Njengasekuphezu kukaEsawu ngesikhathi sokugenqulwa kweSodoma leGomora, kanye lemizi yakhona, kutsho i Nkosi, kakuyikwakha indodana yomuntu khona, ihlale khona.

¹⁹Khangela, njengesilwane esiphuma ehlathini leJordani sisiya emadlelweni, ngokucwayiza kwelihlo ngibaxotshe basuke kulo, ngilibekele lowo engimkhethileyo. Ngoba ngubani ofanana lami? Ngubani ozangibiza? Nguwuphi umelusi ongema phambi kwami?

²⁰Ngakho, zwanini icebo i Nkosi elenzayo ngeEdoma, lemikhumbulo elayo ngabantu abahlala eThemani ukuthi: Abancinyane bomhlambi bazadonswa basuswe; lendawo yabo imangale ngokuphela kwabo.

²¹Ngomsindo wokuwa kwabo umhlaba uzathuthumela, lelizwi lokukhala kwabo lizazwakala eLwandle oluBomvu.

²²Khangela, ukhona ozaqonga njengokhozi, ehle ngesiqubu elulele impiko zakhe ngakuBozira; lenhliziyo zamaqhawe eEdoma ngalolosuku zizakuba njengenhliziyo yowesifazana ohelelwayo.

²³Mayelana leDamaseko. IHamathi leArpadi kudidekile, ngoba kuzwile indaba ezimbi; kuncibilika kukhathazeke njengolwandle olungelakuthula.

²⁴IDamaseko isibuthakathaka, itshibilike ukuze ibaleke, ifikelwe yibugwala, ukudabuka losizi kuyehlele njengowesifazana ohelelwayo.

²⁵Yeka ukutshiywa komuzi olodumo, umuzi olentokozo!

²⁶Ngakho-ke amajaha awo azawela emagumeni awo, lawo wonke amabutho awo azabhujiswa ngalolosuku, kutsho i Nkosi yamabandla.

²⁷Ngizaphemba umlilo emdulini weDamaseko, ozaqothula inqaba zikaBenihadadi.

²⁸Mayelana leKedari lemibuso yeHazori owayitshayayo uNebukadinezari inkosi yeBhabhiloni. I Nkosi ithi: Sukani, liqonde eKedari, libachithe abantu basempumalanga.

²⁹Thathani amathente abo lemihlambi yabo, kanye lamakhetheni abo lempahla yabo yonke, lisuse amakamela abo kibo; abantu bazamemeza kibo bathi: Ukwesaba kusenhlangothini zonke.

³⁰Balekani, lizulazule khatshana, lihlale endaweni eziminyeneyo, lina bahlala eHazori, kutsho i Nkosi. Ngoba uNebukadinezari inkosi yeBhabhiloni wenze icebo ngani, kukhona lokho athanda ukukwenza kini.

³¹Sukani, liqonde kuso isizwe esichelesileyo, esihlala ngokuthula, kutsho i Nkosi, esingelamasango lemigoqo, esizihlalele sodwa.

³²Amakamela aso azakuba yimpango, lemihlambi yaso yezifuyo izaphangwa. Ngizabachithachitha bonke abagela inwele zabo emaceleni, ngibehlisele inkathazo evela inhlangothi zonke, kutsho i Nkosi.

³³IHazori izakuba yindawo yamakhanka, ibe yinkangala kokuphela, kakuyikwakha indodana yomuntu khona, ihlale khona.

³⁴Ilizwi le Nkosi elafika kuJeremiya umprofethi mayelana leElamu ekuqaleni kokubusa kukaZedekhiya, inkosi yakoJuda, lathi:

³⁵I Nkosi yamabandla ithi: Khangela, ngizakwephula idandili leElamu, obanika amandla amakhulu;

³⁶ngehlisele phezu kweElamu imimoya emine evela engonsini ezine zamazulu, ngibahlakazele abeElamu kuyo yonke leyomimoya; kakuyikuba khona isizwe lesisodwa abangeyikuxotshelwa kuso abeElamu.

³⁷Ngizakwenza abeElamu besabe phambi kwezitha zabo laphambi kwalabo ababazingelayo; ngizabehlisela okubi, lolaka lwami oluvuthayo, kutsho i Nkosi, ngibalandelisele ngenkemba, ngize ngibaqede.

³⁸Ngizamisa isihlalo sami sobukhosi eElamu, ngichithe inkosi yabo leziphathamandla zabo, kutsho i Nkosi.

³⁹Kodwa kuzakuthi ensukwini ezizayo ngibabuyise abantu beElamu, kutsho i Nkosi.