Read Ndebele-IBhayibhili Elingcwele 2006 Ujoromiya 51 Bible Online

Ujoromiya 51 - Ndebele-IBhayibhili Elingcwele 2006 bible

Ujoromiya 51

¹I Nkosi ithi: Khangela, ngizavusela iBhabhiloni labakhileyo eKhaladiya umoya ochithayo,

²ngithume eBhabhiloni abelayo, bazakuyela, bathulule ilizwe layo, lapho betheleka phezu kwayo bevela inhlangothi zonke ngosuku lokuhlupheka.

³Otshokayo kagobise idandili lakhe, kungasukumi muntu ogqoke ibhatshi lakhe lensimbi. Lingawayekeli amajaha ayo, lilitshabalalise ibutho layo lonke.

⁴Bazakuwa befelwe elizweni lamaKhaladiya, bagwazwe endleleni zayo.

⁵Ngoba uIsrayeli loJuda kabalahlwanga nguNkulunkulu wabo, i Nkosi yamabandla; kodwa ilizwe lamaKhaladiya lilecala koNgcwele kaIsrayeli.

⁶Balekani eBhabhiloni, lizisindise lonke. Lingaqedwa ekutshayweni kwayo, ngoba lesi yisikhathi sempindiselo ye Nkosi, iyayiphindisela.

⁷IBhabhiloni yayiyinkezo yegolide esandleni se Nkosi, eyayidakisa umhlaba wonke; izizwe zanatha iwayini layo, ngakho zahlanya.

⁸IBhabhiloni isiwile masinyane, yachitheka; ikhaleleni, liyidingele umuthi wezilonda, mhlawumbe ingasila.

⁹Abezizwe bakhona bathi: Besizayelapha iBhabhiloni, kodwa kayelatshwanga; itshiyeni, asihambeni sonke siye emazweni akithi; ngoba isigwebo sayo sifinyelele emazulwini, siphakanyisiwe kwaze kwafika emkhathini.

¹⁰I Nkosi isitshengisile ukuthi thina siqondile; wozani, silandise eZiyoni umsebenzi we Nkosi uNkulunkulu wethu.

¹¹Lolani imitshoko, lithathe izihlangu. I Nkosi ivusile umoya wamakhosi amaMede, ngoba ilecebo lokuyichitha iBhabhiloni, ngoba lokho kuyimpindiselo ye Nkosi, impindiselo yethempeli layo.

¹²Misani isiboniso emidulini yeBhabhiloni, liqinise ukulinda, libeke abalindi, licathame, ngoba i Nkosi isikumisile, futhi izakwenza lokho ekukhulume ngabakhileyo eBhabhiloni.

¹³Wena muzi ohlala emanzini amanengi, olenotho enengi, ukuphela kwakho sekufikile, isilinganiso somhawu wakho.

¹⁴I Nkosi yamabandla ifungile ngayo uqobo yathi: Isibili ngizakugcwalisa ngabantu, babe ngangentethe, bazahlaba umkhosi wokunqoba ngawe.

¹⁵UNkulunkulu wawenza umhlaba ngamandla akhe, walimisa ilizwe ngokuhlakanipha kwakhe, langokuqedisisa kwakhe wendlala amazulu.

¹⁶Lapho ekhupha ilizwi lakhe, amanzi ayahlokoma emazulwini, uyakhupha inkungu emikhawulweni yomhlaba, enze imibane iphazime lapho lisina, akhuphe umoya eziphaleni zakhe.

¹⁷Bonke abantu bayizithutha, kabalakwazi; wonke umkhandi uyangiswa yizithombe zakhe, ngoba izithombe zakhe ezibunjiweyo ziyinkohliso, kazilamphefumulo.

¹⁸Ziyize nje, zingumsebenzi wenkohliso, ngesikhathi sempindiselo yazo zizabhubha.

¹⁹UNkulunkulu kaJakobe kanjengazo; ngoba yena nguye owadala zonke izinto, uIsrayeli yisizwe asikhethayo; yi Nkosi yamabandla ibizo lakhe.

²⁰Wena Bhabhiloni uyisando sami lezikhali zami zempi; ngizakwephula izizwe ngawe, ngichithe imibuso,

²¹ngiphahlaze ngawe ibhiza lomgadi walo, lenqola lomkhweli wayo,

²²ngiphahlaze ngawe amadoda labesifazana, amaxhegu labatsha, ijaha lentombi emsulwa,

²³ngiphahlaze ngawe umelusi lomhlambi wakhe, umlimi lenkabi zakhe, ababusi lenduna zebutho.

²⁴Ngizayiphindisela iBhabhiloni labo bonke abakhileyo eKhaladiya okubi kwabo konke abakwenzileyo eZiyoni phambi kwenu, kutsho i Nkosi.

²⁵Khangela, ngimelana lawe, wena ntaba echithayo, kutsho i Nkosi, echitha umhlaba wonke; ngizaphakamisela isandla sami kuwe, ngikugiqe ezintabeni, ngikwenze ube yintaba etshisiweyo.

²⁶Kakuyikuthathwa ilitshe kuwe elengonsi, lelitshe lesisekelo; kodwa uzakuba yinkangala kuze kube nininini, kutsho i Nkosi.

²⁷Misani isiboniso emhlabeni, livuthele uphondo phakathi kwezizwe, lilungisele izizwe ukumelana leBhabhiloni, liyibizele imibuso ukumelana layo, iArarathi leMini leAshikenazi; liyibekele umlawuli wempi, likhuphe amabhiza abe njengomtshitshi wentethe.

²⁸Lungisani izizwe ukumelana layo, amakhosi amaMede lenduna zayo lababusi bayo, lelizwe lonke elibuswa yiwo.

²⁹Ilizwe liyathuthumela, liqhaqhazele, ngoba icebo le Nkosi limelana leBhabhiloni, ukuze yenze ilizwe leBhabhiloni libe yinkangala engelamuntu.

³⁰Amaqhawe eBhabhiloni ayekele ukulwa, ahlezi enqabeni zawo, amandla awo aphelile, asenjengabesifazana; indlu zayo ziyatsha, lemigoqo yamasango ayo yephukile.

³¹Isigijimi siyagijima sihlangane lesinye, umbiki uhlangana lombiki, ukutshela inkosi yeBhabhiloni ukuthi umuzi wayo unqotshiwe inhlangothi zonke,

³²amazibuko asethethwe, lezinqaba zitshisiwe ngomlilo, amadoda empi ethukile.

³³Ngoba i Nkosi yamabandla, uNkulunkulu kaIsrayeli, ithi: IBhabhiloni injengebala lokubhulela ngesikhathi sokunyathelwa kwayo; kuseyisikhatshana nje isikhathi sokuvunwa kwayo sizafika.

³⁴UNebukadinezari inkosi yeBhabhiloni usidlile, usiqedile; wasenza saba yimbiza engelalutho, wasiginya njengomgobho, usuthi ngokumnandi kwethu, wasitsaka.

³⁵Ububi obukhulu obenziwe kimi lenyameni yami bube phezu kweBhabhiloni, kabatsho njalo abeZiyoni. Ngokuhlupheka kwethu babe lomlandu abeKhaladiya, kabatsho njalo abeJerusalema.

³⁶Ngakho-ke i Nkosi ithi: Khangela, ngizalumela udaba lwenu, ngiliphindisele; ngizakomisa ulwandle lwayo, ngomise lomthombo wayo.

³⁷IBhabhiloni izakuba lunxiwa oludilikileyo, lendawo yamakhanka, into eyesabekayo leyokuncifelwa, kungabi khona ohlala khona.

³⁸Abantu bayo bazabhonga njengamabhongo ezilwane, bakhale njengemidlwane yezilwane.

³⁹Lapho sebebukhali, ngizabenzela idili, ngibadakise baze baqaleke, balale ubuthongo obulaphakade, bangaphindi bavuke, kutsho i Nkosi.

⁴⁰Ngizabaletha ekuhlatshweni njengamawundlu, njengezinqama lezimpongo.

⁴¹Yeka ukubanjwa kweBhabhiloni edumileyo emhlabeni wonke! Yeka iBhabhiloni esiphenduke yaba yinto eyesabekayo phakathi kwezizwe!

⁴²Ulwandle lufikile eBhabhiloni, yasibekelwa ngamagagasi alo ahlokomayo.

⁴³Imizi yayo isingamanxiwa, ilizwe elomileyo lenkangala, ilizwe elingahlalwa muntu, okungadluli kulo indodana yomuntu.

⁴⁴Ngizamtshaya unkulunkulu uBeli eBhabhiloni, ngikhuphe emlonyeni wakhe lokho akuginyileyo. Izizwe kazisayikubekelela ziye kuye. Umduli weBhabhiloni uwile.

⁴⁵Phumani phakathi kwayo, bantu bami, lizikhulule lonke elakeni olwesabekayo lwe Nkosi.

⁴⁶Inhliziyo zenu kazingakhathali, lingesabi umbiko ozwakala elizweni, ngoba kufika umbiko ngomunye umnyaka, besekufika omunye umbiko ngomnyaka olandelayo, ukuthi kukhona isihluku elizweni, lombusi avukele umbusi.

⁴⁷Ngalokho-ke khangela, insuku ziyeza, lapho ngizakwenza isigwebo phezu kwezithombe ezibaziweyo zeBhabhiloni; ilizwe lonke layo lizayangeka, bonke ababuleweyo baye bawele phakathi kwayo.

⁴⁸Kuthi-ke amazulu lomhlaba, lakho konke okukukho, kuhlabele ngentokozo ngeBhabhiloni, ngoba abachithi bazayifikela bevela enyakatho, kutsho i Nkosi.

⁴⁹IBhabhiloni imele ukuwa ngenxa yabafileyo bakoIsrayeli, njengoba ngeBhabhiloni abantu babulawa emhlabeni wonke.

⁵⁰Lina eliphephileyo ekufeni, hambani, lingemi. Khumbulani i Nkosi lisekhatshana, leJerusalema ibe semkhumbulweni wenu.

⁵¹Siyangekile ngoba sizwile ihlazo; ubuso bethu bulenhloni, ngoba abezizwe sebefikile ezindaweni ezingcwele zethempeli.

⁵²Ngakho khangela, insuku ziyeza, kutsho i Nkosi, lapho ngizakwenza isigwebo phezu kwezithombe ezibaziweyo zeBhabhiloni, labagwaziweyo babubule elizweni layo lonke.

⁵³Loba iBhabhiloni ingaphakamela emazulwini, loba ingaqinisa amadundulu ayo aqinileyo, kodwa abachithi bayo bazayifikela bevela kimi, kutsho i Nkosi.

⁵⁴Zwanini, ukukhala kuvela eBhabhiloni, umsindo wokuchitheka okukhulu uvela elizweni lamaKhaladiya.

⁵⁵Ngoba i Nkosi iyayichitha iBhabhiloni, iyayithulisa ilizwi layo elilamandla. Amagagasi ayo ayahlokoma njengamanzi amanengi, lomsindo wokuhlokoma kwawo uyezwakala.

⁵⁶Ngoba umchithi uyehlela phezu kweBhabhiloni; amaqhawe ayo ayabanjwa, lamadandili awo ayephulwa. Ngoba i Nkosi inguNkulunkulu onika umvuzo, izawukhokha umvuzo isibili.

⁵⁷Ngizadakisa iziphathamandla zayo lezihlakaniphi zayo, ababusi bayo, lenduna zamabutho ayo, lamaqhawe ayo; bazalala ubuthongo obulaphakade, bangavuki, kutsho iNkosi, eyi Nkosi yamabandla.

⁵⁸I Nkosi yamabandla ithi: Umduli obanzi weBhabhiloni uzabhidlizwa, lamasango ayo aphakemeyo atshiswe ngomlilo. Abantu basebenzela ize, lomsebenzi wezizwe uphelela emlilweni.

⁵⁹Ilizwi likaJeremiya umprofethi alaya ngalo uSeraya indodana kaNeriya, kaMahaseya, ekuhambeni kwakhe loZedekhiya inkosi yakoJuda, ukuya eBhabhiloni emnyakeni wesine wokubusa kwakhe. USeraya wayeyisikhulu sezindawo zokuphumula.

⁶⁰UJeremiya wabhala encwadini konke okubi okuzakwehlela iBhabhiloni, wonke lamazwi abhaliweyo ngeBhabhiloni.

⁶¹UJeremiya wathi kuSeraya: Lapho usufikile eBhabhiloni, ubone ukuthi uyawafunda wonke lamazwi,

⁶²uthi: Wena Nkosi, ukhulumile ngalindawo ukuthi uzayichitha, ukuze kungabi khona okuhlala kiyo, umuntu loba inyamazana, ibe yinkangala kuze kube nininini.

⁶³Kuthi lapho usuqedile ukuyifunda lincwadi, ubophele ilitshe kuyo, uyiphosele emfuleni iYufrathi,

⁶⁴uthi: IBhabhiloni izatshona, ingabe isavela futhi, ngenxa yokubi, engizayehlisela khona. Aphelela lapha amazwi kaJeremiya.