Read Ndebele-IBhayibhili Elingcwele 2006 Ujoromiya 52 Bible Online

Ujoromiya 52 - Ndebele-IBhayibhili Elingcwele 2006 bible

Ujoromiya 52

¹UZedekhiya wayeleminyaka engamatshumi amabili lanye ekuqaleni kwakhe ukubusa; wabusa iminyaka elitshumi lanye eJerusalema. Ibizo likanina lalinguHamuthali, indodakazi kaJeremiya weLibhina.

²Wenza okubi emehlweni e Nkosi, njengakho konke okwenziwa nguJehoyakhimi.

³Ngenxa yokuthukuthela kwe Nkosi, izinto zenzeka eJerusalema lakoJuda yaze yabalahla phambi kwayo. UZedekhiya wawuvukela umbuso weBhabhiloni.

⁴Ngomnyaka wesificamunwemunye wokubusa kwakhe, ngosuku lwetshumi lwenyanga yetshumi, uNebukadinezari inkosi yeBhabhiloni wafika lebutho lakhe lonke ukumelana leJerusalema; bamisa inkamba bemelene layo, bayakhela imiduli yokuvimbezela inhlangothi zonke.

⁵Umuzi wavinjezelwa kwaze kwaba ngumnyaka wetshumi lanye wokubusa kwenkosi uZedekhiya.

⁶Ngosuku lwesificamunwemunye lwenyanga yesine indlala yaba nkulu phakathi komuzi, kwasweleka ukudla kwabantu elizweni.

⁷Basebewufohlela umuzi; wonke amadoda empi abaleka, aphuma emzini ebusuku, ngendlela yesango eliphakathi kwemiduli emibili, esangweni lensimu yenkosi. AmaKhaladiya ayewuzingelezele umuzi. Aphuma ngendlela yamagceke.

⁸Ibutho lamaKhaladiya laxotshana layo inkosi uZedekhiya; lamfica emagcekeni eJeriko; lebutho lakhe lonke lahlakazeka.

⁹Basebeyibamba inkosi, bayiletha enkosini yeBhabhiloni eRibila elizweni leHamathi, yakhuluma izigwebo phezu kwayo.

¹⁰Inkosi yeBhabhiloni yabulala amadodana kaZedekhiya phambi kwakhe, yazibulala lazo zonke iziphathamandla zakoJuda eRibila.

¹¹Yamkhupha amehlo uZedekhiya, yambopha ngamaketane, yamusa eBhabhiloni, yamfaka entolongweni, kwaze kwaba lusuku lokufa kwakhe.

¹²Ngosuku lwetshumi lwenyanga yesihlanu, ngomnyaka wetshumi lesificamunwemunye wokubusa kukaNebukadinezari inkosi yeBhabhiloni, uNebuzaradani induna yabalindi benkosi, owayengaphansi kwenkosi yeBhabhiloni, wangena eJerusalema.

¹³Walitshisa ithempeli, lesigodlo senkosi, lendlu zonke ezinkulu zeJerusalema.

¹⁴Kwathi ibutho lonke lamaKhaladiya, elalilenduna yabalindi, labhidliza yonke imiduli ezingelezele iJerusalema.

¹⁵UNebuzaradani induna yabalindi wathumba bonke abantu ababesele emzini, lalabo ababehlamukele enkosini yeBhabhiloni kanye lezingcitshi zemisebenzi.

¹⁶Kodwa uNebuzaradani induna yabalindi watshiya abanye abantukazana elizweni ukuba ngabaphathi bezivini labalimi.

¹⁷Insika zethusi ezazisethempelini, lezinyawo, lolwandle lwethusi, amaKhaladiya akuphahlaza, athatha ithusi lonke, alisa eBhabhiloni.

¹⁸Athatha izimbiza, lamafotsholo, lezindlawu, lemiganu yokufafaza, lezinkezo, lazo zonke izitsha zethusi ezazisetshenziswa enkonzweni yethempeli,

¹⁹kanye lemiganywana, lezitsha zokuthwala umlilo, lemiganu yokufafaza, lezimbiza, lezinti zezibane, lezinkezo, lemiganu yomnikelo wokuthululwa. Okwakwenziwe ngegolide induna yabalindi yakuthatha, lalokho okwakwenziwe ngesiliva yakuthatha.

²⁰Insika zombili, lolwandle olwalulunye nje, lenkabi zethusi ezazilitshumi lambili ezazingaphansi kolwandle kanye lezinyawo inkosi uSolomoni ayekwenzele ithempeli, ithusi lazo zonke lezizinto lalingelakulinganiswa ngesisindo.

²¹Ubude bensika babuzingalo ezilitshumi lesificaminwembili, ububanzi bayo babuzingalo ezilitshumi lambili, lohlonzi lwayo lwaluyiminwe emine, futhi yayigujiwe.

²²Kwakukhona isiduku sethusi, ubude baso sisinye babuzingalo ezinhlanu, lesihlengo lamapomegranati*, konke kwenziwe ngethusi, kwakuzingelezele isiduku phezulu. Lensika yesibili yayinjalo ilamapomegranati.

²³Kwakubonakala amapomegranati* angamatshumi ayisificamunwemunye lesithupha; wonke amapomegranati ayephezu kwesihlengo inhlangothi zonke ayelikhulu.

²⁴Induna yabalindi yathatha uSeraya umpristi oyinhloko loZefaniya umpristi omlandelayo, labalindi besango abathathu,

²⁵yathatha emzini induna eyayiphethe amadoda empi, lamadoda ayisikhombisa awenkundla yenkosi ayeficakale emzini, lomabhalane wenduna yebutho eyayibuthela abantu emabuthweni, lamadoda angamatshumi ayisithupha elizwe ayeficakele phakathi komuzi.

²⁶UNebuzaradani induna yabalindi wabathatha, wabasa enkosini yeBhabhiloni eRibila.

²⁷Inkosi yeBhabhiloni yabatshaya, yababulalela eRibila elizweni leHamathi. Wathunjwa ngokunjalo uJuda elizweni lakhe.

²⁸Nanti inani labantu abathunjwa nguNebukadinezari; ngomnyaka wesikhombisa, amaJuda azinkulungwane ezintathu, lamatshumi amabili, lantathu;

²⁹ngomnyaka wetshumi lesificaminwembili wokubusa kukaNebukadinezari wathumba eJerusalema abantu abangamakhulu ayisificaminwembili, lamatshumi amathathu, lambili;

³⁰ngomnyaka wamatshumi amabili lantathu wokubusa kukaNebukadinezari, uNebuzaradani induna yabalindi wathumba amaJuda angamakhulu ayisikhombisa, lamatshumi amane lanhlanu; bonke abantu sebehlangene baba zinkulungwane ezine, lamakhulu ayisithupha.

³¹Kwathi ngomnyaka wamatshumi amathathu lesikhombisa wokuthunjwa kukaJehoyakhini inkosi yakoJuda, ngosuku lwamatshumi amabili lanhlanu lwenyanga yetshumi lambili, uEvili-Merodaki inkosi yeBhabhiloni, ngomnyaka abekwa ngawo abe yinkosi, waba lomusa kuJehoyakhini, wamkhupha entolongweni,

³²wakhuluma laye kuhle, wamnika isihlalo esedlula zonke izihlalo zamakhosi ayelaye eBhabhiloni.

³³Ngakho-ke uJehoyakhini wakhulula izigqoko zokubotshwa; insuku zonke zempilo yakhe wadla lenkosi;

³⁴wayelesabelo esimiyo esensuku zonke, asinikwa yinkosi njengenswelo yakhe insuku zonke zokuhamba kwakhe, waze wafa.