Read Ndebele-IBhayibhili Elingcwele 2006 Ujoromiya 7 Bible Online

Ujoromiya 7 - Ndebele-IBhayibhili Elingcwele 2006 bible

Ujoromiya 7

¹Ilizwi lwe Nkosi lafika kuJeremiya lathi:

²Mana emnyango wethempeli, utshumayele lapho lelilizwi uthi: Zwanini ilizwi le Nkosi, lina lonke bantu bakoJuda, abangena kuliminyango ukukhonza i Nkosi.

³I Nkosi yamabandla, uNkulunkulu wakoIsrayeli, ithi: Lungisani indlela zenu lezenzo zenu. Khona ngizaliyekela ukuthi lihlale kulindawo.

⁴Lingathembi amazwi la akhohlisayo okuthi: Leli lithempeli le Nkosi, ithempeli le Nkosi, ithempeli le Nkosi.

⁵Ngoba uba lilungisa indlela zenu lezenzo zenu isibili, uba lisenza ukulunga isibili phakathi kwenu,

⁶uba lingacindezeli owezizweni, lentandane, lomfelokazi, lingachithi igazi elingelacala, lingakhonzi abanye onkulunkulu ukuze lizilimaze ngalokho,

⁷ngizaliyekela ukuthi lihlale kulindawo, elizweni engalinika oyihlo benu kusukela endulo kuze kube nininini.

⁸Khangelani, lithemba amazwi akhohlisayo angelakusiza.

⁹Lizakweba, libulale, lifebe, lifunge amanga, litshisele uBhali impepha, likhonze abanye onkulunkulu elingabaziyo,

¹⁰beselisiza ukuthi lime phambi kwami kulindlu lapho ibizo lami elidunyiselwa khona, lithi: Sikhululwe! Kodwa liqhubeke ukwenza zonke lezizinengiso.

¹¹Lindlu, lapho ibizo lami elidunyiselwa khona, isiphenduke yaba lubhalu lwabaphangi emehlweni enu yini? Khangelani, mina uqobo sengikubonile lokho, kutsho i Nkosi.

¹²Yanini endaweni yami yeShilo, indawo yokuqala lapho ibizo lami eladunyiselwa khona, libone ukuthi ngenzani kiyo ngenxa yobubi babantu bami bakoIsrayeli.

¹³Ngakho-ke, kutsho i Nkosi, ngoba lenzile zonke lezizinto, lingalalelanga lapho ngikhuluma lani ngivuke ngovivi, lapho ngilibiza kalingiphendulanga,

¹⁴ngizakwenza kulindlu lapho ibizo lami elidunyiselwa khona, elithemba kiyo, lakulindawo engayinika oyihlo kanye lani, lokho engakwenza eShilo.

¹⁵Ngizalixotsha phambi kwami njengalokho ngaxotsha bonke abafowenu, inzalo yonke yakoEfrayimi.

¹⁶Wena-ke, Jeremiya, ungabakhulekeli lababantu, ungaphakamisi ilizwi lakho ukuze ubakhulekele, ungangincengi, ngoba kangiyikukuzwa.

¹⁷Kawukuboni yini lokho abakwenza emizini yakoJuda lendleleni zeJerusalema?

¹⁸Abantwana batheza inkuni, oyise baphembe umlilo, abesifazana baxove inhlama, ukuze benzele indlovukazi yamazulu amaqebelengwana, bathululele abanye onkulunkulu iminikelo yokunathwayo, ukuze bangicunule.

¹⁹Kodwa yimi abangicunulayo yini? kutsho i Nkosi. Kayisibo yini ukuthi baziyangise?

²⁰Ngakho-ke iNkosi uJehova ithi: Khangela, ukuthukuthela kwami lolaka lwami kuzakwehlela kulindawo, phezu kwabantu lenyamazana, laphezu kwezihlahla zeganga lezithelo zomhlabathi. Kuzakutsha, kungacitsheki.

²¹I Nkosi yamabandla, uNkulunkulu kaIsrayeli, ithi: Fakani iminikelo yenu yokutshiswa emihlatshelweni yenu, lidle inyama uba kuyisifiso senu.

²²Kodwa kangibalayanga oyihlo ngendaba zeminikelo yokutshiswa lemihlatshelo mhla ngibakhupha elizweni leGibhithe.

²³Kodwa ngabalaya lokhu kuphela ngathi: Lalelani ilizwi lami, ngizakuba nguNkulunkulu wenu, lina libe ngabantu bami, lihambe ngezindlela engililaya zona, ukuze kulilungele.

²⁴Kodwa kabezwanga, kabalalelanga: bahamba ngamacebo abo langenkani yenhliziyo zabo ezimbi, bahlehlela emuva, kabayanga phambili.

²⁵Kusukela esukwini oyihlo abaphuma ngalo elizweni leGibhithe kuze kube lamuhla, ngithume kibo zonke inceku zami abaprofethi, insuku ngensuku ngivuka ngovivi ngithuma.

²⁶Kodwa kabangizwanga, kabalalelanga, baba lenkani; benza okubi kulabokhokho babo.

²⁷Ngakho uzakhuluma wonke lamazwi kibo, kodwa kabayikukulalela; uzababiza, kodwa kabayikukusabela.

²⁸Uzakuthi kibo: Yiso lesisizwe esingalalelanga ilizwi le Nkosi, uNkulunkulu waso, esingavumanga ukulaywa; leqiniso liphelile, laqunywa lisuke emlonyeni waso.

²⁹Gelani inwele zenu, lizilahle, lina bantu beJerusalema; lilile emadundulwini angelalutho; ngoba i Nkosi isalile yasilahla isizukulwana esivuse ulaka lwayo.

³⁰Abantu bakoJuda benzile okubi phambi kwami; babekile izinengiso zabo endlini lapho ibizo lami elidunyiselwa khona, ukuze bayingcolise, kutsho i Nkosi.

³¹Bakhile indawo ephakemeyo yokukhonzela eTofethi, esesihotsheni sendodana kaHinomu, ukuze batshise amadodana lamadodakazi abo ngomlilo, into engingabalayanga yona lengingacabanganga ngayo.

³²Ngalokho khangela, insuku ziyeza lapho indawo ingasayikubizwa ngokuthi yiTofethi, loba isihotsha sendodana kaHinomu, kodwa izakuthiwa yisihotsha sokubulala; ngoba abafileyo bazangcwatshwa eTofethi, ngoba ingasekho enye indawo.

³³Kuthi izidumbu zalababantu zibe yikudla kwenyoni zamazulu, lenyamazana zeganga, kungekho ozazethusa.

³⁴Ngizaqeda emizini yakoJuda lezindleleni zeJerusalema umsindo wenjabulo lowentokozo, lelizwi lomyeni lelomakoti, ngoba ilizwe lizachitheka.