Read Ndebele-IBhayibhili Elingcwele 2006 Ujoromiya 8 Bible Online

Ujoromiya 8 - Ndebele-IBhayibhili Elingcwele 2006 bible

Ujoromiya 8

¹Ngalesosikhathi amathambo amakhosi akoJuda, laweziphathamandla, lamathambo abapristi labaprofethi, lamathambo abakhileyo eJerusalema, azakhutshwa emangcwabeni, kutsho i Nkosi;

²azachaywa elangeni lenyangeni, lakuwo wonke amabutho amazulu, abakuthandileyo bakukhonza, abakulandeleyo bakudinga, bakudumisa; kawayikubuthwa angcwatshwe futhi, azakuba njengomquba emhlabathini.

³Ukufa kuzakuba ngcono kulempilo kubo bonke abaseleyo balesisizwe esibi, kuzo zonke indawo lapho engibaxotshele khona, kutsho i Nkosi yamabandla.

⁴Uzakuthi kibo: I Nkosi ithi: Abantu bayawa, bangavuki yini? Umuntu uyaphambuka, angabuyi aphenduke yini?

⁵Pho-ke, baphambukeleni lababantu, bahlamuke kokuphela yini? Baqinela enkohlisweni, bayala ukuphenduka.

⁶Ngiqaphele ngezwa, kodwa kabakhulumanga kuhle, kakho loyedwa ophendukayo ebubini bakhe esithi: Ngenzeni? Bonke baphendukela endleleni zabo njengebhiza liseqela empini.

⁷Ingabuzane emazulwini liyazazi izikhathi zalo ezimisiweyo; lejuba lenkonjane lehemu kuyasazi isikhathi sokubuya kwakho; kodwa abantu bami kabazazi izimiso ze Nkosi.

⁸Lingatsho njani ukuthi: Sihlakaniphile, lomlayo we Nkosi ulathi? Kodwa, khangelani, ukubhala okukhohlisayo kwababhali kuwuphendule umlayo waba ngamanga.

⁹Abahlakaniphileyo bayayangeka, bathuthumele babanjwe; khangela, balalile ilizwi le Nkosi; pho, balokuhlakanipha bani?

¹⁰Ngalokhu-ke omkabo ngizabanika abanye, lamasimu abo ngiwanike abanqobi, ngoba kusukela kwabancinyane kuze kufike kwabakhulu bonke bayizihwaba zenzuzo embi, labaprofethi labapristi bonke bayakhohlisa.

¹¹Kabawelaphisisi amanxeba abantu bami, bathi: Konke kulungile. Khona kungalunganga.

¹²Babelenhloni yini lapho besenza amanyala? Hatshi, kababanga lanhloni lakanye, kabayangekanga. Ngalokho-ke bazakuwa phakathi kwabawayo; ngesikhathi sokubaphindisela kwami bazachitheka, kutsho i Nkosi.

¹³Bengithanda ukubabutha, kutsho i Nkosi, kodwa kazikho izithelo evinini, lomkhiwa kawukho; ngitsho lamahlamvu abunile, lalokho engibanike khona kusukile kibo.

¹⁴Silindelani? Wozani, singene emizini ebiyelweyo, sibhubhele khona. Ngoba i Nkosi uNkulunkulu wethu isimisele ukubhubha, isinikile amanzi abulalayo ukuze siwanathe, ngoba sonile e Nkosi ni.

¹⁵Salindela ukuthula, kodwa kakuvelanga, sahlalela isikhathi sokwelatshwa, kodwa khangela, kwavela ukwesaba.

¹⁶Ukuthimula kwamabhiza ezitha kuyezwakala koDani; ekuzwakaleni komsindo wokukhala kwamabhiza amaduna ilizwe lonke liyathuthumela. Ngoba zifikela ukudla ilizwe, lakho konke okukulo, umuzi labahlala kiwo.

¹⁷Ngoba khangelani, ngiyathumela phakathi kwenu izinyoka, amabululu angelakulunjwa azaliluma, kutsho i Nkosi.

¹⁸Kangilakududuzeka esizini lwami, inhliziyo yami iyagula phakathi kwami.

¹⁹Khangelani, lalelani ukukhala kwabantu bami, kuvela kuyo yonke imikhawulo yelizwe, kuthi: I Nkosi kayikho eZiyoni yini? Inkosi yayo kayikho phakathi kwayo yini? Bangicunuleleni ngezithombe zabo ezibaziweyo, langezithombe zezizwe?

²⁰Ukuvuna kudlulile, lehlobo liphelile, kodwa thina kasikhululwanga.

²¹Ngokulimala kwabantu bami inhliziyo yami ilimele, ngiyakhala, lokudabuka kungehlele.

²²Kakulabhalisamu eGileyadi yini? Kakho yini umelaphi khona? Pho, abantu bami kabasili ngani?