Read Ndebele-IBhayibhili Elingcwele 2006 Isililo 2 Bible Online

Isililo 2 - Ndebele-IBhayibhili Elingcwele 2006 bible

Isililo 2

¹Yeka umnyama iNkosi ekuthukutheleni kwayo ewehlisele phezu kweZiyoni. Iphosele ubuhle bukaIsrayeli emhlabeni busuka emazulwini; kayikhumbulanga ithempeli layo ngosuku lokuthukuthela kwayo.

²INkosi ichithile yonke imizi kaJakobe ingayihawukeli. Ekuthukutheleni kwayo idilizile izinqaba zakoJuda. Yaphosela phansi yangcolisa umbuso lamakhosi awo.

³Yaquma ngokuvutha kolaka lwayo wonke amandla akoIsrayeli. Yasusa isandla sayo sokusiza phambi kwezitha. Yatshisa kuJakobe njengomlilo welangabi oqothula konke.

⁴Isigobise idandili layo njengesitha, yathiya isandla sayo esilamandla; njengesitha ibulele bonke abathandeka emehlweni ethu; lethenteni leZiyoni yehlisela ulaka lwayo njengomlilo.

⁵INkosi isinjengesitha ichithile uIsrayeli; ichithile zonke izigodlo zakhe, yadilizela phansi inqaba zakhe. Yandisa ukulila lokukhala koJuda.

⁶Iphundlile ithempeli layo njengokuphundlwa kwevini, yadiliza indlu yokukhonzela. I Nkosi yenza ukuthi kukhohlakale eZiyoni imikhosi emisiweyo lesabatha. Yadelela ngokuvutha kolaka lwayo umbusi lompristi.

⁷INkosi ilidelele ilathi layo, yalahla indlu yayo engcwele; yanikela esandleni sesitha imiduli yezigodlo zayo. Kwaba khona umsindo wokunqoba endlini yayo engcwele njengosukwini lomkhosi omisiweyo.

⁸I Nkosi ikhethile ukudiliza umduli weZiyoni, iwulinganisile ngentambo yokulinganisa, kayiyekelanga ukudiliza; yenza ukuthi kukhale umthangala lomduli, iphele amandla kanyekanye.

⁹Amasango ayo atshonile phansi, idilizile yephula imigoqo yayo. Inkosi yayo leziphathamandla zayo sebesezizweni, kakuselamthetho; labaprofethi bayo kabasemukeli umbono e Nkosi ni.

¹⁰Abadala beZiyoni bahlezi phansi bethule, bathele uthuli emakhanda abo, bagqoke amalembu amasaka. Intombi ezigcweleyo zeJerusalema zikhothamisele phansi amakhanda azo.

¹¹Amehlo ami asediniwe yikukhala, imibilini yami idungekile. Inhliziyo yami idabukile ngosizi ngenxa yokuchitheka kwabantu bami, ngoba ingane labamunyayo bafela endleleni zomuzi.

¹²Bathi kubonina: Kungaphi ukudla lewayini? Lapho besifa njengabantu abalinyaziweyo endleleni zomuzi, lapho befela ezifubeni zabonina.

¹³Ngingathini ngawe? Ngingakufananisa lani, wena Jerusalema? Ngingakufananisa lani ukuze ngikududuze, ntombi emsulwa, ndodakazi yeZiyoni? Ngoba ukuchitheka kwakho kukhulu njengolwandle. Ngubani ongakwelapha?

¹⁴Abaprofethi bakho babonile imibono engamanga leyinkohliso ngawe. Kabakuvezanga ukona kwakho ukuze babuyise inhlanhla yakho, kodwa babonile imibono yamanga leduhisayo ngawe.

¹⁵Bonke abadlulayo bakutshayela izandla, bayakuncifela bakunikinele amakhanda abo, Jerusalema. Bathi: Yiwo lo umuzi owawubizwa ngokuthi yibuhle obupheleleyo lentokozo yomhlaba wonke yini?

¹⁶Zonke izitha zakho ziyakuklolodela, ziyancifa, zigedle amazinyo azo zithi: Siwuchithile; lolu yilo usuku ebesilulindele; sesilutholile, silubonile.

¹⁷I Nkosi yenzile lokho ebikumisile, igcwalisile ilizwi layo. Njengokumisa kwayo endulo isidilizile ingelasihawu. Yenzile ukuthi isitha sithokoze ngawe, yaphakamisa amandla ezitha zakho.

¹⁸Khala kakhulu eNkosini, wena Ziyoni! Inyembezi zakho zigeleze njengemifula emini lebusuku. Ungaphumuli, lenyembezi zakho zingaqamuki.

¹⁹Vuka, ukhale ebusuku, ekuqaleni kwemilindo, uvule inhliziyo yakho yonke phambi kweNkosi, uphakamisele izandla zakho kuyo, ngenxa yempilo yabantwana bakho, ababulawa yindlala ekuhlanganeni kwendlela zonke.

²⁰Ake ukhangele, Nkosi, ubone. Ngubani owake wamphatha ngokunje? Abesifazana bazakudla inzalo yabo yini, abantwana babo ababazeleyo? Umpristi lomprofethi bazabulawa endlini engcwele yeNkosi yini?

²¹Obhuqwini lwezindlela kulele abatsha labadala; intombi zami ezigcweleyo lamajaha ami kubulewe; esukwini lokuthukuthela kwakho uzibulele wena, wazibulala ungelasihawu.

²²Wangibizela izitha zami, zavela inhlangothi zonke, njengabantu abeza emkhosini omisiweyo, kakho loyedwa owaphunyukayo, kakho owasilayo esukwini lokuthukuthela kwe Nkosi. Bonke engabazala ngabondla babhujiswa yizitha zami.