Read Ndebele-IBhayibhili Elingcwele 2006 Isililo 3 Bible Online

Isililo 3 - Ndebele-IBhayibhili Elingcwele 2006 bible

Isililo 3

¹Ngingumuntu obone ukuhlupheka ngentonga yolaka lwayo.

²Ingiqhubile yangingenisa emnyameni ongelakukhanya.

³Isibili ingiphendulele isandla sayo, iphinde futhifuthi usuku lonke.

⁴Igugisile inyama yami lesigogo sami, yephula amathambo ami.

⁵Ingihanqile yangembesa ngosizi langokuhlupheka.

⁶Yangenza ngahlala emnyameni njengabakade bafa.

⁷Ingibiyele ukuze ngingaphumi, yangibopha ngamaketane anzima.

⁸Njalo nxa ngikhala ngicela ukusizwa, iyawala umkhuleko wami.

⁹Iyivalile indlela yami ngamatshe abaziweyo, yaphambula izindlela zami.

¹⁰Kimi injengebhere elicathemeyo, lanjengesilwane esicatshileyo.

¹¹Ingiphambule endleleni yami, yangidabudabula, yangitshiya ngize.

¹²Igobisile idandili layo, yangibeka ngaba yinto yokunengwa ngomtshoko wayo.

¹³Ihlabile inhliziyo yami ngemitshoko yesamba sayo.

¹⁴Sengiyinhlekisa kibo bonke abantu, into yokuhaywa zingoma zabo insuku zonke.

¹⁵Ingehlisele ukubaba, yanginathisa umhlonyane.

¹⁶Yephule amazinyo ami ngokhethe, yangidlisa umlotha.

¹⁷Umphefumulo wami uphelelwe yikuthula, sengikhohliwe ukuthi intokozo iyini.

¹⁸Ngakho ngithi: Amandla ami aphelile, lethemba lami elivela e Nkosi ni.

¹⁹Nxa ngikhumbula ukuhlupheka kwami lobuhlungu bami, kubaba njengomhlonyane lenyongo.

²⁰Umoya wami uhlala ukukukhumbula, kukhathazeke phakathi kwami.

²¹Kodwa ngikhumbula lokhu ngibe lethemba.

²²Uthando lwe Nkosi luhlala njalo, lesihawu sayo kasilakucina.

²³Kutsha insuku zonke ekuseni, lothembeko lwayo lukhulu.

²⁴Umoya wami uthi: I Nkosi iyisabelo sami, ngakho ngizathemba kiyo.

²⁵I Nkosi ilungile kwabayithembayo, kulabo abayidingayo.

²⁶Kuhle ukuyithemba, lokulindela ngokuthula ukukhulula kwayo.

²⁷Kuhle emuntwini ukuthi athwale ijogwe ebutsheni bakhe.

²⁸Kahlale yedwa athule lapho esefakiwe lona,

²⁹athi mbo ngobuso ethulini; mhlawumbe kungaba khona ithemba.

³⁰Kanikele isihlathi sakhe kwabamtshayayo asuthe inhlamba.

³¹Ngoba iNkosi kayiyikulahla kuze kube phakade.

³²Ngoba uba isehlisa ubuhlungu, izakuba lesihawu ngobukhulu bothando lwayo.

³³Ngoba kayihluphi, idabukise abantu ngoba ikuthanda.

³⁴Ukucindezela phansi zonke izibotshwa ezisemhlabeni,

³⁵lokwemuka umuntu ilungelo lakhe phambi koPhezukonke,

³⁶lokona umuntu endabeni yakhe, iNkosi kayiyikukuvuma lokho.

³⁷Ngubani ongalawula, kwenzeke, nxa iNkosi ikwalile?

³⁸Kakuphumi okuhle lokubi emlonyeni woPhezukonke yini?

³⁹Usolelani umuntu ophilayo, umuntu ngesijeziso sezono zakhe?

⁴⁰Asilinge sihlole indlela zethu, sibuyele e Nkosi ni.

⁴¹Asiphakamisele inhliziyo zethu lezandla zethu kuNkulunkulu emazulwini.

⁴²Sithi: Siphambukile, sakuhlamuka, wena kawuthethelelanga.

⁴³Wena uthukuthele, waxotshana lathi, wasibulala ungelasihawu.

⁴⁴Wacatsha emayezini, ukuze imikhuleko yethu ingakufinyeleli.

⁴⁵Usenze saba yimfucuza lezibi phakathi kwabantu.

⁴⁶Zonke izitha zethu ziyasiklolodela.

⁴⁷Phambi kwethu kukhona umjibila lomgodi, ukuchitheka lokufa.

⁴⁸Amehlo ami agobhoza inyembezi ngenxa yokubhujiswa kwabantu bami.

⁴⁹Inyembezi zami zizagobhoza zingapheli, ngingaduduzeki,

⁵⁰ize ikhangele i Nkosi ibone isemazulwini;

⁵¹amehlo ami asebuhlungu ngokukhalela izintombi zomuzi wakithi.

⁵²Abayizitha zami ngeze bangizingele njengenyoni;

⁵³bangiphosela emgodini ngisizwa, bangigxoba ngamatshe;

⁵⁴ngatshona emanzini ngathi: Ngafa.

⁵⁵Ngakhuleka ebizweni lakho, Nkosi, ngiphakathi komgodi;

⁵⁶wezwa umkhuleko wami wokuthi: Ungangivaleli indlebe zakho nxa ngicela ukusizwa.

⁵⁷Wasondela kimi lapho ngikhuleka kuwe, wathi: Ungesabi.

⁵⁸Nkosi, ulumele udaba lwami, wahlenga impilo yami.

⁵⁹Nkosi, ukubonile ukoniwa kwami; akuthethe udaba lwami.

⁶⁰Ubonile impindiselo yabo, lawo wonke amacebo abo ngami.

⁶¹Uzwile ukungiklolodela kwabo, Nkosi, lawo wonke amacebo abo ngami.

⁶²Ukukhuluma lemicabango yezitha zami kumelana lami usuku lonke.

⁶³Ake ubone ukuthi lapho behlala loba besukuma bayangiklolodela kakhulu.

⁶⁴Uzabaphindisela, Nkosi, ngokufanele izenzo zabo.

⁶⁵Uzabanika inhliziyo ezilukhuni, lesiqalekiso sakho sibe phezu kwabo.

⁶⁶Uxotshane labo ekuthukutheleni kwakho, ubabhubhise, bangabe besaba khona ngaphansi kwamazulu akho, Nkosi.