Read Ndebele-IBhayibhili Elingcwele 2006 Isililo 5 Bible Online

Isililo 5 - Ndebele-IBhayibhili Elingcwele 2006 bible

Isililo 5

¹Khumbula, Nkosi, okusehleleyo, khangela ubone ihlazo lethu.

²Ilizwe lethu selinikwe abezizwe, lemizi yethu yanikwa abemzini.

³Sesiyizintandane, kasilabo obaba, labomama sebenjengabafelokazi.

⁴Sihlawulela amanzi esiwanathayo, lenkuni siyazithenga.

⁵Sifakwe ijogwe entanyeni sisetshenziswa kakhulu, sidiniwe, kasivunyelwa ukuphumula.

⁶Sicela iGibhithe, sicele iAsiriya, ukuzuza ukudla.

⁷Obaba bafa, kabasekho, thina sithwele izono zabo.

⁸Izigqili ziyasibusa, kakho ongasikhulula kuzo.

⁹Sizuza ukudla kwethu ngokudela ukusila kwethu, ngenxa yengozi zasenkangala.

¹⁰Isigogo sethu sitshisa njengomlilo, ngokutshisa kwendlala.

¹¹Badlova abesifazana eZiyoni, lezintombi ezigcweleyo emizini yakoJuda.

¹²Iziphathamandla ziphanyekwa ngezandla zazo, labadala kabahlonitshwa.

¹³Amajaha asetshenziswa ngamandla ukuchola, labafana basindwa yiminyaba yenkuni.

¹⁴Abadala sebatshiya inkundla, lamajaha ayekela ukuhlabela.

¹⁵Intokozo yenhliziyo zethu iphelile, lokugida kwethu kuphenduke ukukhala.

¹⁶Umqhele uwile emakhanda ethu. Maye thina, ngoba sonile!

¹⁷Ngenxa yalokhu inhliziyo zethu zidabukile, langalezizinto amehlo ethu afiphele,

¹⁸ngoba intaba yeZiyoni isisele ize, ihanjwa ngamakhanka.

¹⁹Kodwa wena, Nkosi, ubusa kuze kube nininini, lesihlalo sakho sobukhosi simi njalo ezizukulwaneni zonke.

²⁰Usikhohlweleni kokuphela? Usitshiyeleni isikhathi eside kangaka?

²¹Sibuyise kuwe, Nkosi, sizabuya. Yenza insuku zethu zibe zintsha njengendulo.

²²Ngoba uba usilahlile kokuphela, kukhulu kakhulu ukusithukuthela kwakho.