Read Ndebele-IBhayibhili Elingcwele 2006 Uhezekiyeli 10 Bible Online

Uhezekiyeli 10 - Ndebele-IBhayibhili Elingcwele 2006 bible

Uhezekiyeli 10

¹Ngasengibona, khangela, emkhathini owawungaphezu kwamakherubi* okunjengelitshe elithiwa yisafire* kufanana lesihlalo sobukhosi.

²Yasisithi emuntwini ogqoke ilembu elicolekileyo: Ngena phakathi kwamavili atshibilika ngaphansi kwamakherubi*, ugcwalise izandla zakho ngamalahle avuthayo avela phakathi kwamakherubi*, uwachithele phakathi komuzi. Ngambonake engena.

³Amakherubi* ayemi ngeningizimu kwethempeli ekungeneni kwalowomuntu, lamayezi ayegcwele egumeni elingaphakathi.

⁴Inkazimulo ye Nkosi yasuka emakherubini*, yaya emnyango wethempeli; ithempeli lagcwala amayezi, leguma lagcwala ukukhanya kwenkazimulo ye Nkosi.

⁵Umdumo wempiko zamakherubi* wezwakala legumeni elingaphandle, njengelizwi likaNkulunkulu uSomandla nxa ekhuluma.

⁶Lapho imtshela umuntu ogqoke ilembu elicolekileyo isithi: Thatha umlilo phakathi kwamavili atshibilikayo phakathi kwamakherubi*; wangena wema phansi kwevili.

⁷Elinye lamakherubi lelulela isandla salo emlilweni owawuphakathi kwamakherubi*, lawuthatha, lawufaka ezandleni zalowomuntu owayembethe ilembu elicolekileyo; yena wawuthatha, waphuma.

⁸Kwabonakala kiwo amakherubi* okufanana lesandla somuntu kungaphansi kwempiko zawo.

⁹Ngabona, khangela, amavili amane eceleni kwamakherubi*, ivili elilodwa liphansi kwekherubi* ngalinye. Amavili ayecwazimula njengelitshe elithiwa yitopazi*.

¹⁰Amavili womane ayefanana kungathi alivili phakathi kwevili.

¹¹Ekuhambeni kwawo amakherubi aqonda loba kuluphi lwezinhlangothi zozine, engatshibiliki, kodwa aqonda lapho akhangele khona.

¹²Yonke imizimba yawo lemihlana yawo lezandla zawo lempiko zawo lamavili kwakugcwele amehlo indawo zonke.

¹³Amavili wona ngezwa kuthiwa ngamavili atshibilikayo.

¹⁴Wonke ayelobuso obune; ubuso bokuqala bungobekherubi*, ubuso besibili bungobomuntu, ubuso besithathu bungobesilwane, lobuso besine bungobelinqe.

¹⁵Amakherubi* aphakama-ke, ayeyizo izidalwa eziphilayo engazibona emfuleni iKebari.

¹⁶Lapho amakherubi* ehamba, lamavili ahamba eceleni kwawo; lalapho amakherubi* ephakamisa impiko zawo ukuze aphaphe, amavili kawasukanga kiwo.

¹⁷Lapho esima, lawo ema; lalapho ephakama, lawo aphakama; ngoba umoya wezidalwa eziphilayo wawukiwo.

¹⁸Yasisuka inkazimulo ye Nkosi emnyango wethempeli, yema ngaphezu kwamakherubi.*

¹⁹Amakherubi* aphakamisa impiko zawo, asuka phansi ngiwabona, lamavili ehamba lawo, aze ema esangweni elingempumalanga kwethempeli; inkazimulo kaNkulunkulu kaIsrayeli yayingaphezu kwawo.

²⁰Yizo lezi izidalwa eziphilayo engazibona ngaphansi kukaNkulunkulu kaIsrayeli emfuleni iKebari; ngazi ukuthi ngamakherubi*.

²¹Zonke zazilobuso obune, zilempiko ezine, langaphansi kwempiko zazo kwakukhona okufanana lezandla zomuntu.

²²Ubuso bazo babunjengalobo engabubona embonweni emfuleni iKebari. Zazihamba zonke ziqonda phambili.