Read Ndebele-IBhayibhili Elingcwele 2006 Uhezekiyeli 11 Bible Online

Uhezekiyeli 11 - Ndebele-IBhayibhili Elingcwele 2006 bible

Uhezekiyeli 11

¹UMoya wangiphakamisa, wangisa esangweni lendlu ye Nkosi elingempumalanga, elikhangele ngempumalanga. Khangela, emnyango wesango kwakukhona amadoda angamatshumi amabili lanhlanu; phakathi kwawo ngabona uJahazaniya indodana kaAzuri, loPelatiya indodana kaBhenaya, iziphathamandla zabantu.

²Yathi kimi: Ndodana yomuntu, yiwo la amadoda enza amacebo amabi, anika izelukeko ezimbi kulumuzi,

³athi: Isikhathi kasikafiki sokuthi kwakhiwe izindlu; lumuzi uyimbiza, thina siyinyama.

⁴Ngakho-ke profetha ngawo, profetha wena ndodana yomuntu.

⁵UMoya we Nkosi wasewela phezu kwami, wathi kimi: Khuluma: Itsho njalo i Nkosi: Litsho njalo, ndlu kaIsrayeli, ngoba ngiyakwazi okuvela engqondweni zenu.

⁶Libulele abantu abanengi kulumuzi, lagcwalisa indlela zawo ngezidumbu.

⁷Ngakho-ke iNkosi uJehova ithi: Izidumbu zabakini elizibeke phakathi kwawo yizo eziyinyama, lumuzi uyimbiza; kodwa lina lizakhutshwa phakathi kwawo.

⁸Liyesabile inkemba, ngizalilethela yona, kutsho iNkosi uJehova.

⁹Ngizalikhupha phakathi kwalumuzi, ngilinikele ezandleni zabezizwe, ngenze izigwebo phakathi kwenu.

¹⁰Lizakuwa ngenkemba, ngiligwebe emingceleni yakoIsrayeli; lizakwazi ukuthi ngiyi Nkosi.

¹¹Lumuzi kawuyikuba yimbiza yenu, lani kaliyikuba yinyama phakathi kwayo. Ngizaligweba emingceleni yakoIsrayeli.

¹²Lizakwazi ukuthi ngiyi Nkosi. Ngoba kalihambanga ngezimiso zami, lemithetho yami kaliyenzanga, kodwa lenze imithetho yezizwe ezilihanqileyo.

¹³Kwathi lokhu ngisaprofetha, uPelatiya indodana kaBhenaya wafa. Ngasengisithi mbo ngobuso phansi, ngamemeza ngelizwi elikhulu ngathi: Hawu, Nkosi Jehova, uzabaqeda abaseleyo koIsrayeli yini?

¹⁴Ilizwi le Nkosi lafika kimi lathi:

¹⁵Ndodana yomuntu, abafowenu, yebo abafowenu abayizihlobo zakho, uIsrayeli wonke, yibo abatshelwe ngabakhileyo eJerusalema ukuthi: Selikhatshana le Nkosi. Ilizwe selinikwe thina ukuze libe yilifa lethu.

¹⁶Ngakho iNkosi uJehova ithi: Loba ngibese khatshana phakathi kwezizwe, ngabachithachithela emazweni, kanti ngibe yindlu engcwele kibo okwesikhatshana emazweni engabachithachithela kiwo.

¹⁷Ngakho-ke tshono uthi iNkosi uJehova ithi: Ngizabaqoqa ezizweni ngibabuthe emazweni engibachithachithele kiwo, ngibanike ilizwe lakoIsrayeli.

¹⁸Lapho befika kulo, bazasusa lapho konke okunengisayo kwalo, lawo wonke amanyala alo.

¹⁹Njalo ngizabanika inhliziyonye, ngifake umoya omutsha phakathi kwenu, ngikhuphe inhliziyo yelitshe enyameni yabo, ngibanike inhliziyo yenyama,

²⁰ukuze bahambe ngezimiso zami, bagcine izimiselo zami bazilalele; bazakuba ngabantu bami, lami ngibe nguNkulunkulu wabo.

²¹Kodwa labo abanhliziyo zabo zithanda okunengisayo kwabo lamanyala abo, ngizaphindisela izenzo zabo phezu kwabo, kutsho iNkosi uJehova.

²²Amakherubi* asephakamisa impiko zawo, amavili asuka lawo; inkazimulo kaNkulunkulu kaIsrayeli yayingaphezu kwawo.

²³inkazimulo ye Nkosi yasuka phakathi komuzi, yema phezu kwentaba engempumalanga komuzi.

²⁴UMoya wangiphakamisa, wangisa kwabathunjiweyo eKhaladiya. Konke lokhu kwafika ngombono owawuthunywe nguMoya kaNkulunkulu; kwathi umbono engangiwubonile wasusuka kimi.

²⁵Ngasengibatshela abathunjiweyo zonke izinto i Nkosi eyayingitshengise zona.