Read Ndebele-IBhayibhili Elingcwele 2006 Uhezekiyeli 12 Bible Online

Uhezekiyeli 12 - Ndebele-IBhayibhili Elingcwele 2006 bible

Uhezekiyeli 12

¹Ilizwi le Nkosi lafika kimi lathi:

²Ndodana yomuntu, wena uhlala phakathi kwabantu abahlamukayo abalamehlo okubona, kodwa bengaboni, abalendlebe zokuzwa, kodwa bengezwa;

³ngoba bangabantu abahlamukayo. Ngakho-ke, wena ndodana yomuntu, lungisa umthwalo womuntu othunjiweyo, usuke emini uhambe phambi kwabo njengomuntu othunjiweyo, usuke endaweni yakho uye kwenye indawo phakathi kwabo. Mhlawumbe bazaqedisisa lanxa bengabantu abahlamukayo.

⁴Uzakhupha umthwalo wakho emini phambi kwabo, ube njengomthwalo womuntu othunjiweyo, usuke wena ntambama phambi kwabo, uhambe njengomuntu othunjiweyo.

⁵Ubhoboze umduli phambi kwabo, untshungubale kiwo.

⁶Nxa sekuhwalala uthathe umthwalo wakho, uwetshate ehlombe phambi kwabo, uwuthwale ugubuzele ubuso bakho ukuze ungaboni ilizwe. Ngikwenza ube yisixwayiso koIsrayeli.

⁷Ngasengisenza njengokutshelwa kwami. Ngawukhupha umthwalo wami emini, waba njengomthwalo wothunjiweyo. Kwathi kusihlwa ngabhoboza umduli ngezandla zami, ngantshungubala emnyameni, ngetshete umthwalo wami phambi kwabo.

⁸Kusasa ilizwi le Nkosi lafika kimi lathi:

⁹Ndodana yomuntu, kabatshongo kuwe yini indlu kaIsrayeli, abantu abahlamukayo, ukuthi: Wenzani?

¹⁰Ubokuthi kibo: INkosi uJehova ithi: Lelilizwi lingesikhulu seJerusalema langendlu yonke kaIsrayeli ayephakathi kwabo.

¹¹Ubatshele ukuthi uyisixwayiso kibo; lokho okwenzileyo kuzakwenziwa kibo, bazathunjwa.

¹²Isiphathamandla sabo sizakwetshata umthwalo waso emnyameni, sintshungubale embotsheni sigubuzele ubuso baso, ukuze singaboni ilizwe.

¹³Kodwa ngizaphosa imbule lami phezu kwaso, ngisibambe ngalo, ngisise eBhabhiloni elizweni lamaKhaladiya; kanti kasiyikulibona, loba sizafela khona.

¹⁴Ngizabachithachithela emimoyeni yonke wonke amanxusa aso, labasizi baso lawo wonke amabutho aso, ngibalandele ukubabulala.

¹⁵Bazakwazi ukuthi ngiyi Nkosi nxa sengibahlakazele ezizweni zonke, ngabachithachithela emazweni.

¹⁶Kodwa ngizatshiya abalutshwana baphephe enkembeni lendlaleni lakumatshayabhuqe wesifo, ukuze bafakaze ngawo wonke amanyala abo phakathi kwezizwe abazahamba kuzo, ukuze zazi ukuthi ngiyi Nkosi.

¹⁷Ilizwi le Nkosi lafika kimi futhi lathi:

¹⁸Ndodana yomuntu, dlana ukudla kwakho ngokuthuthumela, unathe amanzi ngokuqhaqhazela lokwesaba,

¹⁹uthi ebantwini belizwe: INkosi uJehova ithi ngabakhileyo eJerusalema abasekhona elizweni lakoIsrayeli: Bazakudla ukudla kwabo besesaba, banathe amanzi beqhaqhazela, ngoba ilizwe labo lizaphundlwa konke elilakho ngenxa yesihluku salabo abahlala kilo.

²⁰Imizi okuhlalwa kiyo izachithwa, lelizwe libe yinkangala; lizakwazi ukuthi ngiyi Nkosi.

²¹Ilizwi le Nkosi lafika kimi lathi:

²²Ndodana yomuntu, sithini lesisaga esitshiwoyo ngelizwe lakoIsrayeli esokuthi: Insuku ziyadlula, lemibono yonke ilize?

²³Batshele uthi: INkosi uJehova ithi: Ngizasiqeda lesisaga, kabasayikusisebenzisa koIsrayeli. Uthi kibo: Insuku zisondele, kanye lokugcwaliseka kwemibono yonke.

²⁴Ngoba kakusayikuba khona umbono wamanga, lokuvumisa okukhohlisayo koIsrayeli.

²⁵Kodwa mina Nkosi ngizakhuluma engikuthandayo; engikutshoyo yikho okuzakwenzeka, kungaphuzi lokho engikukhulumayo; ngizakwenza ensukwini zenu, lina bantu abahlamukayo, kutsho iNkosi uJehova.

²⁶Laselifika ilizwi le Nkosi lisithi

²⁷Ndodana yomuntu, khangela, abakoIsrayeli bathi: Umbono awubonayo ungowe nsuku ezikhatshana, lalokho akuprofethayo kungokwesikhathi esikhatshana.

²⁸Ngakho wothi kibo: INkosi uJehova ithi: Kakusayikuphuza lelilodwa emazwini ami, kodwa ilizwi engilikhulumayo lizakwenzeka, kutsho iNkosi uJehova.