Read Ndebele-IBhayibhili Elingcwele 2006 Uhezekiyeli 13 Bible Online

Uhezekiyeli 13 - Ndebele-IBhayibhili Elingcwele 2006 bible

Uhezekiyeli 13

¹Ilizwi le Nkosi lafika kimi lathi:

²Ndodana yomuntu, profetha ngabaprofethi bakoIsrayeli, uthi kulabo abaprofethayo okwengqondo zabo: Zwanini ilizwi le Nkosi.

³INkosi uJehova ithi: Maye kubaprofethi abayizithutha abalandela owabo umoya, bengabonanga mibono!

⁴Wena Israyeli, abaprofethi bakho banjengamakhanka asemanxiweni.

⁵Kabayanga ezikhaleni ukulungisela uIsrayeli umduli odilikileyo ukuze aqine empini esukwini lwe Nkosi.

⁶Bakhohlisile, bavumisa amanga, besithi: Nanka amazwi e Nkosi; yona i Nkosi ingabathumanga, baqaphele ukuthi izagcwalisa ilizwi labo.

⁷Kakusiwo umbono wenkohliso eliwubonileyo yini, lina baprofethi? Ukuvumisa kwenu kakusiwo amanga yini? Lithi kuyilizwi le Nkosi uqobo, kodwa kungeyisimi engikhulumileyo.

⁸Ngakho-ke iNkosi uJehova ithi: Ngoba likhulume inkohliso, labona amanga, ngakho, khangelani, ngizamelana lani, kutsho iNkosi uJehova.

⁹Isandla sami sizamelana labaprofethi ababona imibono yenkohliso, bavumise amanga. Kabayikuba semhlanganweni wabantu bami, loba babhalwe eluhlwini lwakoIsrayeli, kabayikungena elizweni lakoIsrayeli; lizakwazi ukuthi ngiyiNkosi uJehova.

¹⁰Yebo, ngoba beduhisa abantu bami besithi: Kulungile! Khona kungalunganga; kunjengabantu abakha umduli, khangela, lababaprofethi bawucombe ngekalaga engavuthwanga.

¹¹Tshela labo abawucombayo ngekalaga ukuthi uzakuwa. Kuzakuba khona impophoma zezulu, kukhithike isiqhotho esikhulu, kuvuke isiphepho somoya;

¹²khangela, nxa umduli lowo ususiwa, kakuyikutshiwo kuwe ukuthi: Kungaphi lokho ababewucomba ngakho?

¹³Ngakho-ke, iNkosi uJehova ithi: Ekuthukutheleni kwami ngizavusa isiphepho somoya, langolaka lwami nginise impophoma zezulu lesiqhotho esikhulu ukuze ngiwudilize.

¹⁴Ngizadiliza umduli eliwucombe ngekalaga, ngiwuwisele phansi ukuze kwembuleke izisekelo zawo; lekuweni kwawo uzalibulala; lizakwazi ukuthi ngiyi Nkosi.

¹⁵Ngokunjalo-ke ngizakwehlisela emdulini ulaka lwami laphezu kwalabo abawucomba ngekalaga, besengisithi kuwe: Umduli kawusekho, kanye lalabo abawucombileyo,

¹⁶abangabaprofethi bakoIsrayeli abaprofetha ngeJerusalema, ababona imibono besithi kulungile, khona kungalunganga, kutsho iNkosi uJehova.

¹⁷Wena ndodana yomuntu, phendukela kwabesifazana bakini abaprofetha okwengqondo zabo, uprofethe ngabo,

¹⁸uthi: INkosi uJehova ithi: Maye kwabesifazana abathungela intebe ezihlakaleni zabo bonke abantu, babenzele lezimbombozo zokufaka emakhanda ukuze babathiye. Lizathiya abantu bami, ukuze lisizakale lina yini?

¹⁹Lingingcolisile phakathi kwabantu bami ngenxa yengcosana nje yebhali, langezihletshana zezinkwa, labulala abantu abangafanelanga ukufa, layekela abantu abangafanelanga ukuphila ngamanga enu ebantwini bami abalalela amanga.

²⁰Ngakho iNkosi uJehova ithi: Khangelani, ngimelene lentebe zenu elithiya ngazo abantu; ngizazidabula engalweni zenu, ngiyekele abantu elibathiyileyo njengezinyoni bakhululeke.

²¹Lezimbombozo zenu lazo ngizazidabula, ngikhulule abantu bami ezandleni zenu, lingabe lisaba lamandla okubathiya futhi; lizakwazi ukuthi ngiyi Nkosi.

²²Ngoba lidabukisile abalungileyo ngamanga, lapho ngingabadabukisanga mina, lakhuthaza ababi ukuze bangaphenduki endleleni zabo ezimbi, basile.

²³Ngakho kalisayikubona imibono yenkohliso, lenze ukuvumisa; ngizakhulula abantu bami ezandleni zenu. Lizakwazi ukuthi ngiyi Nkosi.