Read Ndebele-IBhayibhili Elingcwele 2006 Uhezekiyeli 14 Bible Online

Uhezekiyeli 14 - Ndebele-IBhayibhili Elingcwele 2006 bible

Uhezekiyeli 14

¹Kwasekufika kimi amadoda abadala bakoIsrayeli, bahlala phambi kwami.

²Ilizwi le Nkosi lafika kimi lathi:

³Ndodana yomuntu, lamadoda anikele inhliziyo zawo ezithombeni zawo, athanda ukukhangela izinto ezimbi eziwakhubayo. Ngizavuma ukubuzwa yiwo yini?

⁴Ngakho-ke khuluma kuwo uthi: INkosi uJehova ithi: Wonke umuntu wendlu kaIsrayeli onikela inhliziyo zabo ezithombeni zakhe, othanda ukukhangela izinto ezimbi ezimkhubayo, kodwa eze kumprofethi, mina Nkosi uqobo ngizamphendula ngenxa yobunengi bezithombe zakhe,

⁵ukuze ngibambe inhliziyo yendlu kaIsrayeli abehlukene lami ngenxa yezithombe zabo.

⁶Ngakho-ke tshono kuIsrayeli uthi: INkosi uJehova ithi: Phendukani, lehlukane lezithombe zenu, lidele wonke amanyala enu.

⁷Ngoba wonke wendlu kaIsrayeli labezizweni abahlala koIsrayeli abazehlukanisa lami, banikela inhliziyo zabo ezithombeni zabo, bethanda ukukhangela izinto ezimbi ezibakhubayo, kodwa beze kumprofethi ukubuza ngami, mina Nkosi uqobo ngizabaphendula.

⁸Ngizamelana lalabobantu, ngibenze babe yizibonakaliso leziga, ngibaquma basuke phakathi kwabantu bami; lizakwazi ukuthi ngiyi Nkosi.

⁹Uba umprofethi ekhohliseka, akhulume ilizwi, mina Nkosi ngimkhohlisile lowomprofethi; ngizaphakamisela isandla sami, ngimbhubhise phakathi kwabantu bami uIsrayeli.

¹⁰Bonke bazatshaywa, umprofethi lomuntu obuzayo, bayona bonke,

¹¹ukuze uIsrayeli angabe esehlukana lami futhi, angabuyi azingcolise ngeziphambeko zabo zonke, kodwa babe ngabantu bami, lami ngibe nguNkulunkulu wabo, kutsho iNkosi uJehova.

¹²Ilizwi le Nkosi lafika kimi lathi:

¹³Ndodana yomuntu, lapho ilizwe lisona kimi ngokwenza okubi, mina ngizaphakamisela isandla sami kulo, nginciphise ukudla kwalo kwensuku zonke, ngilehlisele indlala, ngiqume ngisuse kulo abantu lezinyamazana.

¹⁴Loba lamadoda amathathu ebehlala khona, uNowa loDaniyeli loJobe, abezazikhulula wona kuphela ngokulunga kwawo, kutsho iNkosi uJehova.

¹⁵Loba ngidlulisa phakathi kwelizwe izilo zeganga, ziliphange, lize libe yinkangala, ukuze kungadluli muntu kilo ngenxa yezilo,

¹⁶uba lamadoda amathathu abehlala kilo, ngiyazifunga mina, kutsho iNkosi uJehova, abengayikukhulula amadodana lamadodakazi awo; wona wodwa abezazikhulula, kodwa ilizwe libe yinkangala.

¹⁷Uba ngisehlisela inkemba kulelolizwe ngithi: Nkemba, dabula phakathi kwelizwe, ukuze ngiqume ngisuse kulo abantu lezinyamazana,

¹⁸loba lamadoda abehlala khona, ngiyazifunga, kutsho iNkosi uJehova, abengayikukhulula amadodana lamadodakazi awo, kodwa wona wodwa abezazikhulula.

¹⁹Uba ngithumela umatshayabhuqe wesifo kulelolizwe, ngehlisele ukuthukuthela kwami kulo ngokuchitha igazi, ukuze ngiqume ngisuse kulo abantu lezinyamazana,

²⁰loba uNowa loDaniyeli loJobe bebehlala khona, ngiyazifunga, kutsho iNkosi uJehova, bebengayikukhulula indodana loba indodakazi; kodwa bebezazikhulula bona kuphela ngokulunga kwabo.

²¹INkosi uJehova ithi: Pho-ke, kuzakuba njani eJerusalema nxa ngiyehlisela lezizigwebo zami ezine ezibuhlungu, inkemba, lendlala, lezilo ezimbi, lomatshayabhuqe wesifo, ukuze ngiqume ngisuse kiyo abantu lezinyamazana.

²²Kodwa khangela, abanye bazasala kilo, abasilileyo ukuze bakhutshwe kilo, amadodana lamadodakazi; khangela, bazaphuma besiza kuwe, ubone ukuthi baziphathe njani lokuthi benzeni; lokhu kuzakutshengisa wena ukuthi konke okubi engikwenzileyo eJerusalema kufanele, lakho konke engiyehlisele khona.

²³Kuzakutshengisa ukuthi kufanele nxa usubonile ukwenza kwabo lalokho abakwenzileyo, ngoba uzakwazi ukuthi kangikwenzanga lokhu kibo ngaphandle kwesizatho, kutsho iNkosi uJehova.