Read Ndebele-IBhayibhili Elingcwele 2006 Uhezekiyeli 18 Bible Online

Uhezekiyeli 18 - Ndebele-IBhayibhili Elingcwele 2006 bible

Uhezekiyeli 18

¹Ilizwi le Nkosi lafika kimi futhi lathi:

²Litsho ukuthini ngalesisaga koIsrayeli sokuthi: Oyise badlile izithelo zevini ezimunyu, amazinyo abantwana asetshelela?

³Ngiyazifunga, kutsho iNkosi uJehova, lesisaga kasisayikutshiwo futhi koIsrayeli.

⁴Khangela, yonke imiphefumulo ngeyami; umphefumulo kayise kanye lomphefumulo womntwana ungokwami. Lowomuntu owonayo uzakufa.

⁵Uba umuntu elungile, esenza okufaneleyo lokulungileyo,

⁶engadleli emathempelini aphezu kwezintaba, engaphakamiseli amehlo akhe ezithombeni zakoIsrayeli, engangcolisi umfazi womakhelwane wakhe, engasondeli kowesifazana owehlukanisiweyo,

⁷engacindezeli muntu, ebuyisela kowebolekayo isibambiso sakhe, engaphangi muntu, enika olambileyo ukudla, enika abahambaze izigqoko,

⁸engabolekisi ukuze azuze inzuzo, engathathi umvuzo, ezinqanda kokubi, enze isahlulelo ngokuqondileyo phakathi komuntu lomuntu,

⁹ehamba ngezimiso zami, egcina imithetho yami, onjalo ulungile; uzaphila isibili, kutsho iNkosi uJehova.

¹⁰Uba ezala indodana engumphangi lomchithi wegazi,

¹¹edelela lezizinto, edlela emathempelini aphezu kwezintaba, ingcolise umfazi womakhelwane wayo,

¹²icindezela abayanga labaswelayo, iphanga abantu, ingabuyiseli isibambiso, iphakamisela amehlo ayo ezithombeni, yenze amanyala,

¹³isebolekisa ukuze izuze inzuzo, ithathe umvuzo, enjalo izaphila yini? Kayiyikuphila; yenzile wonke la amanyala; izakufa isibili, legazi layo libe phezu kwayo.

¹⁴Khangela, uba lowomuntu ezala indodana ebona izono zonke lezi ezenziwe nguyise, yesabe, ingenzi njengaye,

¹⁵ingadleli emathempelini aphezu kwezintaba, ingaphakamiseli amehlo ayo ezithombeni zakoIsrayeli, ingangcolisi umfazi womakhelwane wayo,

¹⁶ingoni muntu, ingathathi isibambiso, ingaphangi muntu, kodwa iphe abalambileyo ukudla, inike abahambaze izigqoko,

¹⁷izinqande kokubi, ingathathi inzuzo lomvuzo, igcine imithetho yami, ihambe ngezimiso zami, kayiyikufela izono zikayise, kodwa izaphila isibili.

¹⁸Uyise-ke, ngoba ecindezele, waphanga umfowabo, wenza okungalunganga phakathi kwabantu bakibo, khangela, uzakufa ngenxa yezono zakhe.

¹⁹Kanti lina lithi: Kungani indodana ingahlupheki ngenxa yezono zikayise yini? Nxa indodana isikwenzile okufaneleyo lokulungileyo, isigcinile izimiso zami, izaphila isibili.

²⁰Lowomuntu owonayo uzakufa. Indodana kayiyikuhlupheka ngenxa yezono zikayise, loyise kayikuhlupheka ngenxa yezono zendodana. Olungileyo uzavuna umvuzo wokulunga kwakhe, lomubi avune umvuzo wobubi bakhe.

²¹Uba omubi ephenduka ebubini bakhe bonke abenzileyo, agcine izimiso zami, enze okufaneleyo lokulungileyo, uzaphila isibili, kayikufa.

²²Iziphambeko zakhe zonke azenzileyo kazisayikukhunjulwa; kodwa uzaphila ngenxa yokulunga kwakhe akwenzileyo.

²³Ngiyathokoziswa yini yikufa komubi, kutsho iNkosi uJehova, kungabi yikuphenduka kwakhe endleleni yakhe aphile?

²⁴Kodwa nxa olungileyo ephambuka ekulungeni kwakhe, enze okubi, enze amanyala enziwa ngomubi, uzaphila yini? Izenzo zakhe zonke ezilungileyo abezenzile kazisayikukhunjulwa; ngenxa yenkohliso alecala ngayo, lesono asenzileyo, uzakufa.

²⁵Kanti lithi: Indlela yeNkosi kayiqondanga. Zwanini-ke, lina Israyeli; indlela yami kayiqondanga yini? Kakusizo yini ezenu indlela ezingaqondanga?

²⁶Lapho umuntu olungileyo ephambuka ekulungeni kwakhe, enze okubi, uzakufa ngenxa yakho; yebo, ngenxa yobubi abenzileyo uzakufa.

²⁷Futhi nxa umuntu omubi ephenduka ebubini bakhe abenzileyo, enze okufaneleyo lokulungileyo, uzasindisa umphefumulo wakhe.

²⁸Ngoba wabona, waphenduka eziphambekweni zakhe zonke abezenzile, uzaphila isibili kayikufa.

²⁹Kodwa uIsrayeli uthi: Indlela yeNkosi kayiqondanga. Wena Israyeli, indlela zami kaziqondanga yini? Kakusizo ezenu indlela ezingaqondanga yini?

³⁰Ngakho ngizalahlulela, lina ndlu kaIsrayeli, ngulowo lalowo ngokwendlela zakhe, itsho iNkosi uJehova. Phendukani, libuye eziphambekweni zenu zonke; ngakho ububi bungabi yincithakalo yenu.

³¹Lahlani kini zonke iziphambeko zenu eliphambeke ngazo, lizenzele inhliziyo entsha lomoya omutsha; ngoba lizafelani, ndlu Israyeli?

³²Ngoba kangithokoziswa yikufa komuntu, kutsho iNkosi uJehova; ngakho-ke phendukani ukuze liphile.